អ្នកនាំពាក្យ ៖ ថ្លៃដឹកភ្ញៀវទេសចរពីព្រលានទៅទីរួមខេត្តសៀមរាប មិនថ្លៃទេបើធ្វើដំណើរជាក្រុម

ការកំណត់តម្លៃ គឺជាយន្តការមួយល្អសម្រាប់ការគ្រប់គ្រង ដឹកជញ្ជូនអ្នកដំណើរ ក៏ដូចជាភ្ញៀវទេសចរ ចេញពីអាកាស​យានដ្ឋានអន្តរជាតិសៀមរាបអង្គរ ឆ្ពោះទៅកាន់ទីក្រុងសៀមរាប។ នេះជាការគូសបញ្ជាក់របស់លោក តុប សុភ័ក អ្នកនាំពាក្យក្រសួងទេសចរណ៍។

ថ្លែងប្រាប់កម្ពុជាថ្មី លោក តុប សុភ័ក បានលើកឡើងថា ការគ្រប់គ្រងតម្លៃបានច្បាស់លាស់ របស់ក្រុមហ៊ុន អាចចៀស​វាង​ការយកតម្លៃថ្លៃហួសហេតុ របស់អ្នកបើកបររថយន្តដឹកភ្ញៀវ។ បើតាមលោក តុប សុភ័ក ការកំណត់តម្លៃ​សំបុត្រ​របស់ក្រុមហ៊ុនគ្រប់គ្រងអាកាសយានដ្ឋានអន្តរជាតិសៀមរាបអង្គរ មិនថ្លៃនោះទេបើធ្វើដំណើរជាក្រុម ពីអាកាសយានដ្ឋាន​អន្តរជាតិសៀមរាបអង្គរ ទៅទីរួមខេត្តសៀមរាប ដែលមាន​ចម្ងាយ​ជាង ៤០គីឡូម៉ែត្រ។ ប៉ុន្តែប្រសិនបើធ្វើដំណើរ​តែម្នាក់ឯង អាចថាថ្លៃ។

លោក បានគូសបញ្ជាក់ទៀតថា ការកំណត់តម្លៃនេះ គឺជាយន្តការមួយល្អក្នុងការគ្រប់គ្រងតម្លៃ និងភ្ញៀវទេសចរ​កុំឱ្យមានភាពរញ៉េរញ៉ៃ ជាពិសេសរក្សាបាននូវសុវត្ថិភាព និងតម្លៃច្បាស់លាស់។

លោក ស៊ីន ចាន់សេរី​វុត្ថា អ្នកនាំពាក្យអាកាសចរស៊ីវិល មើលឃើញថា តម្លៃសេវាដឹកជញ្ជូនពីព្រលានទៅទីរួមខេត្ត មិនខុសពីប្រទេសជិតខាងប៉ុន្មានទេ ទាំងចម្ងាយ និងតម្លៃ។ លោកបានគូសបញ្ជាក់ថា ប្រសិនបើមានសេវាដឹក​ជញ្ជូនតាមរថយន្តក្រុងរបស់រដ្ឋពីព្រលានចេញទៅគោលដៅផ្សេងៗ អាចនឹងមានតម្លៃធូរថ្លៃ។ បើតាមលោក ស៊ីន ចាន់សេរីវុត្ថា ការវិនិយោគរបស់វិស័យឯកជន ទាមទារមកវិញនូវប្រាក់ចំណេញទៅលើការចំណាយរបស់ក្រុមហ៊ុន។

យោងតាមសេចក្តីជូនដំណឹងរបស់ក្រុមហ៊ុន​អង្គរ អ៊ិនធើណេស៊ិនណល អ៊ែផត អ៊ិនវេសម៉ិន ដែលវិនិយោគ​លើព្រលាន​យន្តហោះអន្តរជាតិសៀមរាបអង្គរ បានបង្ហាញពីសេវាដឹកជញ្ជូនភ្ញៀវតាមឡានក្រុងពីព្រលាន ទៅកាន់ទីរួមខេត្តសៀមរាប សំបុត្រមានតម្លៃ ៨ដុល្លារ ក្នុងមួយជើង និង ១៥ដុល្លារ ទៅវិញទៅមក។ បើតាមក្រុមហ៊ុនបានបញ្ជាក់ថា ដើម្បីធានាការ​ធ្វើដំណើររបស់ភ្ញៀវទេសចរ ក្នុងគោលបំណងបំពេញតម្រូវការសម្បូរបែបរបស់អ្នកដំណើរ អាកាសយានដ្ឋានអន្តរជាតិ​សៀមរាបអង្គរ បានផ្ទេរសិទ្ធិឱ្យ Tourist Transport Association for Siem Reap Internationanl Airport (TTA) ធ្វើប្រតិបត្តិការសេវាតាក់ស៊ី។

TTA នឹងបញ្ជូនរថយន្តធុនតូចចំនួន ២៦១គ្រឿង (តិចជាង ៧កៅអី) និងឡានក្រុងតូច៦៩គ្រឿង(មាន៨កៅអី ដល់ ១៥កៅអី) ដើម្បីបំពេញតម្រូវការអ្នកដំណើរ។ សម្រាប់ស្តង់ដារការគិតប្រាក់សេវាតាក់ស៊ី គឺរថយន្តធុនតូចតម្លៃ ៣៥ដុល្លារ​មួយជើង និងឡានក្រុងតូច តម្លៃ ៤០ដុល្លារ ក្នុងមួយជើង។

លោក តុប សុភ័ក មើលឃើញថា អាកាសយានដ្ឋានថ្មីនេះ គឺជាសមិទ្ធផលមួយដ៏សំខាន់ ក្នុងការទ្រទ្រង់ដល់វិស័យ​ទេសចរណ៍ នឹងអាចទាក់ទាញបាននូវការតភ្ជាប់ជើងហោះហើរ ពីតំបន់ផ្សេងៗមកកាន់កម្ពុជា មិនត្រឹមតែខេត្តសៀមរាប​ប៉ុណ្ណោះទេ គឺកម្ពុជាទាំងមូល។ លើសពីនេះទៀត នឹងផ្តល់ផលចំណេញជាច្រើនដល់សេដ្ឋកិច្ចមូលដ្ឋាន បង្កើតឱកាស​ការងារ និងប្រាក់ចំណូលដល់ពលរដ្ឋ ទាក់ទាញអ្នកវិនិយោគជំរុញសេដ្ឋកិច្ចពាណិជ្ជកម្ម ជាដើម។

សូមបញ្ជាក់ថា អាកាសយានដ្ឋានអន្តរជាតិសៀមរាបអង្គរ តម្លៃជាង ១.១០០លានដុល្លារ បានដាក់ឱ្យដំណើរការជាផ្លូវការ នៅថ្ងៃទី ១៦ ខែ តុលា ឆ្នាំ ២០២៣។ អាកាសយានដ្ឋានអន្តរជាតិសៀមរាបអង្គរ មានចំណតសម្រាប់ចតចំនួន ៣៨ ចំណត មានសមត្ថភាពទទួលអ្នកដំណើរ​តាមផ្លូវអាកាសបាន ៧លាននាក់ ក្នុងឆ្នាំ២០២៤ និង១២ លាននាក់ក្នុងឆ្នាំ​២០៤០ខាងមុខ។ អាកាសយានដ្ឋាននេះ ក៏មានសមត្ថភាពផ្ទុកទំនិញ​តាមផ្លូវ​អាកាសបានចំនួន​១០,០០០តោន ក្នុងឆ្នាំ២០២៤ និង ២៦,០០០ តោនក្នុងឆ្នាំ២០៤០​ខាងមុខ និងអាចទទួល​ជើងហោះ​ហើរបានចំនួន ៦៥,៨០០ជើង​ក្នុងឆ្នាំ២០២៤ និង១១២,៧០០ ជើង ក្នុងឆ្នាំ ២០៤០៕