ព័ត៌មានអន្ដរជាតិ

មេដឹកនាំរុស្ស៊ី ត្រៀមជួបប្រធានាធិបតីប៉ាឡេស្ទីន ពិភាក្សាអំពីវិបត្តិនៅមជ្ឈិមបូព៌ា

បានផុស

២ years មុន

នៅ

ថ្ងៃអង្គារ ១៣ សីហា ២០២៤

ដោយ

Chheang

ប្រធានាធិបតីរុស្ស៊ី លោក វ៉្លាឌឺមៀរ ពូទីន នឹងជួបពិភាក្សាអំពីស្ថានភាពនៅក្នុងតំបន់មជ្ឈិមបូព៌ាជាមួយប្រធានាធិបតីប៉ាឡេស្ទីន លោក Mahmoud Abbas នៅទីក្រុងមូស្គូ នាថ្ងៃអង្គារនេះ។ នេះបើយោងតាមប្រកាសរបស់វិមានក្រឹមឡាំងកាលពីថ្ងៃចន្ទទី១២ខែសីហា។

លោក Mahmoud Abbas និងលោក វ៉ា្លឌឺមៀរ ពូទីន (រូបភាព៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសារដែលបង្ហោះនៅលើបណ្ដាញសង្គម Telegram វិមានក្រឹមឡាំងបានលើកឡើងថា៖ «វាដូចការរំពឹងទុកដែលការផ្លាស់ប្ដូរទស្សនៈនឹងត្រូវធ្វើឡើងផ្អែកលើស្ថានភាពក្នុងមជ្ឈិមបូព៌ា ក្រោយការកើនឡើងកម្ដៅជម្លោះបច្ចុប្បន្នរវាងប៉ាឡេស្ទីន-អ៊ីស្រាអែល និងគ្រោះមហន្តរាយមនុស្សធម៌ដែលមិនធ្លាប់មានពីមុនក្នុងតំបន់ហ្គាហ្សាស្ទ្រីប»។

ប្រធានាធីបតីប៉ាឡេស្ទីន កំពុងស្ថិតនៅក្នុងទីក្រុងមូស្គូ ហើយគ្រោងនឹងធ្វើទស្សនកិច្ចនៅទីនោះរហូតដល់ថ្ងៃពុធ មុនបន្តដំណើរទៅកាន់ប្រទេសតួកគីសម្រាប់ជំនួបជាមួយលោកប្រធានាធិបតី Tayyip Erdogan។

ប្រទេសរុស្ស៊ី បានបង្កើតទំនាក់ទំនងជិតស្និទ្ធជាមួយមេដឹកនាំកំពូលអ៊ីរ៉ង់ លោក Ayatollah Ali Khamenei និងមេដឹកនាំអារ៉ាប់ រួមមានព្រះអង្គម្ចាស់អារ៉ាប៊ីសាអូឌីត Mohammed bin Salman។ រុស្ស៊ីបានថ្កោលទោសការសម្លាប់មេដឹកនាំក្រុមសកម្មប្រយុទ្ធហាម៉ាសនាពេលថ្មីៗនេះគឺលោក Ismail Haniyeh ដោយអំពាវនាវឲ្យភាគីទាំងអស់ជៀសវាងការបង្កើនអស្ថិរភាពបន្ថែមទៀតនៅក្នុងតំបន់មជ្ឈិមបូព៌ា។

រដ្ឋាភិបាលក្រុងមូស្គូ ក៏បានស្តីបន្ទោសលោកខាងលិចម្តងហើយម្តងទៀត ចំពោះការមិនអើពើតម្រូវការសម្រាប់រដ្ឋឯករាជ្យប៉ាឡេស្ទីនដែលផ្អែកតាមការកំណត់ព្រំដែនឆ្នាំ១៩៦៧៕

ដោយ៖ ឈាង