រុស្ស៊ី​​ប្រារព្វខួប​ជ័យជម្នះ​ ដោយ​គ្មានផល​រំខាន​ពីអ៊ុយក្រែន ប៉ុន្តែ​វត្តមាន​មេដឹកនាំ​ពិភពលោក​តិចតួច​ចូលរួម​ក្នុងឆ្នាំនេះ​​

ក្បួន​​ដង្ហែរ​ព្យុហ​​​យាត្រា​យោធា​ដ៏​ធំ​មួយដើម្បីរំលឹកខួបលើកទី ៨១​ឆ្នាំ​ នៃជ័យជម្នះរបស់សហភាពសូវៀតលើ​កង​​ទ័ព​ណាស៊ីអាល្លឺម៉ង់ក្នុងសង្គ្រាម​លោក​លើក​ទី​២ កាលឆ្នាំ​​១៩៤៥ បានធ្វើឡើងនៅទីក្រុងមូស្គូ​ ដូច​ការ​គ្រោង​ទុក​ ដោយ​មិន​មាន​សេចក្តី​រាយការ​ណ៍​ពី​ការ​​រំខាន​ពីភាគី​អ៊ុយក្រែន​ ស្តិត​ក្រោម​​បទ​ឈប់បាញ់​​​ជាឯកតោភាគី​របស់រុស៊ី​។

ស្ថិត​ក្រោ​ម​បទ​ឈប់បាញ់​ជា​ឯកតោភាគី​​ដែល​ប្រកា​ស​ដោយ​​ប្រធានាធិបតី​រុស្ស៊ី លោគ​ វ៉្លាឌីមៀរ ពូទីន​​ ដោយ​មាន​វត្តមាន​​ អតីតយុទ្ធជន​​​ជាច្រើន​ ភ្ញៀវ និងមេដឹកនាំបរទេសបានមើលក្បួនដង្ហែរពី​​​​វេទិកា​​ត្រួតពិនិត្យកណ្តាលនៅលើទីលានក្រហម​ក្នុង​ទីក្រុង​មូស្គូ​។

​ការ​រៀបចំ​​​​​​ក្បួនព្យុហយាត្រា​យោធា​​​ឆ្នាំ​នេះ​របស់​រុស្ស៊ី ហាក់​មិន​សូវ​អ៊ឹក​ធឹក​ ដូច​​ការ​ហែរ​ក្បួន​កាល​​រំឭកខួប​ទី​​៨០​ឆ្នាំ​កាល​ឆ្នាំ​មុន​នោះទេ ដោយសារ​តែ​​វត្តមាន​មេដឹកនាំ​ពិភពលោក តិច​តួច​ប៉ុណ្ណោះ​នោះឆ្នាំនេះ ខណៈកាល​ពីឆ្នាំ​មុន វត្តមាន​មេដឹកនាំ​ចិន លោក ស៊ី ជីនពីង មេដឹកនាំ​កូរ៉េខាងជើង​ និង មេដឹកនាំ ជាច្រើន​ទៀត​។

​​សម្រាប់​ការប្រារព្ធទិវាជ័យជំនះនៅទីក្រុងមូស្គូ​​នៅ​ឆ្នាំ​នេះ​វិញ មានការចូលរួមពីមេដឹកនាំនៃរដ្ឋបរទេស ក្នុងនោះរួមមាននាយករដ្ឋមន្ត្រីស្លូវ៉ាគី លោក Robert Fico ប្រធានាធិបតីបេឡារុស លោក Alexander Lukashenko ប្រធានាធិបតីឡាវ លោក Thongloun Sisoulith មហាក្សត្រ​ម៉ាឡេស៊ី Sultan Ibrahim ប្រធានាធិបតីកាហ្សាក់ស្ថាន លោក Kassym-Jomart Tokayev និងប្រធានាធិបតីអ៊ូសបេគីស្ថាន លោក Shavkat Mirziyoyev។

រដ្ឋមន្ត្រីក្រសួងការពារជាតិរុស្ស៊ី​ លោក​ Andrey Belousov បានត្រួតពិនិត្យក្បួនដង្ហែរ ដែលត្រូវបានបញ្ជាដោយអគ្គមេបញ្ជាការកងទ័ពជើងគោក វីរបុរសនៃប្រទេសរុស្ស៊ី ឧត្តមសេនីយ៍ឯក Andrey Mordvichev។

​​សារ​ព័ត៌មាន​​​​រុស្ស៊ី TASS បានរំលេច​ថា ​ឆ្នាំ​នេះ​​ជាលើកដំបូង ដែល​ក្រុមយោធាមកពីកូរ៉េខាងជើងបានចូលរួមក្នុងក្បួនដង្ហែយោធានៅលើទីលានក្រហមនៃទីក្រុងមូស្គូ។

​មេដឹកនាំ​រុស្ស៊ី បាន​​ប្រកាស​បទ​ឈប់បាញ់​ជាមួយ​​អ៊ុយក្រែន​​ចន្លោះថ្ងៃទី​​៨ និង​ថ្ងៃ​ទី​៩​ខែ​ឧសភា​ដើម្បី​​យក​ពេលប្រារព្វ​​​ទិវា​​ជ័យជម្នះ​នេះ ចំណែក​​ឯអ៊ុយក្រែន​វិញ​ ក៏បាន​ប្រកាស​​បទ​ឈប់បាញ់​ដូចគ្នា ប៉ុន្តែ​​នៅមុន​ពេល​វេលា​កំណត់ដោយរុស្ស៊ី​ ហើយ ក្រោយ​ការ​ប្រកាស​នេះ ប្រធានាធិបតី​​អ៊ុយក្រែន លោក វ៉ូឡូឌីមៀរ ហ្សេលេនស្គី បាន​​អះអា​ងថា រុស្ស៊ី​ បាន​រំលោភ​បទ​ឈប់បាញ់​ដែលអ៊ុយក្រែន​ដាក់​ចេញ​ជិត​២០០០​លើក។

​​ក្នុងភាព​មិនចាញ់មិនឈ្នះ​រវា​ង​រស្ស៊ី​និង​អ៊ុយក្រែន​នេះ ប្រធានាធិបតីសហរដ្ឋអាមេរិក លោក ដូណាល់ ត្រាំ បាន​​​បង្ហោះសារ​ថា រុស្ស៊ី​​និង​អ៊ុយក្រែន​យល់​ព្រម​លើ​​​បទ​ឈប់បាញ់​រយៈពេល​៣ថ្ងៃ​ គឺ​ចាប់ពីថ្ងៃ​ទី​៨ដល់​ថ្ងៃទី​១០ខែ​ឧសភា​​ដែល​លោក ចាត់ទុក​ថា ជា​​​ការ​ចាប់ផ្តើម​ដ៏សំខាន់​សម្រាប់​​ដំណើរការ​ចរចា​សន្តិភាព​៕

រ៉ាន់ រើយ​