លោក សេង ម៉ៅ ៖ ទោះអាយុជិត ៤០ ឆ្នាំ ក៏នៅសង្វាតជំនាញបច្ចេកទេស ព្រោះចង់បើករបរឯស្រុកកំណើត

លោក សេង ម៉ៅ អាយុ៣៨ឆ្នាំ ជាសិក្ខាកាមកំពុងសិក្សាជំនាញជួសជុលរថយន្តនៅវិទ្យាស្ថានបច្ចេកទេសឧស្សាហកម្មនៃក្រសួងការងារ និងបណ្តុះបណ្តាលវិជ្ជាជីវៈ។ បើទោះបីមានអាយុជិត៤០ឆ្នាំក៏ដោយ ក៏សិក្ខាកាមមកពីខេត្តបាត់ដំបងរូបនេះ នៅតែសង្វាតជំនាញបច្ចេកទេសដើម្បីបើកអាជីវកម្មផ្ទាល់ខ្លួនដែរ។

លោកថា «បន្ទាប់ពីបញ្ចប់ការរៀនជំនាញវិជ្ជាជីវៈ និងបច្ចេកទេស រយៈពេល៤ខែ នៅទីនេះ ខ្ញុំរំពឹងថា អាចមានសមត្ថភាពសមរម្យក្នុងការបើកកន្លែងរកស៊ីបានដោយខ្លួនឯង ត្បិតរូបលោកក៏ធ្លាប់ស្គាល់ខ្លះៗរួចមកហើយដែរជំនាញប្រភេទនេះកន្លងមក»។

លោកអំពាវនាវឱ្យយុវជនទាំងអស់ គួរមកចុះឈ្មោះចូលរៀនជំនាញវិជ្ជាជីវៈនេះឱ្យបានគ្រប់គ្នា ដើម្បីធានាថាខ្លួនឯងមានជំនាញមួយច្បាស់លាស់ មានការងារធ្វើគ្រប់គ្នាៗ នាពេលអនាគត និងអាចស្រោចស្រង់ជីវភាពគ្រួសារបាន។ កាលណាមានជំនាញមួយច្បាស់លាស់ក្នុងខ្លួន នោះវាមិនធ្វើឱ្យយើងគ្មានការងារធ្វើនោះទេ។

លោកមើលឃើញថា កម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស១,៥ លាននាក់ ទៅដល់យុវជនមកពីគ្រួសារក្រីក្រ និងគ្រួសារងាយរងហានិភ័យនេះ គឺជាការផ្តួចផ្តើមមួយល្អណាស់សម្រាប់យុវជនក្រីក្រ និងយុវជនទូទៅ ពីព្រោះវាអាចកែប្រែអនាគតរបស់យុវជនពីគ្មានជំនាញ មកមានជំនាញ និងពីការបោះបង់ការសិក្សាមកត្រលប់ចូលសាលាបណ្តុះបណ្តាលវិញ។

គួរបញ្ជាក់ផងដែរថា ការបណ្តុះបណ្តាលជំនាញវិជ្ជាជីវៈ និងបច្ចេកទេសទៅដល់យុវជនមកពីគ្រួសារក្រីក្រ និងគ្រួសារងាយរងហានិភ័យ១,៥ លាននាក់ ដែលត្រូវបានដាក់ឱ្យប្រើប្រាស់ កាលពីថ្ងៃទី១៤ ខែវិច្ឆិកា ឆ្នាំ២០២៤ បានបោះជំហានទៅមួយកម្រិតទៀតហើយ ដែលកាលពីថ្ងៃទី១៥ មករា ឆ្នាំ២០២៤ កន្លងទៅ លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានប្រកាសបើកជាផ្លូវការកម្មវិធីបណ្តុះបណ្តាលជំនាញវិជ្ជាជីវៈវគ្គដំបូង៕