លោក ស សុខា  ចាត់តាំង លោក​ ​ប៊ុន ហុន ឱ្យទទួលបន្ទុកលើការងារក្រុមប្រឹក្សានីតិកម្ម និងល្បែងពាណិជ្ជកម្ម

ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លោក ស សុខា នៅរសៀលថ្ងៃទី ១៤​ ខែកញ្ញា ឆ្នាំ ២០២៣នេះ បានចេញសេចក្ដីសម្រេច​ កែសម្រួល និងប្រគល់ភារកិច្ចជូន លោក ប៊ុន ហុន រដ្ឋលេខាធិការក្រសួងមហាផ្ទៃ ឱ្យទទួលជួយ លោក ស សុខា រដ្ឋមន្ដ្រី លើការងារក្រុមប្រឹក្សានីតិកម្ម និងល្បែងពាណិជ្ជកម្ម។

ជាមួយគ្នានេះ ក្នុងសេចក្ដីសម្រេចដដែល ក៏ប្រគល់ភារកិច្ចជូនដល់ លោក ឌី សុកផាន ត្រូវទទួលជួយរដ្ឋមន្ដ្រី លើការងារសមាគម និងអង្គការក្រៅរដ្ឋាភិបាល និងគណបក្សនយោបាយ។ ក្រៅពីត្រូវទទួលភារកិច្ចតាមការកំណត់របស់ លោក ស សុខា ដែលជារដ្ឋមន្ត្រីក្រសួងមហាផ្ទៃ លោក​ ប៊ុន ហុន និង លោក ឌី សុក ផាន ត្រូវទទួលភារកិច្ចផ្សេងទៀតពី លោក ស សុខា ដែលប្រគល់ជូនតាមការចាំបាច់។

ជាការគត់សម្គាល់ ដើមឡើយកាលពីថ្ងៃទី ២៨ ខែសីហា កន្លងទៅ លោក ស សុខា រដ្ឋមន្ត្រីក្រសួងមហាផ្ទៃ បានចេញសេចក្ដីសម្រេចស្ដីពីរ​បៀបរបបការងារ និងការបែងចែកភារកិច្ចរបស់ថ្នាក់ដឹកនាំ ក្រសួងមហាផ្ទៃម្ដងរួចមកហើយ។  បើយោងតាមសេចក្ដីសម្រេចនាពេលនេះ លោក ស សុខា​ បានកំណត់ឱ្យ លោក ប៊ុន ហុន និង លោក ឌី សុកផាន ត្រូវទទួលជួយរដ្ឋមន្ត្រីលើការងារក្រុមប្រឹក្សានីតិកម្ម សមាគម និងអង្គការក្រៅរដ្ឋាភិបាល និងគណបក្សនយោបាយ៕

ដោយ៖ ង៉ិល ណារ៉ាត់