អ៉ឹម ជីវ៉ា ស្នើក្រសួងពាក់ព័ន្ធជួយពិនិត្យលើកម្មវិធី MGI ព្រោះយល់ថា មិនគួរឱ្យដំណើរការនៅកម្ពុជាទៀតឡើយ

តារាសម្តែងលោក អ៉ឹម ជីវ៉ា បានចេញមុខទទូចដល់ក្រសួងវប្បធម៌ និងវិចិត្រសិល្ប: រួមទាំងក្រសួងពាក់ព័ន្ធ ជួយពិនិត្យជុំវិញករណីការទិញសិទ្ធិកម្មវិធីប្រកួត Miss Grand មិនគួរឱ្យមាននៅកម្ពុជាទៀតទេ ខណ:ដែលថ្មីៗនេះម្ចាស់ Miss Grand international បង្ហោះសារមើលងាយប្រមាថមេដឹកនាំខ្មែរនិងរដ្ឋាភិបាលខ្មែរ។

ការចេញមុខស្នើរបស់លោក អ៉ឹម ជីវ៉ា ខាងលើនេះ ស្របពេលកាលពីថ្មីៗកន្លងទៅមានលេចឮដំណឹងថា មានអ្នកចង់ទិញសិទ្ធិកម្មវិធីមួយនេះមកធ្វើនៅប្រទេសកម្ពុជា។ ដោយលោក អ៉ឹម ជីវ៉ា ក៏បានប្រកាសព្រមានដែរថា បើបវរកញ្ញាណាហ៊ានទៅប្រកួត MGI លោកនឹងនាំហ្វេនទៅស្វាគមន៍ដល់ព្រលានយន្តហោះ។

ផ្អែកតាមខ្លឹមសារដែលលោក អ៉ឹម ជីវ៉ា បានសរសេរបញ្ចេញនៅលើគណនីហ្វេសប៊ុកបានរៀបរាប់ថា “កាលពីមុនប្អូនស្រី អុឹម សុគន្ធា ឈ្លោះជាមួយកញ្ចាស់ណា វ៉ាត់ កាលណោះ ថៃមើលងាយខ្មែរមានគេលើកឡើងថា ជាជម្លោះឯកជនតែពេលនេះជនជាតិថៃម្ចាស់ Miss Grand international ផុសមើលងាយប្រមាថមេដឹកនាំខ្មែរ រដ្ឋាភិបាលខ្មែរ តើនេះជាជម្លោះឯកជនទៀតទេ?”។

លោកចោទសួរថា “តើគួឱ្យមានកម្មវិធីនេះលើទឹកដីខ្មែរទៀតទេ?” និងស្នើថា “ខ្ញុំបាទ អុឹម ជីវ៉ា សូមស្នើដល់ក្រសួងវប្បធម៌ និងវិចិត្រសិល្ប: ព្រមទាំងក្រសួងពាក់ព័ន្ធ មេត្តាត្រួតពិនិត្យបញ្ហានេះដោយក្តីអនុគ្រោះផង”។

ទន្ទឹមនេះ លោក អ៉ឹម ជីវ៉ា លើកឡើងដោយប្រើពាក្យពេចន៍ធ្ងន់ៗ ជាពិសេសទៅកាន់អ្នកដែលហ៊ាននាំយកកម្មវិធីមួយនេះមកកម្ពុជា ឬបវរកញ្ញារូបណាក៏ដោយដែលហ៊ានចូលរួមប្រកួតកម្មវិធីមួយនេះ ដោយព្រមានថា លោកនឹងនាំអ្នកគាំទ្រ ទៅស្វាគមន៍ដល់អាកាសយានដ្ឋានអន្តរជាតិតែម្តង៕ ចាន់រ៉ា