លីប៊ី និង UN ទាស់គ្នា រឿងតួលេខអ្នកស្លាប់ ក្នុងគ្រោះទឹកជំនន់

យោងតាមរបាយការណ៍ដែលធ្វើបច្ចុប្បន្នភាពកាលពីព្រឹកថ្ងៃអាទិត្យទី១៧ខែកញ្ញា ដោយការិយាល័យអង្គការសហប្រជាជាតិទទួលបន្ទុកសម្របសម្រួលកិច្ចការមនុស្សធម៌ (OCHA) បង្ហាញថា ពេលនេះ UN បានកែតម្រូវតួលេខមនុស្សស្លាប់ ក្នុងគ្រោះទឹកជំនន់នៅប្រទេសលីប៊ី ហើយ។

យោងតាមប្រភពពីអង្គការសុខភាពពិភពលោក (WHO), ពេលនេះ UN បញ្ជាក់ថា មនុស្សយ៉ាងតិច ៣៩៥៨នាក់ បានបាត់បង់ជីវិតនៅទូទាំងប្រទេសលីប៊ី ដោយសារទឹកជំនន់ ខណៈមនុស្ស​ជាង​៩០០០​នាក់​កំពុង​បាត់​ខ្លួន។

ក្នុងរបាយការណ៍ដំបូងកាលពីថ្ងៃសៅរ៍ទី១៦ខែកញ្ញា, OCHA និយាយថា មនុស្សយ៉ាងតិច១១៣០០នាក់បានស្លាប់នៅក្នុងទីក្រុង Derna ប្រទេសលីប៊ី ដោយសារទឹកជំនន់ដ៏បំផ្លិចបំផ្លាញ ខណៈតួលេខនេះ ត្រូវបាន OCHA ដកស្រង់យកពីអឌ្ឍចន្ទក្រហមលីប៊ី។

លោក Farhan Haq អ្នកនាំពាក្យរងរបស់អគ្គលេខាធិការ UN បានប្រាប់ CNN កាលពីថ្ងៃអាទិត្យថា “យើងនឹងសម្រេចយកតួលេខចុងក្រោយដែលទើបតែផ្ទៀងផ្ទាត់ដោយ WHO ជាតួលេខផ្លូវការ”។

ដោយឡែក សង្គមអឌ្ឍចន្ទក្រហមលីប៊ីបានជំទាស់ ដោយប្រាប់ CNN នៅព្រឹកថ្ងៃអាទិត្យថា ខ្លួនមិនដែលផ្តល់តួលេខអ្នកស្លាប់ខ្ពស់បែបនេះ ដល់ UN ទេ។

នៅពេលសួរថាតើធ្វើហេតុអ្វីបានជា UN លើកឡើងពីចំនួនអ្នកស្លាប់ដោយមិនត្រឹមត្រូវ លោក Haq និយាយថា “នៅក្នុងសោកនាដកម្មផ្សេងៗគ្នាជាច្រើន យើងតែងតែកែប្រែតួលេខ ដូច្នេះ​វា​ជា​អ្វី​ដែល​កំពុង​កើត​ឡើង​នៅ​ទី​នេះ។ ​ចំនួន​អ្នក​ស្លាប់​មិនច្បាស់លាស់ វា​អាច​ឡើង​ចុះ”។

គួរបញ្ជាក់ថា ទីក្រុង Derna ដែលជាចំណុចកណ្តាលនៃគ្រោះទឹកជំនន់អំឡុងពេលព្យុះ Daniel គឺត្រូវបានហែកច្រៀកជាពីរ បន្ទាប់ពីទឹកជំនន់វាយប្រហារសង្កាត់ទាំងមូលកាលពីសប្តាហ៍មុន។ ទីក្រុងនេះមានប្រជាជនប្រហែល ១០ម៉ឺននាក់ មុនពេលសោកនាដកម្ម៕

ប្រែសម្រួល៖ Vann Vann

ប្រភព៖ CNN

ចុចអាន៖ UN អំពាវនាវសុំទឹកប្រាក់ជាបន្ទាន់ យកទៅជួយជនរងគ្រោះ ដោយទឹកជំនន់នៅ លីប៊ី