អ្នកស្រី អុឹម សុគន្ធា ហួសចិត្តអ្នកចែករំលែក MGI មិនខ្មាសផ្ទះលេខ២ ខណ:គេ Block ខ្មែរស្ទើរមួយប្រទេស

អ្នកស្រី អុឹម សុគន្ធា អ្នកគ្រប់គ្រង MGC បានសម្តែងការហួសចិត្តជាខ្លាំង ខណ:ដែលឃើញមានអ្នកបន្តការផុស និងចែករំលែកកម្មវិធី MGI ដែលបាននឹងកំពុងធ្វើនៅប្រទេសថៃ ក្រោយផ្តាច់សិទ្ធិកម្ពុជាធ្វើជាម្ចាស់ផ្ទះកាលពីថ្មីៗនេះ។

បន្ទាប់ពីឃើញមានអ្នកគាំទ្រខ្មែរមួយចំនួនចែករំលែក (ស៊ែរ) កម្មវិធីខាងលើនេះ អ្នកនាង អុឹម សុគន្ធា បាននិយាយថា “កុំថាឡើយចូលមើលកម្មវិធីហ្នឹង សូម្បីតែអូសឃើញក៏រំលងចោលដែរ ហើយសុំមិនយល់អ្នកយកមកផុសស៊ែរពីកម្មវិធីគេបានអី្វមកវិញ ខ្មាសផ្ទះលេខ ២ណាស់ គេ block មួយប្រទេសហើយ យើងនៅតាមកម្មវិធីគេមកផុសពេញហ្នឹងទៀត”។

ដោយឡែក រឿងដែលកាន់ហួសចិត្តថែមទៀតស្រាប់ តែមានគណនីហ្វេសប៊ុកមួយបានចូលទៅបញ្ចេញមតិឌឺដងទៅកាន់អ្នកនាង អុឹម សុគន្ធា តាមរយ:ខ្លឹមសារថា “កុំតូចចិត្តអី្វការស៊ែរការនិយាយ គឺបង្ហាញតែចំណុចអវិជ្ជមាន។ ចុះលោកស្រីគេវាយប្រហារ និងសើចចំអកយកលុយបោក និងពេលវេលា បើគិតទៅអស់រាប់សែនដុល្លារមិនទាំងហ៊ានប្តឹងគេផង អត់យល់?” ។

ឆ្លើយតបការលើកឡើងនេះភ្លាមៗនោះ អ្នកស្រី អុឹម សុគន្ធា បានបញ្ជាក់ថា និយាយរឿងអវិជ្ជមាន ខ្លួនមិនថាទេ តែបើផុសកម្មវិធីគេប្រឡងនឹងបានអី្វមកវិញ និងចោទសួរទៀតថា “បើហ៊ានថា គេបោកអ្នកនាងរាប់សែនដុលារ តើការដែលមិនធ្វើអី្វគេ នឹងយ៉ាងម្តេចវិញ?”។

អ្នកស្រីបន្តទៀតថា “ការប្តឹងមិនមែនជាការងាយស្រួលដូចការគិតរបស់លោកទេ បញ្ហានេះបើដោះមិនស្រួល នឹងមានបញ្ហាធំរវាងប្រទេសនិងប្រទេសហើយ ប្តឹងម្តងៗអស់លុយរាប់ម៉ឺនដុលារចំណាយពេលវេលាច្រើនណាស់”។ អ្នកនាង បានបញ្ជាក់បន្ថែមទៀតថា សម្រាប់រឿងលុយ នាងសុខចិត្តបោះចោល នាងមិនល្ងង់ទេ តែកុំឲ្យជាប់កម្មពារគ្នាទៀត អ្នកចង់បានរបស់គេមិនគឺចម្រើនទេ”។

គួររម្លឹកថា ក្រោយមានរឿងរ៉ាវដ៏ចម្រូងចម្រាស់អ្នកស្រី អុឹម សុគន្ធា អ្នកគ្រប់គ្រងកម្មវិធី Miss Grand Cambodia 2024 ធ្លាប់បានប្រកាសប្តេជ្ញានឹងអះអាងថា អ្នកនាងនឹងធ្វើគ្រប់យ៉ាងដើម្បីបិទ Miss Grand មិនឲ្យមាននៅកម្ពុជានាឆ្នាំក្រោយៗបន្តទៀតទេ៕ អត្ថបទ៖ ចាន់រ៉ា