តួឯកស្រីរឿង “រាត្រីមួយក្រោយសង្គ្រាម” អំឡុងឆ្នាំ១៩៩៦ ឈានជើងលើទឹកដីកម្ពុជាជាថ្មី ក្នុងកម្មវិធីមហាស្រពភាពយន្តអន្តរជាតិ

អតីតតារាសម្តែងល្បីឈ្មោះនាអំឡុង​ឆ្នាំ​១៩៩៦ គឺអ្នកស្រី ច័ន្ទ ជាលី​ដា ក្រោយឃ្លាតឆ្ងាយពីស្រុកកំណើត និងបាត់មុខវិថីជីពសិល្ប:យូរឆ្នាំមកនោះ ស្រាប់តែថ្មីៗនេះបានបង្ហាញវត្តមាននៅលើទឹកដីប្រទេសកម្ពុជា។

លោកស្រី ច័ន្ទ ជាលី​ដាគឺជាតួឯកស្រីក្នុងរឿង «រាត្រីមួយក្រោយសង្រ្គាម» ដែលជាភាពយន្តដ៏ល្បីល្បាញមួយរបស់ផលិតករ ប៉ាន់ រិទ្ធី ដែលបានចាក់បញ្ចាំងអំឡុងឆ្នាំ១៩៩៦ ។ ភាពយន្តនេះ បានផ្តោតទៅលើទិដ្ឋភាពរស់នៅរបស់យុទ្ធជនខ្មែរដែលត្រឡប់ពីសង្រ្គាម និងបានចាប់ចិត្តស្រលាញ់នារីរង្គសាលមួយរូប។

ទោះបីជាយ៉ាងណា បន្ទាប់ពីឃ្លាតឆ្ងាយពីសិល្ប:លោកស្រី ច័ន្ទ ជាលី​ដា ដោយនឹករលឹកស្រុកកំណើតតារាភាពយន្តជើងចាស់រូបនេះ បានស្កាត់ឡើងយន្តហោះឆ្លងសមុទ្រពីប្រទេសអូស្រ្តាលី មកលេងប្រទេសកម្ពុជាធ្វើឱ្យអ្នកសិល្ប:រួមជំនាន់ និងទស្សនិកជនចាប់អារម្មណ៍ផងដែរ។

ជាក់ស្តែង នេះក៏ជារឿងដ៏គួរឱ្យភ្ញាក់ផ្អើលមួយផងដែរ ដោយកាលពីរសៀលម្សិលមិញនេះ លោកស្រី ច័ន្ទ ជាលីដា បានបង្ហាញវត្តមានក្នុងពិធីបើក “មហោស្រពភាពយន្តអន្តរជាតិលើកទី១៤ “កាលពីថ្ងៃទី២១ ខែមីនា ឆ្នាំ២០២៥ នាសាល សន្និសីទចតុម្មុខរាជធានីភ្នំពេញ ក្រោយធ្វើដំណើរមកពីប្រទេសអូស្រ្តាលី។

សូមបញ្ជាក់ថា អ្នកស្រី ច័ន្ទ ជាលី​ដា គឺជា​អតីត​តារា​សម្ដែង​ស្រី​ឈ្មោះម្នាក់ ក្នុង​ឆ្នាំ​១៩៩៦ ដែលអ្នកស្រីក្តាប់បានតំណែងជាតួឯកក្នុងភាពយន្តខ្មែររឿង «​រាត្រីមួយក្រោយសង្គ្រាម» ដឹកនាំ​សម្ដែង​ដោយ​លោក ប៉ាន់ រិ​ទ្ធី​ ។ កាលនោះលោកស្រី​គឺទទួល​បានការ​គាំទ្រខ្លាំងពីសំណាក់ទស្សនិកជនគ្រប់មជ្ឈដ្ឋាន តែក្រោយមកលោកស្រីក៏បានបាត់វត្តមានពីវិថីមួយនេះដោយលោកស្រីបានចាកចេញទៅរស់នៅលើទឹកដី​ប្រទេស​អូស្ត្រាលី ជាមួយនឹង​ក្រុម​គ្រួសារ​៕ អត្ថបទ៖ ចាន់រ៉ា