ព័ត៌មានអន្ដរជាតិ

រុស្ស៊ីព្រមានជប៉ុន ក្នុងករណីបញ្ជូនមីស៊ីល PAC-3 ទៅឲ្យអ៊ុយក្រែន

បានផុស

២ years មុន

នៅ

ថ្ងៃសុក្រ ២ សីហា ២០២៤

ដោយ

ក្រសួងការបរទេសរុស្ស៊ីបានព្រមានចាត់វិធានការតបតនឹងប្រទេសជប៉ុន ប្រសិនបើមីស៊ីល PAC-3 ដែលផលិតនៅជប៉ុនត្រូវបានបញ្ជូននទៅកាន់ប្រទេសអ៊ុយក្រែនដែលកំពុងធ្វើសង្គ្រាមជាមួយខ្លួននោះ។ នេះបើយោងតាម ការចេញផ្សាយរបស់ទូរទស្សន៍ជាតិជប៉ុន NHKនៅថ្ងៃទី០២ខែសីហានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បន្ទាប់ពីក្រសួងការពារជាតិរបស់ប្រទេសជប៉ុនបានធ្វើកិច្ចព្រមព្រៀងមួយកាលពីខែកក្កដា ដើម្បីផ្ទេរមីស៊ីលប្រភេទខាងលើកាន់សហរដ្ឋអាមេរិកដែលកំពុងខ្វះខាតអាវុធក្នុងការគាំទ្រដល់អ៊ុយក្រែន អ្នកនាំពាក្យរងក្រសួងការបរទេសរុស្ស៊ី លោក Andrey Nastasyin បានសម្តែងការសង្ស័យអំពីកិច្ចព្រមព្រៀងនេះនៅឯសន្និសីទសារព័ត៌មានមួយកាលពីថ្ងៃពុធកន្លងទៅនេះ ដោយលោកថាមីស៊ីលផលិតដោយជប៉ុនអាចត្រូវបានបញ្ជូននៅអ៊ុយក្រែន។

លោកបានព្រមានថា៖«ទីក្រុងមូស្គូនឹងចាត់ទុកទីក្រុងតូក្យូជាអរិភាពជាមួយរុស្ស៊ី ប្រសិនបើមីស៊ីលជប៉ុនត្រូវបានផ្ទេរទៅឱ្យកងទ័ពអ៊ុយក្រែន»។ លោកកបន្ថែមថា រុស្ស៊ីរក្សាសិទ្ធិក្នុងការចាត់វិធានការឆ្លើយតបយ៉ាងម៉ឺងម៉ាត់បំផុត រួមទាំងក្នុងបរិបទនៃទំនាក់ទំនងទ្វេភាគីរបស់ខ្លួនជាមួយជប៉ុនផងដែរ។ ប៉ុន្តែលោកមិនបានបញ្ជាក់ថា តើមានចំណាត់ការជាក់ស្តែងបែបណានោះទេ។

កន្លងមករុស្ស៊ីក៏ធ្លាប់ដាក់ការព្រមានលើប្រទេសនានាដែលព្យាយាមផ្ដល់ជំនួយដល់អ៊ុយក្រែនដូចជាសហរដ្ឋអាមេរិកនិងប្រទេសបានបារាំងជាដើម ខណៈការប្រយុទ្ធគ្នានៅក្នុងសង្រ្គាមរវាងប្រទេសទាំងពីរនៅតែបន្តអូសបន្លាយមិនទាន់មានថ្ងៃបញ្ចប់។

អ៊ុយក្រែនមានបំណងពង្រឹងការការពារដែនអាកាសបន្ថែម ខណៈខ្លួនកំពុងទប់ទល់នឹងការវាយប្រហារដោយយន្តហោះគ្មានមនុស្សបើករបស់រុស្ស៊ី។ ចាប់ពីយប់ថ្ងៃអង្គារដល់ព្រឹកថ្ងៃពុធ រុស្ស៊ីបានប្រតិបត្តិការការវាយប្រហារដោយយន្តហោះគ្មានមនុស្សបើកដ៏ធំបំផុតមិនធ្លាប់មានរបស់ខ្លួនមកលើអ៊ុយក្រែន ដោយផ្តោតលើរដ្ឋធានី Kyiv និងទីតាំងផ្សេងទៀត៕