អស់រយៈពេល៨ថ្ងៃហើយ​ ឧទ្ធម្ភាគចក្រដែលបាត់ដាន ពុំទាន់មានតម្រុយនៅឡើយទេ

ឈានចូលដល់ថ្ងៃទី០៨ អាកាសធាតុមានការប្រែប្រួលឆាប់រហ័សកាន់តែផ្តល់ការលំបាកដល់បងប្អូនកងទ័ព កងកម្លាំង ក្នុងការរុករក និងសង្គ្រោះ ឧទ្ធម្ភាគចក្រមួយគ្រឿង ដែលបានបាត់ដំណឹងតាំងពីល្ងាចថ្ងៃទី១២ ខែកក្កដា ឆ្នាំ២០២៤។
តែទោះជាយ៉ាងណាក៏ដោយ ក្រសួងការពារជាតិ អគ្គបញ្ជាការ កងទ័ពជើងគោក ជាពិសេសយោធភូមិភាគទី៥ នៅតែបន្តផែនការយុទ្ធសាស្រ្តក្នុងការរុករករហូតដល់បេសកកម្មនេះទទួលបានជោគជ័យ។ នេះបើតាមការជូនដំណឹងរបស់ក្រសួងការពារជាតិ នៅលើបណ្តាញសង្គមហ្វេសប៊ុកនាថ្ងៃទី ២០ ខែកក្កដានេះ។

អ្នកនាំពាក្យក្រសួងការពារជាតិលោក ឈុំ​ សុជាត កាលពីថ្ងៃទី ១៨ កក្កដា បានឱ្យដឹងថា ដោយសារបញ្ហាភ្លៀងធ្លាក់ខ្លាំង បានបង្កជាការលំបាកដល់ប្រតិបត្តការរុករកឧទ្ធម្ភាគចក្រដែលបាត់ដាននៅតំបន់ជួរភ្នំក្រវាញ ខេត្តពោធិ៍សាត់ និងខេត្តកោះកុង។ លោកបញ្ជាក់ថា៖«នៅតំបន់ជួរភ្នំក្រវាញ ជាពិសេសចំណុចថ្មដា មេឃភ្លៀងខ្លាំង ខណៈដែលមានទឹកជន់ជោរនៅតាមអូរ ស្ទឹងមួយចំនួនដែលរំខានដល់ការរុករក»។

បើទោះបីជាមានការបង្កើនប្រតិបត្តការរុករក ប៉ុន្តែក្រុមជំនាញការ មិនទាន់រកឃើញចំណែក ឬតម្រុយណាមួយ ពាក់ព័ន្ធនឹងឧទ្ធម្ភាគចក្រ និងមនុស្ស២នាក់ ដែលបាត់ខ្លួនជាមួយឧទ្ធម្ភាគចក្រនេះនៅឡើយទេ។

ជាការកត់សម្គាល់ ប្រតិបត្តការរុករកនេះ មានទាំងការរុករកនៅលើផ្ទៃដីដោយថ្មើរជើង និងរុករកតាមរយៈឧទ្ធម្ភាគចក្រ ប៉ុន្តែការរុកពីលើតាមរយៈឧទ្ធម្ភាគចក្រ មិនអាចធ្វើឡើងដោយជាប់លាប់បានឡើយ ត្បិតថាអាកាសធាតុមិនអំណោយផល ហើយទីតាំងនោះមានខ្យល់ខ្លាំង៕