រដ្ឋបាលខេត្តរតនគិរី៖ អង្គការសង្គមស៊ីវិល ដើរតួនាទីយ៉ាងសំខាន់ ក្នុងការគាំទ្រសេវាសង្គម នៅតាមជនបទ

«អង្គការសង្គមស៊ីវិល ទាំងក្នុងស្រុក និងក្រៅស្រុក បានដើរតួនាទីយ៉ាងសំខាន់ ក្នុងការផ្តល់ និងគាំទ្រដល់វិស័យសេវាសង្គមនៅតាមមូលដ្ឋានជនបទ និង​សហគមន៍ដាច់ស្រយ៉ាល»។ នេះជាការលើកឡើងរបស់ អភិបាលរងខេត្តរតនគិរី​ លោក​ វ៉ាន់ សោភា ក្នុងវេទិការ កិច្ចសន្ទនាភាពជាដៃគូ ជាមួយអង្គការសង្គមស៊ីវិលក្នុងខេត្ត នាព្រឹកថ្ងៃទី២៣ ខែកក្កដា ឆ្នាំ២០២៤។

វេទិកានេះ នឹងចូលរួមចំណែកក្នុងការធ្វើឱ្យអាជ្ញាធរមូលដ្ឋានយល់ដឹងច្រើន និងផ្តល់កិច្ចសហការកាន់តែច្រើនឡើង ជាមួយសមាគម និងអង្គការមិនមែនរដ្ឋាភិបាល និងសហគមន៍នានានៅមូលដ្ឋាន។ បច្ចុបន្ន អាជ្ញាធរខេត្តបានពិនិត្យឃើញថា ការធ្វើសកម្មភាពរបស់អង្គការសង្គមស៊ីវិលនៅតាមមូលដ្ឋាន មានភាពល្អប្រសើរជាធម្មតា ដោយមិនមានការរឹតត្បិតនោះឡើយ ដែលនេះបង្ហាញយ៉ាងច្បាស់ថាអាជ្ញាធរខេត្ត គោរពតាមគោលការណ៍ណែនាំរបស់ក្រសួងមហាផ្ទៃស្តីពីកិច្ចសហការណ៍ និងសហប្រតិបត្តិការណ៍ ជាមួយអង្គការសង្គមស៊ីវិល។

លោកអភិបាលរងខេត្ត បានបញ្ជាក់ថា សមិទ្ធផលនៃការរីកចម្រើន និងការអភិវឌ្ឍនៅក្នុងខេត្ត គឺពិតជាមានការចូលរួមចំណែកពីគ្រប់ភាគីពាក់ព័ន្ធ ក្នុងនោះមានដៃគូអភិវឌ្ឍន៍ វិស័យឯកជន និងអង្គការសង្គមស៊ីវិលផងដែរ។ ជាពិសេសអង្គការសង្គមស៊ីវិល ទាំងក្នុងស្រុក និងក្រៅស្រុក បានដើរតួនាទីយ៉ាងសំខាន់ ក្នុងការផ្តល់ និងគាំទ្រដល់វិស័យសេវាសង្គមនៅតាមមូលដ្ឋានជនបទ និងសហគមន៍ដាច់ស្រយ៉ាល។ លោកបន្តថា អង្គការសង្គមស៊ីវិល បានចូលរួមធ្វើសកម្មភាពក្នុងវិស័យកំណែទម្រង់នានារបស់រដ្ឋ ដូចជា ការលើកកម្ពស់អភិបាលកិច្ចល្អ សិទ្ធិមនុស្ស ប្រព័ន្ធយុត្តិធម៌ ការអប់រំ សុខភាព ធនធានធម្មជាតិ និងបរិស្ថាន។ល។

ក្នុងឱកាសនោះ លោកអភិបាលរងខេត្ត ក៏បានអំពាវនាវ ដល់អាជ្ញាធរខេត្តគ្រប់ជាន់ថ្នាក់ និងអង្គការសង្គមស៊ីវិល បន្តសម្របសម្រួល និងបង្កលក្ខណៈងាយស្រួលដល់អង្គការសង្គមស៊ីវិល ដែលបានចុះបញ្ជីរត្រឹមត្រូវ។ ព្រមទាំងសមាគម និងអង្គការមិនមែនរដ្ឋាភិបាលបរទេស ដែលបានចុះអនុស្សរណៈជាមួយក្រសួងការបរទេស និងសហប្រតិបត្តិការអន្តរជាតិ ក្នុងការធ្វើសកម្មភាពដោយសេរី គ្មានភាពរឹតត្បិត ដែលស្របតាមច្បាប់ស្តីពីសមាគម និងអង្គការមិនមែនរដ្ឋាភិបាល និងគោលការណ៍ណែនាំរបស់ក្រសួងមហាផ្ទៃ។

បន្ថែមពីនេះ អាជ្ញាធរខេត្ត ត្រូវបន្តរៀបចំវេទិកាស្តីពីកិច្ចសន្ទនាភាពជាដៃគូរថ្នាក់ក្រោមជាតិ ជាមួយអង្គការសង្គមស៊ីវិលដែលធ្វើសកម្មភាពក្នងដែនសមត្ថកិច្ចរបស់ខ្លួន ក្នុងគោលបំណងពង្រឹងកិច្ចសហការណ៍ និងកិច្ចសហប្រតិបត្តិការណ៍ជាមួយអង្គការសង្គមស៊ីវិល។ ចំណែក សមាគម និងអង្គការមិនមែនរដ្ឋាភិបាល ដែលបានចុះបញ្ជីនៅក្រសួងមហាផ្ទៃ និងសមាគម និងអង្គការមិនមែនរដ្ឋាភិបាលបរទេស ដែលបានចុះអនុស្សរណៈជាមួយក្រសួងការបរទេស និងសហប្រតិបត្តិការណ៍អន្តរជាតិ ត្រូវបន្តអនុវត្តន៍សកម្មភាពរបស់ខ្លួនឱ្យបានត្រឹមត្រូវស្របតាមបញ្ញត្តិនៃច្បាប់ស្តីពី សមាគម និងអង្គការមិនមែនរដ្ឋាភិបាល តាមច្បាប់ និងលិខិតបទដ្ឋានគតិយុត្តនានាជាធរមាន។

លើសពីនេះ ត្រូវចៀសវាងជាដាច់ខាតននូវសកម្មភាពទាំងឡាយណាដែលអាចជាប់ពាក់ព័ន្ធ ឬគាំទ្រការលាងសម្អាត ប្រាក់ហិរញ្ញប្បទានភេរវកម្ម និងហិរញ្ញប្បទានអាវុធប្រល័យលោក ដើម្បីចៀសផុតពីការធ្វើអោយកម្ពុជា ធ្លាក់ចូលក្នុងបញ្ជីរប្រផេះ និងទទួលបច្ច័យអវិជ្ជមានលើផ្នែកប្រព័ន្ធហិរញ្ញវត្ថុ លំហូរវិនិយោគ និងនយោបាយជាដើម៕