អាមេរិក ដាច់ចិត្តសារភាពថា ខ្លួនពិតជាបង្ហោះដ្រូន លើតំបន់ ហ្គាហ្សា មែន

សហរដ្ឋអាមេរិក​បាន​បញ្ជាក់​ជា​លើក​ដំបូង​ថា ​ខ្លួនពិតជាបង្ហោះ​ដ្រូន​ស៊ើបការណ៍​ នៅ​លើ​តំបន់​ហ្គាហ្សាមែន ប៉ុន្តែដ្រូននោះគ្មានបំពាក់អាវុធឡើយ។

អ្នកនាំពាក្យមន្ទីរបញ្ចកោណ លោក Pat Ryder និយាយថា ដ្រូនកំពុងធ្វើប្រតិបត្តិការ ដើម្បីគាំទ្រដល់កិច្ចខិតខំប្រឹងប្រែងជួយសង្គ្រោះចំណាប់ខ្មាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបាននិយាយក្នុងសេចក្តីថ្លែងការណ៍ខ្លីមួយថា ការបង្ហោះដ្រូនទាំងនេះ បានចាប់ផ្តើមបន្ទាប់ពីក្រុមហាម៉ាស បើកការវាយប្រហារលើប្រទេសអ៊ីស្រាអែល កាលពីថ្ងៃទី៧ខែតុលា។

ការ​សារភាពនេះ​កើតឡើង ​បន្ទាប់​ពី​អ្នក​យក​ព័ត៌មាន ​ប្រទះ​ឃើញដ្រូន MQ-9 Reaper នៅ​លើ​គេហទំព័រ​តាមដាន​ការ​ហោះហើរ Flightradar24។

ពីមុន អាមេរិក បានដាក់ពង្រាយដ្រូន Reaper ដើម្បីធ្វើការវាយប្រហារតាមអាកាស ក្នុងប្រទេសអាហ្វហ្គានីស្ថាន ប៉ុន្តែតាមពិតទៅ ដ្រូនប្រភេទនេះត្រូវបានគេប្រើជាចម្បងដើម្បីឈ្លបយកការណ៍ទេ ដោយសារតែសមត្ថភាពរបស់វាក្នុងការហោះក្រវែលលើតំបន់មួយ បានរយៈពេលជាង២០ម៉ោង។

ដោយឡែក មន្ត្រីយោធាអាមេរិកដែលសុំមិនបញ្ចេញឈ្មោះបានប្រាប់កាសែត New York Times ថា ដ្រូននេះ មិនបានជួយសម្រួលដល់សកម្មភាពយោធាអ៊ីស្រាអែលនៅក្នុងនិងជុំវិញតំបន់ហ្គាហ្សាឡើយ ពោលវាគ្រាន់តែបញ្ជូនព័ត៌មានទាក់ទងនឹងការសង្គ្រោះចំណាប់ខ្មាំង ទៅឲ្យអ៊ីស្រាអែលប៉ុណ្ណោះ៕

ប្រែសម្រួល៖ Vann Vann

ប្រភព៖ BBC

ចុចអាន៖ លោក Netanyahu ប្រកាសថា គ្មានអ្វីអាចបញ្ឈប់កងទ័ពអ៊ីស្រាអែល បានឡើយ