ចិន ដកបម្រាមលើការនាំចូលសាច់គោ អូស្ត្រាលី បង្ហាញសញ្ញាផ្សះផ្សារទំនាក់ទំនងឡើងវិញ

ប្រទេសចិនបានលុបចោលការហាមឃាត់ការនាំចូលសាច់គោអូស្ត្រាលីចំនួន ៥ អាជីវកម្មដែលជាសញ្ញាចុងក្រោយនៃការបង្កើតទំនាក់ទំនងឡើងវិញ បន្ទាប់ពីមានទំនាក់ទំនងដ៏តានតឹងជាច្រើនឆ្នាំរវាងទីក្រុងប៉េកាំង និងទីក្រុងកង់បេរ៉ា ។ នេះបើយោងតាមការចេញផ្សាយរបស់សារព័ត៌មាន Al Jazeera នៅថ្ងៃ​៣០ ខែឧសភានេះ ។

យោងតាមរដ្ឋាភិបាលអូស្រ្ដាលីបានឲ្យដឹងថា ប្រទេសចិនបានលុបចោលការផ្អាកអាជីវកម្មកែច្នៃសាច់គោរបស់អូស្ត្រាលីចំនួន ៥ បន្ទាប់ពីអាជ្ញាធរចិននៅឆ្នាំ ២០២០ បានដាក់ការរឹតបន្តឹងលើការនាំចូលរបស់អូស្ត្រាលីមួយចំនួន រួមទាំងធ្យូងថ្ម ស្រា គ្រាប់ធញ្ញជាតិ និងបង្កងថ្ម បន្ទាប់ពីនាយករដ្ឋមន្ត្រីអូស្ត្រាលី Scott Morrison បានអំពាវនាវឲ្យមានការស៊ើបអង្កេតអន្តរជាតិអំពីប្រភពដើមនៃជំងឺរាតត្បាតកូវីដ ១៩ ។

ការរឹតបន្តឹងនេះត្រូវបានប្រទេសអូស្ត្រាលីចាត់ទុកថាជាវិធានការនយោបាយដើម្បីដាក់ទណ្ឌកម្មទីក្រុងកង់បេរ៉ា ប៉ុន្តែការរឹតបន្តឹងជាច្រើនត្រូវបានដកចេញ ចាប់តាំងពីលោក Anthony Albanese ឡើងកាន់តំណែងជានាយករដ្ឋមន្ត្រីនៅឆ្នាំ ២០២២ ។

ចំណាត់ការនេះកើតឡើង បន្ទាប់ពីអាជ្ញាធរចិនកាលពីខែមីនាបានប្រកាសដកពន្ធដ៏ច្រើនលើស្រាអូស្ត្រាលី បន្ទាប់ពីលុបចោលការរឹតបន្តឹងលើការនាំចូលធ្យូងថ្ម ឈើ និងធញ្ញជាតិ ខណៈបង្កង​ថ្ម​អូស្ត្រាលី​គឺ​ជា​ផលិតផល​មួយ​ក្នុង​ចំណោម​ផលិតផល​ចុងក្រោយ​ដែល​នៅ​តែហាមឃាត់ ។

គួរបញ្ជាក់ថា ប្រទេសចិនគឺជាទីផ្សារអន្តរជាតិដ៏ធំបំផុតទី ២ របស់អូស្ត្រាលីក្នុងការនាំចេញសាច់គោកាលពីឆ្នាំមុន ក្នុងនោះតម្លៃនៃការនាំចេញមានប្រហែល ១.៦ ពាន់លានដុល្លារ ៕

អត្ថបទ៖ ប៊ុន សុភាព