ព័ត៌មានអន្ដរជាតិ

ពូនទីន ថា សង្គ្រាមរុស្ស៊ី-អ៊ុយក្រែន ជិតដល់ទីបញ្ចប់ហើយ

បានផុស

១ ខែ មុន

នៅ

ថ្ងៃអាទិត្យ ១០ ឧសភា ២០២៦

ដោយ

ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានលើកឡើងថា សង្គ្រាមរបស់ប្រទេសលោក លើប្រទេសអ៊ុយក្រែន អាចនឹង «ឈានដល់ទីបញ្ចប់» ហើយបានសម្តែងឆន្ទៈក្នុងការជួបជាមួយសមភាគីអ៊ុយក្រែន លោក វ៉ូឡូឌីមៀរ ហ្សេលេនស្គី នៅក្នុងប្រទេសទីបី ប្រសិនបើកិច្ចព្រមព្រៀងសន្តិភាពត្រូវបានបញ្ចប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងដូចនេះរបស់ លោក ពូទីន កើតឡើងពេលធ្វើអត្ថាធិប្បាយទៅកាន់អ្នកយកព័ត៌មាននៅថ្ងៃសៅរ៍ ប៉ុន្មានម៉ោងបន្ទាប់ពីសន្យាជ័យជម្នះនៅអ៊ុយក្រែន នៅក្នុងក្បួនដង្ហែរទិវាជ័យជម្នះដែលមានការរឹតបន្តឹងសន្តិសុខខ្លាំងបំផុតរបស់រុស្ស៊ីក្នុងរយៈពេលជាច្រើនឆ្នាំ ចាប់តាំងពីសង្គ្រាមផ្ទុះឡើងជាមួយអ៊ុយក្រែនកាលដើមឆ្នាំ២០២២។

យោងតាម Al Jazeera ការធ្វើអត្ថាធិប្បាយរបស់លោក ពូទីន ក៏កើតមានស្របពេលដែលរុស្ស៊ី និងអ៊ុយក្រែនបានចាប់ផ្តើមបទឈប់បាញ់រយៈពេលបីថ្ងៃ និងបានយល់ព្រមផ្លាស់ប្តូរអ្នកទោសចំនួន ១០០០នាក់ ដែលជាការវិវឌ្ឍដែលបង្កើនក្តីសង្ឃឹមដោយប្រុងប្រយ័ត្នចំពោះវឌ្ឍនភាពការទូតឡើងវិញ។

នៅក្នុងក្បួនដង្ហែរព្យុហយាត្រាយោធានៅទីក្រុងមូស្គូ លោក ពូទីន បានចាត់ទុកកងកម្លាំងប្រុយុទ្ធនៅប្រទេសអ៊ុយក្រែនជាទ័ពប្រដាប់អាវុធឈ្លានពានដែលគាំទ្រដោយប្លុកណាតូ។ ទោះបីជាបែបណា ក្នុងពេលកន្លងមកអង្គការណាតូមិនបានចូលប្រយុទ្ធដោយផ្ទាល់ជាមួយរុស្ស៊ីទេ គឺគ្រាន់តែជួយជ្រុមជ្រែងអ៊ុយក្រែនសម្រាប់ការប្រយុទ្ធការពារខ្លួនប៉ុណ្ណោះ។

តាមការដកស្រង់សម្តីផ្ទាល់ដោយ Al Jazeera លោក ពូទីន បញ្ជាក់ថា៖«ជ័យជម្នះតែងតែមាន ហើយនឹងជារបស់យើង»។

ថ្លែងទៅកាន់អ្នកយកព័ត៌មានបន្ទាប់ពីនោះ លោកពូទីន បានស្តីបន្ទោស «ឥស្សរជនសកលនិយម» លោកខាងលិចចំពោះសង្គ្រាមនេះ ដោយនិយាយថាពួកគេបានសន្យាថាអង្គការណាតូនឹងមិនពង្រីកខ្លួនទៅទិសខាងកើត បន្ទាប់ពីការដួលរលំនៃជញ្ជាំងប៊ែរឡាំងឆ្នាំ១៩៨៩ទេ ប៉ុន្តែបន្ទាប់មកបានព្យាយាមទាញអ៊ុយក្រែនចូលទៅក្នុងគន្លងរបស់សហភាពអឺរ៉ុប។

បន្ទាប់មកលោកបានប្រកាសថា «ខ្ញុំគិតថាបញ្ហានេះកំពុងឈានដល់ទីបញ្ចប់ហើយ»។

ទិវាឈប់សម្រាកប្រចាំឆ្នាំរបស់រុស្ស៊ីគឺជាថ្ងៃនៃការបរាជ័យរបស់សហភាពសូវៀតលើណាស៊ីអាល្លឺម៉ង់ក្នុងសង្គ្រាមលោកលើកទី ២ និងជាកិត្តិយសដល់ពលរដ្ឋសហភាពសូវៀតចំនួន ២៧លាននាក់ដែលបានស្លាប់នៅក្នុងជម្លោះនាពេលនោះ។

តាមការកត់សម្គាល់របស់បណ្តាញរាយការណ៍អន្តរជាតិ ក្បួនដង្ហែរក្នុងទិវាជ័យជម្នះក្នុងនៅឆ្នាំនេះមានភាពស្ងប់ស្ងាត់ជាងឆ្នាំកន្លងៗមក ជាមួយនឹងវីដេអូនៃគ្រឿងបរិក្ខារយោធាដែលត្រូវបានបង្ហាញនៅលើអេក្រង់យក្សជាជាងរថក្រោះ និងប្រព័ន្ធមីស៊ីលដែលរំកិលឆ្លងកាត់ទីលានក្រហម។

ជាលើកដំបូង ក្បួនដង្ហែរនៅថ្ងៃសៅរ៍បានបង្ហាញកងទ័ពមកពីកូរ៉េខាងជើង ដែលជាការគោរពដល់ទីក្រុងព្យុងយ៉ាងដែលបានបញ្ជូនទាហានរបស់ខ្លួនទៅប្រយុទ្ធជាមួយកងកម្លាំងរបស់ទីក្រុងមូស្គូដើម្បីទប់ទល់នឹងការឈ្លានពានរបស់អ៊ុយក្រែនចូលទៅក្នុងតំបន់ Kursk របស់រុស្ស៊ី៕

ប្រែសម្រួល៖ រ៉ាន់ រើយ

សេចក្ដីជូនដំណឹង៥ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា