ព័ត៌មានអន្ដរជាតិ

តៃវ៉ាន់ ថា សមយុទ្ធ “ទណ្ឌកម្ម” របស់ចិន ជាការបង្ករឿងមិនសមទំនង

បានផុស

២ years មុន

នៅ

ថ្ងៃព្រហស្បតិ៍ ២៣ ឧសភា ២០២៤

ដោយ

Chheang

ត្រឹមរយៈពេល៣ថ្ងៃប៉ុណ្ណោះក្រោយតៃវ៉ាន់ប្រកាសពីវត្តមានប្រធានាធិបតីថ្មី ស្រាប់តែមហាយក្សចិនបានរៀបចំសមយុទ្ធ “ទណ្ឌកម្ម” ខ្នាតធំ ព្រមានចំៗលើរដ្ឋាភិបាលក្រុងតៃប៉ិ។ តៃវ៉ាន់ បានធ្វើការថ្កោលទោសសមយុទ្ធយោធារបស់ក្រុងប៉េកាំង ហើយចាត់ទុកទង្វើនេះថាជា “ការបង្កហេតុមិនសមទំនង” ទាល់តែសោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងការពារជាតិតៃវ៉ាន៉ បានប្រកាសនៅថ្ងៃទី២៣ ខែឧសភា នេះថា ខ្លួនបានបញ្ជូនកងកម្លាំងទៅតំបន់ជុំវិញដែនកោះរួចហើយ ព្រមទាំងអះអាងថា ខ្លួនមានទំនុកចិត្តអាចការពារអធិបតេយ្យខ្លួនឯងបាន។ ក្រសួងការពារជាតិតៃវ៉ាន់ បានរៀបរាប់ទៀតថា “ការធ្វើសមយុទ្ធយោធារបស់ចិនក្នុងកាលៈទេសៈនេះ មិនត្រឹមតែមិនជួយរួមចំណែកដល់សន្តិភាព និងស្ថិរភាពនៃច្រកសមុទ្រតៃវ៉ាន់ប៉ុណ្ណោះទេ វាថែមទាំងបង្ហាញពីគំនិតយោធានិយមរបស់ចិនផងដែរ”។

មន្ត្រីជាន់ខ្ពស់ម្នាក់នៅតៃវ៉ាន់ បានផ្ដល់បទសម្ភាសន៍តាមរយៈទីភ្នាក់ងារព័ត៌មាន Reuters ថា សមយុទ្ធរបស់ចិនគឺស្ថិតនៅក្នុងសេណារីយ៉ូ ដែលតៃវ៉ាន់ធ្លាប់គិតទុកមុនរួចមកហើយ ដូច្នេះរដ្ឋាភិបាលដែនកោះមួយនេះអាចដឹងច្បាស់ពីរាល់សកម្មភាពរបស់យោធាចិន។

សូមបញ្ជាក់ថា យោធាចិន បានចាប់ផ្ដើមសមយុទ្ធរយៈពេល២ថ្ងៃ នៅជុំវិញតៃវ៉ាន់ ក្រោយដែនកោះនេះទើបរៀបចំប្រារព្ធពិធីស្បថឡើងកាន់តំណែងប្រធានាធិបតីថ្មី កាលពីថ្ងៃទី២០ ខែឧសភាកន្លងទៅ។ ចិនបានហៅសមយុទ្ធនេះថាជា “សមយុទ្ធដាក់ទណ្ឌកម្ម” ហើយចាត់ទុកលោក Lai Ching-te មេដឹកនាំតៃវ៉ាន់ គឺជាជនផ្ដាច់ខ្លួននិយម ដែលតែងតែជំទាស់នឹងសកម្មភាពរបស់ចិន។

សមយុទ្ធរបស់ចិន ធ្វើឡើងចាប់ពីថ្ងៃទី២៣ ដល់ថ្ងៃទី២៤ ខែឧសភានេះ នៅកន្លែងជាច្រើនជុំវិញតៃវ៉ាន់ ដូចជានៅច្រកសមុទ្រតៃវ៉ាន់, ភាគខាងត្បូង និងភាគខាងកើតកោះតៃវ៉ាន់ ព្រមទាំងតំបន់ឡោមព័ទ្ធកោះ Kinmen, កោះ Matsu, កោះ Wuqiu និង កោះ Dongyin ដែលគ្រប់គ្រងដោយតៃវ៉ាន។ កងទ័ពរំដោះប្រជាជនចិន បាននិយាយថា សមយុទ្ធនេះមានទាំងកងទ័ព កងកម្លាំងអាកាស និងកងកម្លាំងរ៉ុក្កែត ហើយផ្ដោតសំខាន់លើការត្បាតត្រៀមប្រយុទ្ធតាមផ្លូវអាកាស ការវាយប្រហារឲ្យចំគោលដៅសំខាន់ៗ ក៏ដូចជាការធ្វើប្រតិបត្តិការទាំងក្នុងនិងក្រៅកោះតៃវ៉ាន់ ដើម្បីសាកល្បង “សមត្ថភាពប្រយុទ្ធពិតៗរួមគ្នា” នៃកងកម្លាំងទាំងអស់របស់ចិន៕

ដោយ៖ ឈាង