ថៃ នឹងប្រទះអាកាសធាតុក្តៅខ្លាំង ហើយជួបព្យុះខែប្រាំង ខណៈតំបន់ខ្លះប្រឈមគ្រោះរាំងស្ងួត

ប្រទេសថៃបានចេញការព្យាករថា រដូវក្តៅឆ្នាំនេះនឹងចូលមកដល់រាងយឺតជាងឆ្នាំមុនៗ ប៉ុន្តែឆ្នាំនេះអាកាសធាតុនឹងក្តៅខ្លាំងជាងធម្មតា ហើយក៏មានការវាយប្រហារដោយព្យុះខែប្រាំងផងដែរ ខណៈតំបន់ខ្លះត្រូវប្រឈមនឹងគ្រោះរាំងស្ងួត។

តាមការផ្សាយរបស់ Bangkok Post ដែលដកស្រង់ប្រភពពីនាយកដ្ឋានឧតុនិយម, ឆ្នាំនេះរដូវក្តៅនឹងចូលមកដល់យឺតជាងរាល់ឆ្នាំពីរសប្តាហ៍ ពោលគឺរដូវក្តៅនឹងចាប់ផ្តើមនៅចុងខែកុម្ភៈ ហើយសីតុណ្ហភាពជាមធ្យមទូទាំងប្រទេសត្រូវព្យាករថានឹងមានកម្រិត៣៥អង្សាសេ។

យ៉ាងណា តាមការព្យាករដដែល, តំបន់ភាគខាងជើងនឹងជាកន្លែងអាកាសធាតុក្តៅវាយប្រហារខ្លាំងបំផុត ដោយសីតុណ្ហភាពនឹងកើនលើស ៤២អង្សាសេ ហើយខេត្តធ្ងន់ធ្ងរជាងគេគឺ Mae Hong Son, Lampang និង Tak។

ទន្ទឹមនោះ នាយកដ្ឋានបានចេញការព្រមានថា ក្នុងអំឡុងរដូវក្តៅឆ្នាំនេះ ថៃនឹងជួបព្យុះខែប្រាំង និងភ្លើងឆេះព្រៃ ហើយតំបន់ខ្លះក៏ត្រូវរងគ្រោះដោយគ្រោះរាំងស្ងួតផងដែរ ជាពិសេសចាប់ពីពាក់កណ្តាលខែមីនាដល់ខែមេសា។

អ្វីដែលធ្វើឲ្យថៃបារម្ភខ្លាំងនោះគឺថា អាកាសធាតុក្តៅហួសកម្រិត នឹងបង្កគ្រោះថ្នាក់ដល់មនុស្ស ជាពិសេសកុមារនិងចាស់ជរា ដែលមានហានិភ័យខ្ពស់ចំពោះជំងឺដាច់សរសៃឈាមខួរក្បាល៕

អត្ថបទ៖ សុខ សុវណ្ណ