លោក ស៊ី ជីនពីង៖ គ្មាន​អ្នក​ចាញ់ឈ្នះ​​នៅ​ក្នុង​សង្គ្រាមពាណិជ្ជកម្ម​ចិន-អាមេរិក​ឡើយ

ជា​សារ​​ព្រមាន​មួយ​ទៅ​កាន់​លោក ដូណាល់ ត្រាំ មុន​​​កាន់​តំណែង​ជា​ប្រធានាធិបតី​អាមេរិក​ផ្លូវការ​នា​ខែ​មករា​ខាង​មុខ លោក ស៊ី ជីនពីង បាន​និយាយ​នៅ​ថ្ងៃ​ទី​១០​ខែធ្នូ​ឆ្នាំ​២០២៤​ថា សង្រ្គាមពាណិជ្ជកម្ម​​រវាង​ចិន​-​អាមេរិក នឹង​​គ្មាន​​អ្នក​ចាញ់​ឈ្នះ​នោះ​ឡើយ។

ប្រធានាធិបតី​ចិន បាន​រៀបរាប់​អំពីទំនាក់ទំនងចិន-អាមេរិក នៅពេលជួបជាមួយប្រធានស្ថាប័នហិរញ្ញវត្ថុពហុភាគីនៅទីក្រុងប៉េកាំងថា៖ «សង្រ្គាមពន្ធ សង្គ្រាមពាណិជ្ជកម្ម និងសង្រ្គាមបច្ចេកវិទ្យា ប្រឆាំងនឹងនិន្នាការប្រវត្តិសាស្ត្រ និងច្បាប់សេដ្ឋកិច្ច ហើយវានឹងមិនមានអ្នកឈ្នះទេ។ ចិន មានឆន្ទៈរក្សាការសន្ទនាជាមួយរដ្ឋាភិបាលសហរដ្ឋអាមេរិក ពង្រីកកិច្ចសហប្រតិបត្តិការ ដោះស្រាយ​បញ្ហា​ភាពខុសគ្នា និងជំរុញការអភិវឌ្ឍទំនាក់ទំនងចិន-អាមេរិកក្នុងទិសដៅស្ថិរភាព សុខភាពល្អ និងនិរន្តរភាព»។

កន្លង​មក លោក ដូណាល់ ត្រាំ បាន​បង្កើត​សង្គ្រាមពាណិជ្ជកម្មដ៏ក្តៅគគុកជាមួយប្រទេសចិនក្នុងអំឡុងពេលអាណត្តិដំបូងរបស់​លោក​នៅក្នុងតំណែង​ជា​ប្រធានាធិបតី​អាមេរិក ដោយចោទប្រកាន់​ចិន​ពីការលួចកម្មសិទ្ធិបញ្ញា និងការអនុវត្ត «អយុត្តិធម៌» ផ្សេងៗទៀត។

លោក ត្រាំ បាន​ប្រកាស​ថានឹងដាក់ពន្ធកាន់តែខ្ពស់លើ​ចិន បន្ទាប់ពីចូលកាន់តំណែងក្នុងខែមករា ខណៈពេលដែលទីក្រុងប៉េកាំងកំពុងប្រឈមនឹងការរង្គោះរង្គើសេដ្ឋកិច្ចក្រោយ​វិបត្តិ​​ជំងឺ​រាតត្បាត។

ទីក្រុងប៉េកាំង កំពុងកំណត់គោលដៅកំណើនប្រចាំឆ្នាំប្រហែល​៥​ភាគរយក្នុង​ឆ្នាំ​២០២៤​នេះ ទោះបីជាការប្រើប្រាស់ក្នុងស្រុកធ្លាក់ចុះ ភាពអត់ការងារធ្វើខ្ពស់ និងវិបត្តិអូសបន្លាយក្នុងវិស័យអចលនទ្រព្យដ៏ធំ ក៏​ដោយ៕

ដោយ៖ ឈាង