លោក សុះ ម៉ាច លះបង់ងារជាឯកឧត្តម ព្រោះមនសិការស្រលាញ់ការពារថែរក្សាសិល្ប:

តារាចម្រៀងជើងចាស់រក្សាបានប្រជាប្រិយភាពលោក សុះ ម៉ាច អះអាងថា ដោយសារការស្រលាញ់ការពារថែរក្សាសិល្ប:ទើបលោកសុខចិត្តលះបង់ងារជាឯកឧត្តមដែលធ្លាប់ទទួលបានកាលពីកន្លងមក។

ទោះបីយ៉ាងណាពេលនេះ លោក សុះ ម៉ាច បានចេញមកបញ្ជាក់ជាថ្មីថា ដោយសារតែលោកងប់ងល់នឹងការស្រលាញ់ការពារថែរក្សាសិល្ប: រួមទាំងមនសិការជាតិមិនគិតបុណ្យសក្តិតួនាទីដែលមានកន្លងជាឯកឧត្តម ទើបឆាកជីវីតលោកបានត្រឹមតែជាអ្នកចម្រៀងបម្រើអារម្មណ៍មនុស្សគ្រប់ស្រទាប់វណ្ណៈរហូតសព្វថ្ងៃ ។

តារាចម្រៀងលោកសុះ ម៉ាចបានលើកឡើយទៀតថា “ខ្ញុំបាត់បង់ឱកាសអស់រលីង គ្មានបុណ្យសក្ដិតួនាទី សូម្បីតែបន្តិចមិនតែប៉ុណ្ណោះ ត្រូវគេលាបពណ៌ទៀតផង តែណ្ហើយអ្វីៗជាវាសនាទេ ខ្ញុំមិនតូចចិត្តនឹងនៅរក្សាចិត្តគំនិតឧត្តមគតិដដែលដើម្បីបន្សល់កេរ្តិ៍ឈ្មោះនិងអ្វីដែលជាគំរូល្អសម្រាប់កូនៗ និងមនុស្សជំនាន់ក្រោយប្រសើរជាង”។

លោក សុះ ម៉ាច បច្ចុប្បន្នក្រៅតែអាជីពច្រៀង លោកជាគ្រូបង្ហាត់បង្រៀងសិល្ប:សម្រាប់ក្មេងៗជំនាន់ក្រោយ ខណ:សព្វថ្ងៃ លោកច្រៀងនៅតាមបណ្តាភោជនីយដ្ឋានរាត្រីមួយចំនួនផងដែរ។

គេនៅចាំបានថា អតីតប្រធាន​សមា​គម​សិល្ប​ករ​ខ្មែរ​២អាណត្តិលោកសុះ ម៉ាច កាល​ពី​អំឡុង​ ឆ្នាំ​២០០៧ ត្រូវ​បាន​ព្រះ​​មហា​ក្សត្រ​តែង​តាង​គោរម​ងារ​ជា​ឯកឧត្តម​ទីប្រឹក្សា​នៅ​ព្រឹទ្ធ​សសភា។ ប៉ុន្តែ​ក្រោយមក លោកក៏បានទម្លាយថា ងារ​ជា​ឯក​ឧត្តម​របស់​លោក​ត្រូវ​បានកាត់​ចេញ​ហើយ៕ អត្ថបទ៖ ចាន់រ៉ា