​សមាគមស្វាយចន្ទី​​ទម្លាក់ការព្យាករណ៍​ទិន្នផល ១០% ​ដោយសារអាកាសធាតុ​

សមាគមស្វាយចន្ទីកម្ពុជានៅថ្ងៃទី ១២ ខែកុម្ភៈ ឆ្នាំ ២០២៤នេះ បានទម្លាក់ការព្យាករណ៍ទិន្នផលស្វាយចន្ទីនៅឆ្នាំ ២០២៤ ធ្លាក់ចុះ ១០% ឬលើសនេះ បើធៀបនឹងឆ្នាំ ២០២៣។

​លោក អួន ស៊ីឡុត ប្រធាន​សមាគមស្វាយចន្ទីកម្ពុជា មានប្រសាសន៍ថា​ សមាគមស្វាយចន្ទី​ទម្លាក់​ការព្យា​ករណ៍ ទិន្នផល ១០ ភាគរយ ឬលើសនេះ ដោយសារតែបាតុភូតអែលនីញ៉ូ ធ្វើឱ្យប៉ះពាល់ដល់ដំណាំស្វាយចន្ទី ដែលធ្វើឱ្យគាំងក្ដឹប និងខូចផ្កា ​និងការកកតើសត្វល្អិតបំផ្លាញច្រើន។

លោកបន្តថា រហូតមកដល់ពេលនេះ តំបន់មួយចំនួនមិនទទួលបានភ្លៀងកក់ខែសោះ ហើយកម្ដៅក៏ឡើងខ្លាំងពេលខ្លះជាង ៣៨ អង្សាឡើង ដែលធ្វើឱ្យផ្កាស្វាយចន្ទីមិនអាចចេញក្ដឹបបាននោះទេ។

យោងតាមរបាយការណ៍សមាគមស្វាយចន្ទីកម្ពុជា នៅឆ្នាំ ២០២៣ កម្ពុជាសម្រេចបាននូវការនាំចេញគ្រាប់ស្វាយចន្ទីឆៅទៅទីផ្សារ​អន្តជាតិចំនួន ៦៥ ម៉ឺន ៦ ពាន់តោន ថយចុះ ៧.៦% គិតជាទឹកប្រាក់ចំនួន ៨៣៧ លានដុល្លារ បើប្រៀបធៀបឆ្នាំ ២០២២។

​ការនាំចេញស្វាយចន្ទីរមានការធ្លាក់ចុះ ដោយសារការប្រែប្រួលអាកាសធាតុ ធ្វើឱ្យកសិករកាប់ស្វាយចន្ទី​ចោលកន្លងមក រយៈពេល ៣ ឆ្នាំចុងក្រោយ សមាគមរកឃើញស្វាយចន្ទីតែ ៧០ ម៉ឺនហិកតា ខណៈដំណាំដែលឱ្យផលមានតែ ៦៤ ម៉ឺនហិកតា ហើយដំណាំដែលដាំថ្មីមាន ៦ ម៉ឺនហិកតា ដូច្នេះធ្វើឱ្យទិន្នផលស្វាយចន្ទីធ្លាក់ចុះ៕

អត្ថបទ៖ ឡេង ដេត