កម្ពុជានឹងរៀបចំ​ការប្រកួត​កីឡាវាយសីអន្តរជាតិ 2023 Datuk Foo Kok Keong

ការ​ប្រកួត​កីឡា​វាយ​សី​​ពានរង្វាន់​អន្តរជាតិ Datuk Foo Kok Keong លើកទី៩ ឆ្នាំ២០២៣​ នឹង​ចាប់​ផ្តើម​ពី​ថ្ងៃទី១១ ដល់ទី១៣ ខែសីហា ឆ្នាំ២០២៣ ដែល​ប្រទេស​កម្ពុជា​ទទួល​រៀបចំ​ធ្វើ​ជា​ម្ចាស់​ផ្ទះ។

ក្នុងសន្និសីទសារព័ត៌មាន​នៅណាហ្គាវើលដ៍​កាលពីចុងសប្តាហ៍កន្លងទៅ លោក Ng Yong Wewi ប្រធានគណៈកម្មការ​រៀបចំការ​ប្រកួត​កីឡាវាយសី​ពាន​រង្វាន់​អន្តរជាតិ DATUK FOO Kok Keong លើកទី៩បាន​ឲ្យ​ដឹងថា DATUK FOO Kok Keong International Cup 2023 ជាព្រឹត្តិការណ៍​កីឡា​វាយសីដ៏​ពេញ​និយម​សម្រាប់មនុស្សវ័យចំណាស់​នៅ​តំបន់​អាស៊ី។ ឥឡូវ​​ព្រឹត្តិការណ៍​អន្តរជាតិ​នេះ​ឈាន​មក​ដល់​ប្រទេស​កម្ពុជា​​ដែល​​រៀបចំ​ការ​ប្រកួត​នៅ​ក្លិប​វាយសី T Badminton ​ក្រោមការសហការជាមួយណាហ្គាវើលដ៍។

លោក​មាន​ប្រសាសន៍ថា ៖«យើងមានមោទនភាពដែលកម្ពុជាបានធ្វើជាម្ចាស់ផ្ទះការរៀបចំការប្រកួត Datuk Foo Kok Keong Cup ២០២៣។ កម្ពុជា​ទើប​បានទទួល​ជោគជ័យ​ក្នុង​ការ​រៀបចំ​ព្រឹត្តិការណ៍​កីឡា​ស៊ីហ្គេម លើក​ទី​៣២ និង​អាស៊ាន​ប៉ារ៉ាហ្គេម លើក​ទី​១២។ ទាំង​នេះ​ជា​សមិទ្ធផលប្រវត្តិ​សាស្ត្រ​ដ៏​ធំ​ធេង ហើយ​ពេល​នេះ​កម្ពុជា​រៀបចំ​ការ​ប្រកួត​កីឡា​វាយសី Datuk Foo Kok Keong cup ២០២៣»។

លោក គី ផេង ប្រធាន​ក្លិបវាយសី T Badminton ​មាន​ប្រសាសន៍​ថា ៖«ក្នុងនាមលោកជាម្ចាស់ក្លិប​មួយពិតជាសប្បាយ​រីក​រាយ​ក្នុង​កិច្ច​សហការ​ជាមួយគណៈកម្មការ​​រៀបចំ​ការ​ប្រកួត Datuk Foo Kok Keong Cup ២០២៣។ យើងពិតជាមានមោទនភាពដែលកម្ពុជាបានធ្វើជាម្ចាស់ផ្ទះការរៀបចំការកម្រិតអន្តរជាតិនៃប្រភេទកីឡាវាយសី»។

ព្រឹត្តិកាណ៍ការប្រកួត Datuk Foo Kok Keong cup កន្លងមក​សម្រាប់​អត្តពលិក​វ័យក្មេង ប៉ុន្តែ​ឆ្នាំ​២០២៣​នេះ​រៀបចំសម្រាប់កីឡាករវ័យចាស់តាមស្តង់ដាអន្តជាតិ។ តាម​ការ​គ្រោង​ទុក​នឹង​មាន​​ចំនួន៩​ប្រទេស និង​​មាន​១២ក្រុម​ដែល​ក្នុង​មួយ​ក្រុម​​មាន​សមាជិក​១០​រូប​ចូល​រួម​ប្រកួត។ ការប្រកួតលើកនេះ​ក៏​ជា​ឱកាស​ផ្តល់​ឲ្យ​​​អត្តពលិក​វ័យចាស់រៀនសូត្រ និងដកស្រង់បទពិសោធ​ពីគ្នាទៅវិញទៅមក ខណៈ​មាន​​អតីតកីឡាករ កីឡាការិនី​ជម្រើស​ជាតិ​ល្បី​ៗ​មក​ពី​ប្រទេស​ផ្សេង​ៗ​ចូល​រួម​ដែរ។

DATUK FKK INTERNATIONAL CUP ជាព្រឹត្តិការណ៍កីឡា​មួយ​ក្នុងតំបន់អាស៊ីប៉ាស៊ីហ្វិកវិលជុំក្នុងចំណោមទីតាំងផ្សេងៗគ្នាក្នុងសហគមន៍កីឡាវាយសី។ វាជា​ការ​ប្រកួត​ប្រចាំឆ្នាំចាប់តាំងពីការបង្កើតឡើងកាលឆ្នាំ ២០១២។ ការធ្វើជាម្ចាស់ផ្ទះការប្រកួតពាន​រង្វាន់​អន្តរជាតិ​នេះត្រូវបានចាត់ទុក​ជាកិត្តិយសមួយដោយសារ​ប្រជាប្រិយភាពយ៉ាងសម្បើមនៃកីឡាវាយសីទូទាំងពិភពលោក​ដែល​មានមនុស្ស ២២០ លាននាក់លេងកីឡាក្នុងតំបន់អាស៊ីប៉ាស៊ីហ្វិក។

តាម​ការ​គ្រោង​ទុក ការប្រកួតពានរង្វាន់ DATUK FOO Kok Keong លើកទី៩ ឆ្នាំ២០២៣នឹងត្រូវ​អញ្ជើញ​ចូល​រួម​ពិធី​បើក​ដោយ​លោក Yang Berhormat Hannah Yeah រដ្ឋមន្ត្រីកីឡាម៉ាឡេស៊ី និង​លោក TENGKU Hisamuddin Zazi មកពី Selangor ប្រទេសម៉ាឡេស៊ី អញ្ជើញចូលរួមពិធីបិទនៅថ្ងៃទី ១៣ ខែសីហា ឆ្នាំ ២០២៣៕