រុស្ស៊ី បាញ់មីស៊ីលស្រោចលើអ៊ុយក្រែន ២ថ្ងៃជាប់គ្នា សម្លាប់មនុស្សបន្ថែមទៀត

ការវាយប្រហារទ្រង់ទ្រាយធំរបស់រុស្ស៊ីលើអ៊ុយក្រែន បានឈានចូលថ្ងៃទី២ហើយ ខណៈតួលេខមនុស្សស្លាប់ក៏កើនឡើងបន្ថែមផងដែរ។

កងកម្លាំងការពារដែនអាកាសរបស់អ៊ុយក្រែន បានឲ្យដឹងថា ប្រទេសទាំងមូលត្រូវគំរាមកំហែងដោយការវាយប្រហារពីមីស៊ីលបាលីស្ទិកនិងដ្រូនទ្រង់ទ្រាយធំ ហើយស៊ីរ៉ែនប្រកាសអាសន្ន ក៏បន្លឺឡើងនៅព្រឹកថ្ងៃអង្គារទី២៧ខែសីហាឆ្នាំ២០២៤ផងដែរ។

តាមសេចក្តីរាយការណ៍របស់ BBC, ការវាយប្រហារទ្រង់ទ្រាយធំថ្ងៃទីពីរ បានសម្លាប់មនុស្សចំនួន៣នាក់បន្ថែមទៀត ដូចនេះមានន័យថា បូករួមទាំងប្រតិបត្តិការថ្ងៃទីមួយ មានមនុស្សសរុប១០នាក់ហើយ ដែលស្លាប់ក្រោមដៃរុស្ស៊ី។

ក្នុងការវាយប្រហារថ្ងៃទីមួយ រុស្ស៊ីបានបាញ់មីស៊ីលអស់១២៧គ្រាប់ និងបញ្ជូនដ្រូន១០៩គ្រឿងចូលទៅអ៊ុយក្រែន ដោយភាគច្រើនគឺកំណត់គោលដៅលើហេដ្ឋារចនាសម្ព័ន្ធស៊ីវិលសំខាន់ៗ ដោយថែមទាំងសម្លាប់មនុស្សចំនួន៧នាក់ទៀតផង។

គេមើលឃើញថា សកម្មភាពរបស់រុស្ស៊ីចុងក្រោយនេះ គឺមានចេតនាបង្ហាញពីភាពខ្លាំងរបស់ខ្លួនក្នុងជម្លោះជាមួយអ៊ុយក្រែន បន្ទាប់ពីកងកម្លាំងរបស់លោក Zelensky​ បើកប្រតិបត្តិការវាយលុកឆ្លងដែនយ៉ាងភ្ញាក់ផ្អើលចូលដីរុស្ស៊ី ហើយថែមទាំងដណ្តើមការគ្រប់គ្រងទីតាំងមួយចំនួនទៀតផង។

ជុំវិញការឡើងកម្តៅថ្មីៗនេះដែរ ទីក្រុងមូស្គូប្រកាសថា ខ្លួនបានបើកការវាយប្រហារដ៏ធំលើហេដ្ឋារចនាសម្ព័ន្ធថាមពលរបស់អ៊ុយក្រែន និងវាយលុកគ្រប់គោលដៅទាំងអស់ ខណៈក្រសួងការពារជាតិរុស្ស៊ីបញ្ជាក់ពីការកំណត់គោលដៅលើរោងចក្រថាមពលអគ្គិសនីនៅក្នុងតំបន់ចំនួន៩ រួមទាំងទីក្រុង កៀវ និង Odessa ផងដែរ។

យ៉ាងណា ត្បិតតែការវាយប្រហារលើកនេះមានទ្រង់ទ្រាយធំក៏ពិតមែន ប៉ុន្តែវាមិនទាន់ធំដូចខែធ្នូឆ្នាំ២០២៣ទេ ដែលកាលនោះរុស្ស៊ីបានបាញ់មីស៊ីលរហូតដល់ទៅ១៥៨គ្រាប់ ស្រោចលើអ៊ុយក្រែនឯណោះ៕

អត្ថបទ៖ សុខ សុវណ្ណ

ចុចអាន៖ រុស្ស៊ី វាយប្រហារទ្រង់ទ្រាយធំលើអ៊ុយក្រែន មួយថ្ងៃបាញ់មីស៊ីល១២៧គ្រាប់ និងដ្រូន ១០៩គ្រឿង