លោកបណ្ឌិត សូ ណារ៉ូ បានមកដល់កម្ពុជាហើយ ក្រោយពីចាកចេញរយៈពេល ១១ឆ្នាំ

លោកបណ្ឌិត សូ ណារ៉ូ ព្រមទាំងក្រុមគ្រួសារ បានមកដល់ទឹកដីប្រទេសកម្ពុជាវិញហើយ បន្ទាប់ពីលោក និងក្រុមគ្រួសារបានចាកចេញពីប្រទេសកំណើតកាលពីឆ្នាំ ២០១២។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានចាកចេញពីសហរដ្ឋអាមេរិក កាលពីថ្ងៃម្សិលមិញ ហើយបានមកដល់អាកាសយានដ្ឋានអន្តរជាតិភ្នំពេញហើយ នៅថ្ងៃទី ២៣ ខែមិថុនា ឆ្នាំ ២០២៣នេះ។

ជុំវិញការវិលត្រឡប់របស់លោកបណ្ឌិតវ័យ ៥៨ឆ្នាំនេះ គឺជាការវិលមកបំពេញការងារក្នុងក្របខណ្ឌរដ្ឋ ជារដ្ឋមន្ត្រីប្រតិភូអមនាយករដ្ឋមន្ត្រី បន្ទាប់ពីព្រះមហាក្សត្រ ចេញព្រះរាជក្រឹត្យតែងតាំង កាលពីថ្ងៃទី ៨ ខែឧសភា ឆ្នាំ ២០២៣។

ក្នុងនាមលោកជារដ្ឋមន្ត្រីប្រតិភូអមនាយករដ្ឋមន្ត្រី នៅថ្ងៃសៅរ៍ទី ២៤ ខែមិថុនាស្អែកនេះ នឹងធ្វើសន្និសីទសារព័ត៌មានមួយ នៅវិមានសន្តិភាព។

គួរបញ្ជាក់ថា មុននឹងលោកទទួលការតែងតាំង ជាទីប្រឹក្សាសម្ដេចតេជោ ហ៊ុន សែន និងជាប្រតិភូអមនាយករដ្ឋមន្ត្រីឡើងវិញ កាលពីថ្ងៃទី ៨ ខែឧសភាឆ្នាំ ២០២៣ លោកបណ្ឌិត ក៏ធ្លាប់មានក្របខណ្ឌរដ្ឋបំពេញការងារ នៅទីស្ដីការគណៈរដ្ឋមន្ត្រី និងនៅខុទ្ទកាល័យនាយករដ្ឋមន្ត្រី ក្នុងនាមជាជំនួយការផ្ទាល់របស់សម្ដេចតេជោ ផងដែរ​៕

អត្ថបទ៖ ង៉ិល​ ណារ៉ាត់