បាក់ស្ពាននៅប្រេស៊ីល អ្នកស្លាប់បន្ត​កើនឡើងដល់៩នាក់

សាកសពស្ត្រីម្នាក់ទៀតត្រូវបានគេរកឃើញ បន្ទាប់ពីស្ពានតភ្ជាប់រដ្ឋភាគខាងជើងចំនួនពីរក្នុងប្រទេសប្រេស៊ីល បានបាក់ ដែលនាំឱ្យចំនួនអ្នកស្លាប់មកទល់ពេលនេះកើនឡើងដល់៩នាក់​។ នេះបើយោងតាសមការចេញផ្សាយរបស់ទីភ្នាក់ងារព័ត៌មាន​ AP នៅថ្ងៃទី២៨ខែធ្នូនេះ។

កងទ័ពជើងទឹករបស់ប្រទេសប្រេស៊ីលបាននិយាយកាលពីថ្ងៃសុក្រថា សាកសពស្រីម្នាក់ត្រូវបានគេរកឃើញចម្ងាយ៦ គីឡូម៉ែត្រ ពីស្ពាន Juscelino Kubitschek de Oliveira ខណៈមនុស្ស​ប្រាំបី​នាក់​ផ្សេង​ទៀត​នៅ​មិន​ទាន់ស្គាល់អត្តសញ្ញាណនៅឡើយ​ទេ។

គួរបញ្ជាក់ថា កាលពីថ្ងៃអាទិត្យទី២២ខែធ្នូឆ្នាំ២០២៤ នៅប្រទេសប្រេស៊ីល មានហេតុការណ៍បាក់ស្ពាន បណ្តាលឲ្យមនុស្ស២នាក់ បាត់បង់ជីវិត រថយន្តដឹកទំនិញចំនួន ៤ គ្រឿង រថយន្ត ២ គ្រឿង និងម៉ូតូពីរគ្រឿង ហើយថែមក្នុងនោះមានទាំងរថយន្តផ្ទុកអាស៊ីដស៊ុលផួរិច ធ្លាក់ចូលទៅក្នុងទន្លេទៀតផង។

គួរបញ្ជាក់ថាស្ពានប្រវែង ៥៣៣ ម៉ែត្រនេះ តភ្ជាប់រវាងទីក្រុង Estreito និង Aguiarnopolis ត្រូវបានសាងសង់ក្នុងទសវត្សរ៍ឆ្នាំ ១៩៦០។ វាមានចម្ងាយប្រហែល ១៣០០ គីឡូម៉ែត្រ ភាគខាងជើងនៃរដ្ឋធានី Brasilia៕

អត្ថបទ៖ ប៊ុន សុភាព