លោក Netanyahu ប្រកាសថា គ្មានអ្វីអាចបញ្ឈប់កងទ័ពអ៊ីស្រាអែល បានឡើយ

នៅក្នុងការបង្ហោះលើបណ្តាញសង្គម X, នាយករដ្ឋមន្ត្រីអ៊ីស្រាអែល លោក Benjamin Netanyahu និយាយថា “គ្មានអ្វីអាចបញ្ឈប់យើងបានឡើយ យើងនឹងសម្រុកទៅមុខ។ យើងនឹងឆ្ពោះទៅមុខ ហើយទទួលជ័យជម្នះ។ យើងនឹងធ្វើវាដោយមានព្រះជួយ និងដោយមានជំនួយពីអ្នកចម្បាំងដ៏វីរភាពរបស់យើង”។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានអះអាងបែបនេះ ខណៈកងទ័ពអ៊ីស្រាអែល បានប្រកាសពីការឡោមព័ទ្ធទីក្រុង ហ្គាហ្សា ទាំងស្រុងកាលពីថ្ងៃទី៣ខែវិច្ឆិកា។

នៅក្នុងសេចក្តីថ្លែងការណ៍មួយ អ្នកនាំពាក្យកងកម្លាំងការពារជាតិអ៊ីស្រាអែល លោក Daniel Hagari បញ្ជាក់ថា កងកម្លាំងរបស់ខ្លួន បាននិងកំពុងវាយលុកបន្ទាយ ទីស្នាក់ការ និងហេដ្ឋារចនាសម្ព័ន្ធផ្សេងទៀតដែលកំពុងប្រើប្រាស់ដោយក្រុមហាម៉ាស់។

ទន្ទឹមនោះ ក្រសួងសុខាភិបាលនៅហ្គាហ្សា ក៏បានអះអាងផងដែរថា តួលេខជនជាតិប៉ាឡេស្ទីន ដែលត្រូវបានសម្លាប់ដោយការវាយប្រហាររបស់អ៊ីស្រាអែលនៅតំបន់ហ្គាហ្សា ឥឡូវនេះបានកើនដល់ជិត ១ម៉ឺននាក់ហើយ ចាប់តាំងពីការផ្ទុះសង្គ្រាមរវាងអ៊ីស្រាអែលនិងក្រុមហាម៉ាស់។

អ្នកនាំពាក្យក្រសួងលោក Ashraf al-Qedra បាននិយាយក្នុងសន្និសីទសារព័ត៌មានមួយថា ចំនួនអ្នកស្លាប់បានកើនឡើងដល់ ៩០៦១ នាក់ ក្នុងនោះមានកុមារ ៣,៧៦០ នាក់ និងស្ត្រី ២,៣២៦ នាក់ ខណៈចំនួនអ្នករបួសកើនលើស ៣២០០០ នាក់។ លោកបន្តថា កងកម្លាំងអ៊ីស្រាអែល បានបើកការវាយប្រហារចំនួន ១៥ ដងក្នុងរយៈពេល ២៤ ម៉ោងចុងក្រោយ ដោយបានសម្លាប់មនុស្ស ២៥៦ នាក់ និងរាប់រយនាក់ទៀតត្រូវរបួស៕

ប្រែសម្រួល៖ Vann Vann

ប្រភព៖ Middle East Eye

ចុចអាន៖ កងទ័ពអ៊ីស្រាអែល ឡោមព័ទ្ធទីក្រុង ហ្គាហ្សា បានទាំងស្រុងហើយ