ព័ត៌មានជាតិ

ស្ថានទូតខ្មែរប្រចាំប្រទេសថៃ ចុះចែកអំណោយដល់ពលករខ្មែរ៧០គ្រួសាររងផលប៉ះពាល់ដោយជំងឺកូវីដ១៩

បានផុស

៥ years មុន

នៅ

ថ្ងៃពុធ ២៧ មករា ២០២១

ដោយ

លោក អ៊ូក សោភ័ណ ឯកអគ្គរាជទូតព្រះរាជាណាចក្រកម្ពុជាប្រចាំប្រទេសថៃ និងមន្ត្រីការទូតសហការជាមួយអាជ្ញាធរស្រុកបាងភ្លី នៅព្រឹកថ្ងៃទី២៧ ខែមករា ឆ្នាំ២០២១ ចុះចែកអំណោយជាគ្រឿងឧបភោគបរិភោគរួមមានអង្ករ មី ត្រីខ ទឹកស៊ីអ៊ីវ ប្រេងឆា អំបិល និងម៉ាស់ ដល់ពលករខ្មែរចំនួន៧០គ្រួសារ និងថវិកាមួយចំនួនដល់ក្មេងៗជាង៣០នាក់ ដែលរងផលប៉ះពាល់ដោយសារការរីករាលដាលជំងឺកូវីដ១៩ ស្ថិតនៅឃុំបាងផ្លា ស្រុកបាងភ្លី ខេត្តសមុទ្រប្រាកាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងឱកាសនោះ លោកឯកអគ្គរាជទូត បានពាំនាំនូវការសួរសុខទុក្ខពីសំណាក់សម្ដេចតេជោហ៊ុន សែន ដែលសម្តេចតែងតែយកចិត្តទុកដាក់និងគិតគូរសុខទុក្ខបងប្អូនប្រជាពលរដ្ឋខ្មែរទាំងក្នុងនិងក្រៅប្រទេស ជាពិសេសតែងតែបានណែនាំឲ្យស្ថានទូតជួយពលរដ្ឋខ្មែរនៅក្រៅប្រទេសឲ្យអស់ពីលទ្ធភាព។

លោកឯកអគ្គរាជទូតក៏បានណែនាំបងប្អូនពលករបន្តចូលរួមសហការជាមួយអាជ្ញាធរពាក់ព័ន្ធថៃក្នុងការអនុវត្តតាមវិធានការនានា របស់រាជរដ្ឋាភិបាលថៃអោយបានខ្ជាប់ខ្ជួន និងកាន់តែសកម្មថែមទៀតដើម្បីចូលរួមទប់ស្កាត់ការរីករាលដាលនៃជំងឺកូវីដ១៩ឲ្យមានប្រសិទ្ធភាពខ្ពស់ ក្នុងករណីបងប្អូនពលករមានបញ្ហាសូមធ្វើការទំនាក់ទំនងមកស្ថានទូតតាមរយៈលេខទូរស័ព្ទ និងហ្វេសប៊ុកផេកស្ថានទូត ដើម្បីជួយដោះស្រាយបងប្អូន។

លោកបានបញ្ជាក់ថា រូបលោកនិងក្រុមការងារបានអនុវត្តនូវគោលការណ៍សុខាភិបាលត្រឹមត្រូវដូចជាពាក់ម៉ាស់ លាងដៃនឹងជែល អាល់កុល និងមានគម្លាតសង្គម ដោយមានការសម្របសម្រួលពីអាជ្ញាធរមូលដ្ឋានរបស់ថៃផងដែរ៕

អត្ថបទ ៖ សំអឿន