ព័ត៌មានអន្ដរជាតិ

កូរ៉េខាងជើង ថា “អត់ខ្វល់” បើទោះលោក ត្រាំ ជាប់ឆ្នោតនៅអាមេរិក

បានផុស

១២ ខែ មុន

នៅ

ថ្ងៃអង្គារ ២៣ កក្កដា ២០២៤

ដោយ

Chheang

យោងតាមប្រព័ន្ធផ្សព្វផ្សាយរដ្ឋកូរ៉េខាងជើង KCNA នៅថ្ងៃអង្គារទី២៣ ខែកក្កដា ឆ្នាំ២០២៤ រដ្ឋាភិបាលក្រុងព្យុងយ៉ាង “មិនខ្វល់” នោះទេ បើទោះជាអ្នកណាក៏ដោយឈ្នះការបោះឆ្នោតនៅសហរដ្ឋអាមេរិកនាខែវិច្ឆិកាខាងមុខ។ ការលើកឡើងនេះ ធ្វើឡើងបន្ទាប់ពីអតីតប្រធានាធិបតីអាមេរិក លោក ដូណាល់ ត្រាំ បានប្រកាសថា លោកមានទំនាក់ទំនងជិតស្និទ្ធល្អជាមួយមេដឹកនាំកូរ៉េខាងជើង លោក គីម ជុងអ៊ុន។

លោក គីម ជុងអ៊ុន និងលោក ដូណាល់ ត្រាំ អំឡុងកិច្ចប្រជុំកំពូលរវាងអាមេរិក-កូរ៉េខាងជើង ឆ្នាំ២០១៨ នៅសិង្ហបុរី (រូបភាព៖ Getty)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

KCNA បានចុះផ្សាយថា ទោះបីជារដ្ឋបាលណាមួយចូលកាន់តំណែងនៅសហរដ្ឋអាមេរិកក៏ដោយ ទំនាក់ទំនងនយោបាយដ៏ច្របូកច្របល់រវាងប្រទេសទាំង២ ក៏មិនអាចផ្លាស់ប្ដូរនោះទេ ហើយកូរ៉េខាងជើងមិនបានខ្វល់ខ្វាយអំពីរឿងបោះឆ្នោតនៅអាមេរិកឡើយ។

KCNA បានរៀបរាប់ថា នៅពេលដែលលោក ត្រាំ កាន់តំណែងជាប្រធានាធិបតី លោកបានព្យាយាមផ្សារភ្ជាប់ទំនាក់ទំនងពិសេសផ្ទាល់ខ្លួនជាមួយលោក គីម ជុងអ៊ុន ប៉ុន្តែទង្វើនេះមិនបាននាំមកនូវការផ្លាស់ប្តូរជាផលវិជ្ជមានណាមួយទេ។ KCNA បានសង្កត់ធ្ងន់ថា ទិសដៅគោលនយោបាយសាធារណៈ និង “អារម្មណ៍ផ្ទាល់ខ្លួន” គួរតែត្រូវបានបែងចែកឲ្យបានច្បាស់លាស់។

គួររំឮកថា ក្នុងអំឡុងសុន្ទរកថានៅឯសមាជបក្សសាធារណរដ្ឋកាលពីថ្ងៃព្រហស្បតិ៍សប្ដាហ៍មុន លោក ដូណាល់ ត្រាំ បានអះអាងថា លោកបានបញ្ឈប់កូរ៉េខាងជើងពីការបាញ់មីស៊ីល ហើយថា លោកនឹងធ្វើឲ្យទំនាក់ទំនងជាមួយទីក្រុងព្យុងយ៉ាងកាន់តែប្រសើរឡើង បើលោកវិលត្រឡប់ទៅកាន់សេតវិមានវិញ។ អតីតប្រធានាធិបតីវ័យ៧៨ឆ្នាំរូបនេះ បាននិយាយថា “គាត់ (លោក គីម ជុងអ៊ុន) ក៏ចង់ឃើញខ្ញុំមកវិញដែរ។ ខ្ញុំគិតថាគាត់នឹកខ្ញុំ”។

សូមបញ្ជាក់ជាថ្មី ក្នុងឆ្នាំ២០១៩ លោក ត្រាំ បានក្លាយជាប្រធានាធិបតីកំពុងកាន់តំណែងដំបូងគេរបស់អាមេរិក ដែលជាន់ដីកូរ៉េខាងជើង ពេលលោកជួបមេដឹកនាំ គីម ជុងអ៊ុន នៅតំបន់គ្មានយោធា ហើយអ្នកទាំងពីរ ក៏បានយល់ព្រមចាប់ផ្តើមការចរចាឡើងវិញ លើកិច្ចព្រមព្រៀងនុយក្លេអ៊ែដែលអូសបន្លាយយូរពេលជាយូរមកហើយដែរ៕

ដោយ៖ ឈាង

ចុចអាន៖ លោក ត្រាំ៖ ខ្ញុំគិតថា គីម ជុងអ៊ុន នឹកខ្ញុំ!