ព័ត៌មានអន្ដរជាតិ
លោក ត្រាំ មានផែនការចំនួន៣ ដើម្បីបញ្ចប់សង្គ្រាម រុស្ស៊ី-អ៊ុយក្រែន
តាមការចុះផ្សាយរបស់ Reuters កាលពីថ្ងៃពុធទី៤ខែធ្នូឆ្នាំ២០២៤, ទីប្រឹក្សារបស់ប្រធានាធិបតីជាប់ឆ្នោតអាមេរិក ដូណាល់ ត្រាំ បានបង្ហាញជូនលោកអំពីផែនការចំនួន៣ ដើម្បីបញ្ចប់សង្គ្រាមរុស្ស៊ី-អ៊ុយក្រែន ហើយត្បិតតែសេចក្តីលម្អិតនៃផែនការទាំងនោះត្រូវបានលាក់ជិតឈឹងក៏ដោយ ប៉ុន្តែគេសន្និដ្ឋានថា វាគ្មានអ្វីក្រៅពីការជំរុញឲ្យទីក្រុងកៀវប្រគល់ទឹកដីឲ្យទីក្រុងមូស្គូ ហើយឈប់ព្យាយាមចូលជាសមាជិកអង្គការណាតូនោះទេ។

សេចក្តីរាយការណ៍នោះបានឲ្យដឹងថា ក្នុងចំណោមផែនការទាំង៣ គឺមានមួយបានមកពីលោក Keith Kellogg ដែលជាប្រេសិតរុស្ស៊ី-អ៊ុយក្រែននៃរដ្ឋបាលថ្មីរបស់លោក ត្រាំ ចំណែកផែនការ២ទៀតគឺបានមកពីអនុប្រធានាធិបតីជាប់ឆ្នោត J.D. Vance និងអតីតប្រធានចារកម្មស្តីទីរបស់លោក ត្រាំ គឺ Richard Grenell។
យ៉ាងណាក្តី បើតាមការបញ្ជាក់ពីអតីតមន្ត្រីសន្តិសុខជាតិរបស់លោក ត្រាំ, ក្នុងផែនការនោះ លោក ត្រាំ នឹងគំរាមកាត់ជំនួយយោធាដល់អ៊ុយក្រែន បើលោក វ្ល៉ាឌីមៀរ ហ្សេលេនស្គី មិនព្រមចូលតុចរចា ឬសហរដ្ឋអាមេរិក នឹងបង្កើនជំនួយដល់អ៊ុយក្រែន បើរុស្ស៊ី មិនព្រមមកចរចាវិញ។
ម្យ៉ាងវិញទៀត គេហ៊ានអះអាងថា កិច្ចព្រមព្រៀងណាមួយ គឺអាចកើតឡើងបាន លុះត្រាតែលោក ត្រាំ, ពូទីន និង ហ្សេលេនស្គី ចូលរួមក្នុងកិច្ចពិភាក្សាគ្នាផ្ទាល់។

កាលពីសប្តាហ៍មុន ទីប្រឹក្សាសន្តិសុខជាតិរបស់លោក ត្រាំ គឺ Mike Waltz ក៏បានថ្លែងប្រាប់ Fox News ដែរថា ប្រធានាធិបតីជាប់ឆ្នោតអាមេរិក នឹងធ្វើការលើកិច្ចចរចា តាំងតែពីថ្ងៃដំបូងទៅនៃអាណត្តិថ្មីរបស់គាត់ ដែលនឹងចាប់ផ្តើមនៅថ្ងៃទី២០ខែមករា ដោយអាទិភាពសំខាន់បំផុត គឺរៀបចំកិច្ចប្រជុំរវាងរុស្ស៊ីនិងអ៊ុយក្រែន ក្នុងគោលបំណងនាំភាគីទាំងពីរ មករួមគ្នាដើម្បីចរចាបទឈប់បាញ់ ឬកិច្ចព្រមព្រៀងសន្តិភាពណាមួយ។
ពាក់ព័ន្ធរឿងនេះ កាលពីខែតុលា ភាគីរុស្ស៊ី ក៏បានដាក់ចេញនូវលក្ខខណ្ឌ២ចំណុចច្បាស់ៗ ទៅអ៊ុយក្រែនរួចទៅហើយ បើពិតជាចង់ចរចាសន្តិភាពមែន។
តាមការបញ្ជាក់ពីអ្នកនាំពាក្យវិមានក្រឹមឡាំងលោក Dmitry Peskov, លក្ខខណ្ឌទី១នោះគឺ ទីក្រុងកៀវ ត្រូវបោះចោលគំនិតចូលជាសមាជិកអង្គការណាតូ ហើយទី២ អ៊ុយក្រែន ត្រូវដកទ័ពចេញពីទឹកដីរុស្ស៊ី៕
អត្ថបទ៖ សុខ សុវណ្ណ
ចុចអាន៖ រដ្ឋបាលជាប់ឆ្នោតរបស់លោកត្រាំ បង្ហាញវិធីសាស្រ្តបញ្ចប់សង្គ្រាម រុស្ស៊ី-អ៊ុយក្រែន

-
ព័ត៌មានអន្ដរជាតិ៣ ថ្ងៃ ago
កម្មករសំណង់ ៤៣នាក់ ជាប់ក្រោមគំនរបាក់បែកនៃអគារ ដែលរលំក្នុងគ្រោះរញ្ជួយដីនៅ បាងកក
-
សន្តិសុខសង្គម៥ ថ្ងៃ ago
ករណីបាត់មាសជាង៣តម្លឹងនៅឃុំចំបក់ ស្រុកបាទី ហាក់គ្មានតម្រុយ ខណៈបទល្មើសចោរកម្មនៅតែកើតមានជាបន្តបន្ទាប់
-
ព័ត៌មានអន្ដរជាតិ៧ ថ្ងៃ ago
រដ្ឋបាល ត្រាំ ច្រឡំដៃ Add អ្នកកាសែតចូល Group Chat ធ្វើឲ្យបែកធ្លាយផែនការសង្គ្រាម នៅយេម៉ែន
-
ព័ត៌មានជាតិ៤ ថ្ងៃ ago
បងប្រុសរបស់សម្ដេចតេជោ គឺអ្នកឧកញ៉ាឧត្តមមេត្រីវិសិដ្ឋ ហ៊ុន សាន បានទទួលមរណភាព
-
ព័ត៌មានជាតិ៧ ថ្ងៃ ago
សត្វមាន់ចំនួន ១០៧ ក្បាល ដុតកម្ទេចចោល ក្រោយផ្ទុះផ្ដាសាយបក្សី បណ្តាលកុមារម្នាក់ស្លាប់
-
ព័ត៌មានអន្ដរជាតិ១ សប្តាហ៍ ago
ពូទីន ឲ្យពលរដ្ឋអ៊ុយក្រែនក្នុងទឹកដីខ្លួនកាន់កាប់ ចុះសញ្ជាតិរុស្ស៊ី ឬប្រឈមនឹងការនិរទេស
-
សន្តិសុខសង្គម៣ ថ្ងៃ ago
ការដ្ឋានសំណង់អគារខ្ពស់ៗមួយចំនួនក្នុងក្រុងប៉ោយប៉ែតត្រូវបានផ្អាក និងជម្លៀសកម្មករចេញក្រៅ
-
ព័ត៌មានអន្ដរជាតិ២ ថ្ងៃ ago
កើតក្តីបារម្ភបាក់ទំនប់វារីអគ្គិសនីនៅថៃ ក្រោយរញ្ជួយដី