ឃាត់ខ្លួនជនជាតិចិនតៃវ៉ាន់៣នាក់ ពាក់ព័ន្ធករណី​គ្រឿងញៀនជិត៥គីឡូក្រាម

កម្លាំងជំនាញការិយាល័យ ក១ នៃមន្ទីប្រឆាំងបទល្មើសគ្រឿងញៀន បានស្រាវជ្រាវ និងឃាត់ខ្លួនមុខសញ្ញារក្សាទុក និងដឹកជញ្ជូនដោយខុសច្បាប់នូវសារធាតុញៀនជាជនជាតិចិនតៃវ៉ាន់ចំនួន៣នាក់ និងដកហូតវត្ថុតាងគ្រឿងញៀនជិត៥គីឡូក្រាម។

ប្រតិបត្តិការឃាត់ខ្លួននេះបានធ្វើឡើងកាលថ្ងៃទី២៩ ខែកក្កដា ឆ្នាំ២០២៣ វេលាម៉ោង១និង២៥នាទី នៅចំណុចជិតផ្សាររាត្រី សង្កាត់ផ្សារចាស់ ខណ្ឌដូនពេញ រាជធានីភ្នំពេញ ក្រោមការសម្រួបសម្រួលពីលោក វង្ស សាវ៉ាត ព្រះរាជាអាជ្ញារង នៃអយ្យការអមសាលាដំបូងរាជធានីភ្នំពេញ។

ជនសង្ស័យដែលត្រូវឃាត់ខ្លួនមាន១ ឈ្មោះ ចេន ហុងយេន (Chen Hong Yen) ភេទប្រុស ជនជាតិចិនតៃវ៉ាន់។ ២ ឈ្មោះ ចេន កៃស៊ាន ( Chen Kai Xang) ភេទប្រុស ជនជាតិចិនតៃវ៉ាន់។ ៣ ឈ្មោះ ចេន យីទីង ( Chen Yi Ting) ភេទស្រី ជនជាតិចិនតៃវ៉ាន់។

ក្នុងប្រតិបត្តិការនេះកម្លាំងបានដកហូតវត្ថុតាងម្សៅហ្មត់ពណ៌ ស (Ketamin) សរុបរួមសារធាតុញៀនទម្ងន់៤គីឡូ៨៦៦​ក្រាម។ ជនសង្ស័យនិងវត្ថុតាង ត្រូវបានកសាងសំណុំរឿងបញ្ជូនទៅសាលាដំបូងរាជធានីភំ្នពេញ ចាត់ការតាមនីតិវិធី៕

អត្ថបទ៖ សុខុម