ថ្ងៃក្តៅបំផុតក្នុងប្រវត្តិសាស្រ្តពិភពលោក បានមកដល់

យោងតាមទិន្នន័យដែលចេញផ្សាយដោយមជ្ឈមណ្ឌលជាតិសម្រាប់ការទស្សន៍ទាយបរិស្ថានសហរដ្ឋអាមេរិក (NCEP) បានឲ្យដឹងថា ភពផែនដីបានជួបប្រទះថ្ងៃក្តៅបំផុតមិនធ្លាប់មានក្នុងប្រវត្តិសាស្រ្ត ខណៈសីតុណ្ហភាពបានកើនឡើងពាសពេញពិភពលោក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្ថាប័នរដ្ឋាភិបាលសហរដ្ឋអាមេរិក ដែលធ្វើការងារទាក់ទងអាកាសធាតុជាតិ និងពិភពលោកដែលមានទីស្នាក់ការកណ្តាលនៅរដ្ឋ Maryland មួយនេះ បាននិយាយកាលពីថ្ងៃអង្គារ ទី៤ ខែកក្កដាថា ខ្លួនបានកត់ត្រាសីតុណ្ហភាពសកលជាមធ្យម ១៧.០១ អង្សាសេកាលពីថ្ងៃចន្ទ ហើយនេះគឺលើសពីកម្រិតខ្ពស់លើកមុន ដែលឈានដល់ ១៦.៩២ អង្សាសេក្នុងខែសីហា ឆ្នាំ២០១៦ ។

ពាក់ព័ន្ធនឹងបញ្ហានេះដែរ អ្នកវិទ្យាសាស្ត្រអាកាសធាតុឈ្មោះ Friederike Otto បាននិយាយថា “នេះមិនមែនជារឿងល្អឡើយ ព្រោះវាគឺជាការកាត់ទោសប្រហារជីវិតសម្រាប់មនុស្ស និងប្រព័ន្ធអេកូឡូស៊ី” ។

ការ​ព្រមាន​នេះ​កើត​ឡើង ​ខណៈ​រដ្ឋជាច្រើននៅ​ភាគ​ខាង​ត្បូង​សហរដ្ឋ​អាមេរិក​ បានជួបប្រទះនូវរលក​កម្ដៅ​ខ្លាំងមិនធម្មតា ​ក្នុង​រយៈពេល​ប៉ុន្មាន​ថ្ងៃ​ថ្មីៗ​នេះ។

ទីក្រុង Corpus Christi ក្នុងរដ្ឋតិចសាស់ បានកត់ត្រាសីតុណ្ហភាពខែមិថុនា ៥១ អង្សាសេ ហើយសីតុណ្ហភាពស្រដៀងគ្នានេះ ក៏ត្រូវបានកត់ត្រាផងដែរនៅរដ្ឋ Oklahoma, Arkansas, Missouri និង Louisiana។

ទន្ទឹមនោះ ប្រទេសចិន ក៏បានជួបប្រទះរលកកម្តៅរយៈពេលយូរផងដែរ ដោយទីក្រុងប៉េកាំង បានកត់ត្រាសីតុណ្ហភាពលើស ៣៥ អង្សាសេ សឹងតែ ១០ ថ្ងៃជាប់គ្នា ។ ដោយឡែក តំបន់មួយចំនួននៅអាហ្រ្វិកខាងជើង បានកត់ត្រាសីតុណ្ហភាពឡើងដល់ ៥០ អង្សាសេ ។

សូម្បីតែតំបន់អង់តាក់ទិកដែលបច្ចុប្បន្នស្ថិតក្នុងរដូវរងាក៏ដោយ ប៉ុន្តែទ្វីបនេះបានជួបប្រទះសីតុណ្ហភាព ៨.៧ អង្សាសេ ដែលបំបែកកំណត់ត្រាខ្លួនឯងកាលខែកក្កដា ។

ជាចុងក្រោយ អ្នកវិទ្យាសាស្ត្រអាកាសធាតុនិយាយថា ការបម្រែបម្រួលអាកាសធាតុ គួបផ្សំនឹងគំរូអាកាសធាតុក្តៅ El Nino ខ្លាំង គឺជាកត្តាចម្បងចំពោះការឡើងសីតុណ្ហភាពខ្ពស់ខុសពីធម្មតាបែបនេះ ហើយវានឹងកើតឡើងច្រើនទៀតផងដែរ ៕

ប្រែសម្រួល៖ Vann Vann

ប្រភព៖ RT

ចុចអាន៖ អាកាសធាតុ សម្លាប់ប្រជាជនអឺរ៉ុប ១៤២,០០០នាក់ ក្នុងរយៈពេល៤០ឆ្នាំចុងក្រោយ