រដ្ឋមន្ត្រីសុខាភិបាល លើកទឹកចិត្តថ្នាក់ដឹកនាំមន្ទីពេទ្យខេត្តប៉ៃលិន ខិតខំពង្រីកសេវាបន្ថែម ដើម្បីឆ្លើយតបតម្រូវការជាក់ស្តែង

លោក ឈាង រ៉ា រដ្ឋមន្រ្តីក្រសួងសុខាភិបាល បានលើកទឹកចិត្តដល់ថ្នាក់ដឹកនាំមន្ទីរពេទ្យឱ្យខិតខំសហការគ្នា សាមគ្គីគ្នា ពង្រីកសេវាបន្ថែម និងផ្តោតជាអាទិភាពការបណ្តុះបណ្តាលធនធានមនុស្ស បង្កើនសមត្ថភាពភាពជាអ្នកដឹកនាំ នវានុវត្តន៍ ដើម្បីឆ្លើយតបនឹងតម្រូវការជាក់ស្តែងក្នុងទូទាំងខេត្តប៉ៃលិន។

ការលើកទឹកចិត្តនេះ​ធ្វើឡើងក្នុងពេលដែល លោករដ្ឋមន្ត្រី បានដឹកនាំប្រតិភូជាន់ខ្ពស់ និងក្រុមការងារបច្ចេកទេសក្រសួងសុខាភិបាល ចុះពិនិត្យការផ្តល់សេវាសុខភាពសាធារណៈនៅមន្ទីរពេទ្យខេត្តប៉ៃលិន ដោយមានការអញ្ជើញចូលរួមពី លោកស្រី បាន ស្រីមុំ អភិបាលនៃគណៈអភិបាលខេត្តប៉ៃលិន លោកប្រធានមន្ទីរសុខាភិបាល និងសហការី នៃរដ្ឋបាលខេត្តប៉ៃលិន នាថ្ងៃទី១៨ ខែសីហា ឆ្នាំ២០២៤។

ក្នុងឱកាសនោះដែរ លោករដ្ឋមន្ត្រី និងប្រតិភូ បានចុះពិនិត្យទីតាំងផ្តល់សេវាសំខាន់ៗ មានផ្នែកសង្គ្រោះបន្ទាន់ ផ្នែកព្យាបាលទូទៅ ផ្នែកវះកាត់ ផ្នែកសម្ភព និងបានពិនិត្យទៅលើផ្នែកពាក់ព័ន្ធនានានៃការបម្រើសេវាសុខាភិបាលនៅមន្ទីរពេទ្យខេត្តប៉ៃលិន។ ជាមួយគ្នានោះ លោករដ្ឋមន្ត្រី ក៏បានសម្តែងការអររគុណ ចំពោះទឹកចិត្តទំនុកចិត្តអ្នកជំងឺ និងក្រុមគ្រួសារ ដែលអញ្ជើញមកទទួលសេវាសុខាភិបាលសាធារណៈនៅមន្ទីររពេទ្យ៕