លោក ប៉ែន បូណា៖ តំណែងរដ្ឋមន្ត្រីប្រតិភូអមនាយករដ្ឋមន្ត្រី ជាកិត្តិយស តែក៏ជាអម្រែក

ក្រោយទទួលបានការតែងតាំងជារដ្ឋមន្ត្រីប្រតិភូអមនាយករដ្ឋមន្ត្រី សម្រាប់អាណត្តិទី៧នេះ លោក ប៉ែន បូណា បានបង្ហាញអារម្មណ៍ថា តាមរយៈតំណែងជាន់ខ្ពស់នេះ គឺជាមហាកិត្តិយស ប៉ុន្តែ ក៏ជាអម្រែកដ៏ធ្ងន់សម្រាប់រូបលោកដែរ។

បើតាមព្រះរាជក្រឹត្យ ចុះថ្ងៃទី២២ ខែសីហា ឆ្នាំ២០២៣ ព្រះមហាក្សត្រនៃកម្ពុជា បានត្រាស់បង្គាប់តែងតាំងមុខតំណែងជារដ្ឋមន្ត្រីប្រតិភូអមនាយករដ្ឋមន្ត្រីដល់ឥស្សរជនចំនួន ២៩រូប ដែលក្នុងនោះ ក៏មានអតីតប្រធានក្លិបអ្នកកាសែត លោក ប៉ែន បូណា ម្នាក់ផងដែរ។

តាមរយៈសំណេរនៅលើបណ្ដាញសង្គមហ្វេសប៊ុក នៅព្រឹកថ្ងៃទី២៣ ខែសីហានេះ លោក ប៉ែន បូណា បានថ្លែងអំណរព្រះគុណយ៉ាងជ្រាលជ្រៅបំផុតថ្វាយព្រះករុណាជាអម្ចាស់ជីវិតតម្កល់លើត្បូង ព្រះមហាក្សត្រនៃកម្ពុជាដែលបានប្រោសព្រះរាជទាននូវព្រះរាជក្រឹត្យតែងតាំងមុខតំណែងដល់រូបលោក ជារដ្ឋមន្ត្រីប្រតិភូអមនាយករដ្ឋមន្ត្រី។

ជាមួយគ្នានេះ លោក ប៉ែន បូណា ក៏បានគោរពថ្លែងអំណរគុណយ៉ាងជ្រាលជ្រៅចំពោះឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត នាយករដ្ឋមន្ត្រីនៃកម្ពុជា ព្រមទាំងសម្តេចតេជោ ហ៊ុន សែន ជាទីគោរពដ៏ខ្ពង់ខ្ពស់ ដែលបានផ្តល់សេចក្តីទុកចិត្តមកលើរូបលោក ក្នុងការបម្រើរាជរដ្ឋាភិបាល អាណត្តិទី៧នេះ។

លោក ប៉ែន បូណា បានចាត់ទុកតំណែងនេះ គឺជាមហាកិត្តិយស ប៉ុន្តែ ទន្ទឹមនឹងនោះក៏ជាអម្រែកដ៏ធ្ងន់។ តែទោះជាយ៉ាងណា លោក ប៉ែន បូណា បាទប្តេជ្ញាប្រឹងប្រែងឱ្យអស់ពីសមត្ថភាពក្នុងការបម្រើរាជរដ្ឋាភិបាល ក៏ដូចជាបម្រើជាតិមាតុភូមិ និងប្រជាពលរដ្ឋខ្មែរ ដើម្បីឱ្យស័ក្តិសមនឹងការទុកចិត្តរបស់ថ្នាក់ដឹកនាំ។

បើតាមការបង្ហើបឱ្យដឹងដោយសម្ដេចតេជោ ហ៊ុន សែន កាលពីល្ងាចថ្ងៃទី១៤ ខែសីហា ក្នុងពិធីបំពាក់មេដាយដល់ក្រុមអ្នកសារព័ត៌មាន នៅវិមានសន្តិភាព លោក ប៉ែន បូណា ក៏នឹងក្លាយជាអ្នកនាំពាក្យថ្មីរបស់រាជរដ្ឋាភិបាលឯកឧត្តមទេសាភិបាលបណ្ឌិត ហ៊ុន ម៉ាណែត ផងដែរ៕

អត្ថបទ៖ ធឿន វ៉ាន់សុង