ព័ត៌មានជាតិ

៨៣ ភូមិទៀតនឹងទទួលបានអគ្កីសនីប្រើប្រាស់ពីបណ្តាញជាតិនៅឆ្នាំ ២០២៤

បានផុស

២ years មុន

នៅ

ថ្ងៃពុធ ៦ មីនា ២០២៤

ដោយ

អាជ្ញាធរអគ្គិសនីកម្ពុជានិងអគ្គិសនីកម្ពុជា បានធ្វើការសិក្សារួមគ្នាអំពីលទ្ធភាពពង្រីកការផ្គត់ផ្គង់អគ្គិសនីទៅកាន់ភូមិដែលពុំទាន់មានអគ្គិសនីប្រើប្រាស់ទាំងក្នុងក្របខណ្ឌនៃលទ្ធភាពរបស់អគ្គិសនីកម្ពុជា និងទាំងរបស់សេវាករឯកជន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសន្និបាតបូកសរុបការងារឆ្នាំ ២០២៣ និងលើកទិសដៅការងារឆ្នាំ ២០២៤ កាលពីថ្ងៃទី១៥ ខែកុម្ភៈ ឆ្នាំ២០២៤ អគ្គិសនីកម្ពុជាបានឲ្យដឹងថា បច្ចុប្បន្នមានភូមិទូទាំងប្រទេសដែលពុំទាន់មានការផ្គត់ផ្គង់អគ្គិសនីចំនួន ១៦០ ភូមិ ដែលក្នុងនោះមានភូមិ ១៤៣ ស្ថិតក្នុងដែនអាជ្ញាបណ្ណដែលបានផ្តល់ឱ្យទៅអ្នកចែកចាយរួចហើយ និងភូមិ ១៧ ស្ថិតនៅក្រៅដែនអាជ្ញាបណ្ណ។

ផ្អែកតាមការសិក្សា ក្នុងឆ្នាំ២០២៤ ទាំងអគ្គិសនីកម្ពុជា និងទាំងសេវាករឯកជន អាចមានលទ្ធភាពពង្រីកការផ្គត់ផ្គង់អគ្គិសនីពីបណ្តាញជាតិទៅកាន់ភូមិចំនួន ៨៣ ភូមិទៀត ដូច្នេះនៅក្រោយឆ្នាំ២០២៤ នៅសល់ភូមិចំនួន ៧៧ ទៀត ត្រូវជា ០.៥៤% ដែលពុំមានការផ្គត់ផ្គង់ពីបណ្តាញជាតិ។

ក្រសួងរ៉ែ និងថាមពល អាជ្ញាធរអគ្គិសនីកម្ពុជា និងអគ្គិសនីកម្ពុជា ក៏បានរួមគ្នាពិនិត្យលទ្ធភាពរកដំណោះស្រាយផ្សេងៗជូនភូមិដែលនៅសល់ទាំង ៧៧ តាមស្ថានភាពជាក់ស្តែងនៃភូមិនីមួយៗ តាមរយៈការផ្គត់ផ្គង់អគ្គិសនីពីប្រភពពន្លឺព្រះអាទិត្យប្រព័ន្ធទោល ដែលអាចជាប្រភពទុនរបស់អគ្គិសនីកម្ពុជា ពីស្ថាប័នហិរញ្ញវត្ថុអន្តរជាតិនានា ពីការវិនិយោគរបស់ក្រុមហ៊ុនឯកជន។

គិតមកត្រឹមចុងឆ្នាំ២០២៣ ព្រំដែននៃអាជ្ញាបណ្ណដែលបានផ្តល់ឱ្យអ្នកកាន់អាជ្ញាបណ្ណចែកចាយធ្វើការវិនិយោគអភិវឌ្ឍបណ្តាញចែកចាយអគ្គិសនី ទាំងរដ្ឋ និងទាំងឯកជន មានចំនួន ៩៩.៨៨% នៃចំនួនភូមិទូទាំងប្រទេស។ ក្នុងឆ្នាំ២០២៣នេះ ការសាងសង់បណ្តាញចែកចាយអគ្គិសនីបន្ថែមធ្វើបាន ០.៦០% នៃចំនួនភូមិថែមទៀត ធ្វើឱ្យភូមិដែលមានបណ្តាញចែកចាយរួចបានកើនឡើងពី ៩៨.២៧% នៅចុងឆ្នាំ២០២២ មក ៩៨.៨៧% នៅចុងឆ្នាំ២០២៣។

ការភ្ជាប់បណ្តាញអគ្គិសនីឱ្យអ្នកប្រើប្រាស់អគ្គិសនីគ្រប់ប្រភេទនៅកម្ពុជា បានកើនឡើងពី ៣,៥៣៣,៩៣៥ ទីតាំង នៅចុងឆ្នាំ២០២២ មក ៣,៧០៥,៥០៧ ទីតាំង នៅចុង ឆ្នាំ២០២៣។ តាមស្ថិតិនេះ នៅចុងឆ្នាំ២០២៣ លំនៅឋានដែលបានភ្ជាប់ចរន្តអគ្គិសនីរួចមានចំនួន ៣,៤៥៩,៣៧២ ស្មើនឹង ៩៤.០២% នៃលំនៅឋានសរុប៕