សេដ្ឋកិច្ច

វៀតណាមគ្រោងដំឡើងពន្ធលើគ្រឿងស្រវឹងរហូតដល់ ១០០ ភាគរយ នៅឆ្នាំ ២០៣០

បានផុស

២ years មុន

នៅ

ថ្ងៃសៅរ៍ ១៥ មិថុនា ២០២៤

ដោយ

ក្រសួងហិរញ្ញវត្ថុវៀតណាម បានស្នើឱ្យដំឡើងពន្ធលើការប្រើប្រាស់ ជាពិសេសលើគ្រឿងស្រវឹង ដល់ ១០០ ភាគរយ នៅឆ្នាំ ២០៣០ ដែលជាវិធានការមួយអាចប៉ះពាល់កាន់តែខ្លាំងដល់ឧស្សាហកម្មភេសជ្ជៈផ្ទុកជាតិអាល់កុលរបស់ប្រទេសនេះ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសេចក្តីព្រាងសំណើរ ដែលកំពុងរង់ចាំការអនុម័តពីសមាជិកសភា ពន្ធលើការប្រើប្រាស់ពិសេសលើស្រាបៀរ និងស្រាខ្លាំង នឹងត្រូវដំឡើងដល់ ៧០-៨០ ភាគរយ នៅឆ្នាំ ២០២៦ ហើយនឹងបន្តបង្កើនបន្តិចម្ដងៗរហូតដល់ ៩០-១០០ ភាគរយ នៅឆ្នាំ ២០៣០។ បច្ចុប្បន្ន ពន្ធគ្រឿងស្រវឹងមានត្រឹមតែ ៦៥ ភាគរយប៉ុណ្ណោះ។

ក្រសួងហិរញ្ញវត្ថុ បាននិយាយក្នុងសំណើនេះថា «តម្លៃភេសជ្ជៈ និងស្រាបៀរ នឹងកើនឡើង ២០ ភាគរយនៅឆ្នាំ ២០២៦ ធៀបនឹងឆ្នាំ ២០២៥» ហើយតម្លៃនឹងបន្តកើនឡើង ២-៣ ភាគរយអាស្រ័យលើអតិផរណា។

ក្រសួងបានបន្ថែមថា៖ «ការយកអត្រាពន្ធខ្ពស់ គឺចាំបាច់ដើម្បីជួយកាត់បន្ថយការប្រើប្រាស់ភេសជ្ជៈមានជាតិអាល់កុល»។

គួរគូសបញ្ជាក់ថា ឧស្សាហកម្មស្រាបៀររបស់ប្រទេសវៀតណាម ដែលវាយលុកទីផ្សារដោយម៉ាកល្បីៗដូចជា Heineken, Carlsberg, Sabeco និង Habeco បានរងផលប៉ះពាល់រួចហើយពីច្បាប់ស្តីពីភេសជ្ជៈ និងការបើកបរដ៏តឹងរ៉ឹងរបស់ប្រទេស ចាប់តាំងពីឆ្នាំ ២០១៩។ ស្រាបៀរទាំងអស់នេះ ភាគច្រើនរាយការណ៍ពីការធ្លាក់ចុះនូវការប្រើប្រាស់កាលពីឆ្នាំមុន។

កាលពីឆ្នាំមុន ប្រាក់ចំណូលរបស់ឧស្សាហកម្មស្រាបៀរ បានធ្លាក់ចុះ ១១ ភាគរយ ហើយប្រាក់ចំណេញបានធ្លាក់ចុះ ២៣ ភាគរយ។ នេះបើយោងតាមការប៉ាន់ប្រមាណរបស់សមាគមស្រាបៀរវៀតណាម។

ក្រៅតែពីពន្ធគ្រឿងស្រវឹង ក្រសួងហិរញ្ញវត្ថុក៏បានស្នើដំឡើងពន្ធលើការប្រើប្រាស់ពិសេសលើភេសជ្ជៈផ្សេងៗទៀត និងបារីផងដែរ៕

Related Topics:វៀតណាម