កម្មករសំណង់ម្នាក់ត្រូវឥដ្ឋការ៉ូធ្លាក់ពីជាន់ទី៣ ផ្លាតត្រូវក្បាល ស្លាប់យ៉ាងអាណោចអាធ័ម

បុរសជាកម្មករសំណង់វ័យជាង ៣០ឆ្នាំ ត្រូវបានស្លាប់ភ្លាមៗ ក្រោយរបូតឥដ្ឋការ៉ូ ដែលកំពុងស្ទូចឡើងជាន់ទី៣ ធ្លាក់ចំក្បាល ។ ករណីធ្លាក់នេះដែរបង្កភ្ញាក់ផ្អើលកាលពីវេលាម៉ោង ០៩ព្រឹកថ្ងៃទី ២០ ខែមិថុនា ឆ្នាំ២០២៦ នៅចំណុចការដ្ឋានផ្ទះល្វែង តាមបណ្តោយផ្លូវលេខ ២៥៧ សង្កាត់បឹងសាឡាង ខណ្ឌទួលគោក រាជធានីភ្នំពេញ។

តាមប្រភពពីកម្មករសំណង់បានអោយដឹងថា មុនកើតហេតុ ជនរងគ្រោះជាកម្មករសំណង់ កំពុងជាន់ផ្ទាល់ និងជាអ្នកបញ្ជាម៉ាសុីនរ៉កសម្ភារៈឥដ្ឋការ៉ូ ឡើងទៅជាន់ទី៣ តែដោយសភាពឥដ្ឋការ៉ូធ្ងន់ពេក ធ្វើអោយរេចុះឡើងបណ្តាលអោយរបូតធ្លាក់ ចុះមកក្រោមផ្លាតត្រូវក្បាលបុរសរងគ្រោះ ស្លាប់តែម្តង ។ ភ្លាមៗ ពលរដ្ឋបានរាយការណ៍ជូនសមត្ថកិច្ច ចុះមកអន្តរាគមន៍ផងដែរ ។

បច្ចុប្បន្ន សមត្ថកិច្ចមូលដ្ឋានសហការជាមួយ កម្លាំងផ្នែកចក្ខុកោសល្យវិច័យ នៃស្នងការដ្ឋាននគរបាលរាជធានីភ្នំេពញ ធ្វើការត្រួតពិនិត្យសាកសព រួចប្រឡល់ជូនសាច់ញ្ញាត្តិយកទៅធ្វើបុណ្យតាមប្រពៃណី ៕ អត្ថបទ ៖ រដ្ឋា