អង្គការភ្លែន និងមន្ទីរអប់រំខេត្តរតនគិរី នឹងប្រមូលសិស្សមិនបានសិក្សាជាង ៥ពាន់នាក់ ឳ្យរៀនតាមឌីជីថល

អង្គការភ្លែនអន្តរជាតិកម្ពុជា សហការជាមួយ មន្ទីរអប់រំ យុវជន និងកីឡាខេត្តរតនគិរី នឹងគាំទ្រដល់សិស្សដែលបាត់បង់ការសិក្សាចំនួន ៥,៤០០នាក់ ឱ្យចូលរៀនម្តងទៀត តាមរយៈការសិក្សាពីចម្ងាយតាមប្រព័ន្ធឌីជីថល។

លោក យី គឹមថាន់ នាយករងរបស់អង្គការភ្លែនប្រចាំប្រទេសបានលើកឡើងថា ការសិក្សាក្នុងកម្រិតបឋមសិក្សារបស់ក្មេងស្រី នៅភូមិភាគ­ឦសាន រួមទាំងខេត្តរតនគិរី គឺមានបញ្ហាប្រឈមជាច្រើន។ បញ្ហាទាំងនោះ មានដូចជា ខ្វះសម្ភារៈសិក្សា មិនមានប្រព័ន្ធការពារគ្រប់គ្រាន់ សាលានៅឆ្ងាយពីភូមិ និងសមត្ថភាពរបស់គ្រូបង្រៀននៅមានកម្រិត។

ដោយសារបញ្ហាទាំងអស់នេះហើយ ទើបអង្គការភ្លែនជួយដល់កុមារដែលមិនបានទៅសាលារៀន និងលើសអាយុចូលរៀន អាចឱ្យពួកគេមានឱកាសបានសិក្សាជាថ្មីតាមរយៈការសិក្សាពីចម្ងាយតាមប្រព័ន្ធអនឡាញ។ លោក យី គឹមថាន់ថា ក្នុងចំណោមសិស្សដែលមិនបានបន្តការសិក្សាទាំងជាង ៥ពាន់នាក់នោះ គឺមកពីសាលាគោលដៅចំនួន ២៥ ក្នុងស្រុកចំនួន ៤ នៅខេត្តរតនគិរី។

លោកបញ្ជាក់ថា ចំពោះគម្រោងនេះ គឺនឹងរៀបចំបរិក្ខារសិក្សាតាមប្រព័ន្ធឌីជីថល នៅតាមអនុវិទ្យាល័យ និងវិទ្យាល័យចំនួន១០ នៅស្រុកតាវែង ស្រុកអូរជុំ ស្រុកអង្គអណ្តូងមាស និងស្រុកវឿនសៃ ខេត្តរតនគិរី។ បរិក្ខារទាំងនោះរួមមាន កុំព្យូទ័រ ម៉ាស៊ីនបញ្ចាំង LCD និងការតភ្ជាប់អ៊ីនធឺណិតសម្រាប់ថ្នាក់រៀន។ ចំណែកគ្រូបង្រៀននៅក្នុងទីក្រុង នឹងបង្រៀនសិស្សតាមប្រព័ន្ធ Zoom និង Google Meet ហើយសិស្សអាចឆ្លងឆ្លើយ និងសួរសំណួរគ្រូបាន។

ដំណើរការនេះ នឹងចាប់ផ្តើមឆ្នាំសិក្សា ២០២៣-២០២៤ ក្នុងអនុវិទ្យាល័យ និងវិទ្យាល័យ១០។ ក្នុងនោះ កម្រិតវិទ្យាល័យចំនួន ៨សាលា បង្រៀន៤មុខវិជ្ជា គឺគណិតវិទ្យា គីមីវិទ្យា រូបវិទ្យា និងភាសាអង់គ្លេស។ កម្រិតអនុវិទ្យាល័យបង្រៀន២សាលា មាន៣មុខវិជ្ជា គឺគណិតវិទ្យា គីមីវិទ្យា និងភាសាខ្មែរ៕