ត្រៀម CV ! ឱកាសការងារសម្រាប់សិស្សនិស្សិត រយៈពេល ២ថ្ងៃ ចាប់ផ្តើមពីស្អែកនេះ

មជ្ឈមណ្ឌលអប់រំ ស្រ្ពីង នឹងរៀបចំកម្មវិធីពិព័រណ៍ការងារជាលើកទី២ ឬ Spring Career Village 2.0 ដែលប្រព្រឹត្តទៅនៅថ្ងៃទី ២៤ និង ២៥ ខែមករា ឆ្នាំ២០២៥ នៅមជ្ឈមណ្ឌលអប់រំ ស្រ្ពីង សាខាចតុមុខ។

កម្មវិធីនេះ ត្រូវបានរៀបចំឡើង ក្នុងគោលបំណងផ្សារភ្ជាប់រវាងក្រុមហ៊ុនដែលកំពុងត្រូវការជ្រើសរើសបុគ្គលិក ទៅនឹងសិស្សនិស្សិតរាប់រយនាក់ ដែលកំពុងស្វែងរកការងារធ្វើ ដើម្បីឱ្យសិស្សនិស្សិតអាចសិក្សាស្វែងយល់ពីវិស័យការងារ និងឱកាសការងារផ្សេងៗពីអ្នកតំណាងក្រុមហ៊ុនផ្ទាល់តែម្តង។

Spring Career Village 2.0 នឹងមានរៀបចំសកម្មភាពធំៗជាច្រើន ដូចជាបទបង្ហាញអាជីវកម្ម ពីសំណាក់ក្រុមហ៊ុន (Business Presentation) កិច្ចពិភាក្សាពីវាគ្មិនកិត្តិយស (Panel Discussion) ការដាក់បង្ហាញស្ដង់របស់ក្រុមហ៊ុន (Booth Display) បទសម្ភាសផ្ទាល់ពីតំណាងក្រុមហ៊ុន (Walk-in Interview) ការចែករង្វាន់ (Giveaway) និងការច្រៀងរាំកម្សាន្តពីសំណាក់សិស្សនិស្សិតរបស់យើង (Entertainment) ។

អ្នកចូលរួមកម្មវិធីនេះ នឹងទទួលបានអត្ថប្រយោជន៍ជាច្រើន ដូចជាទទួលបាននូវចក្ខុវិស័យថ្មី ឱកាសការងារ និងបណ្ដាញទំនាក់ទំនងជាច្រើន ការសម្ភាសនៅនឹងកន្លែងផ្ទាល់ ការតម្រង់ទិស និងការចែករំលែកបទពិសោធពីវាគ្មិនកិត្តិយស ទាក់ទងនឹងការជ្រេីសរេីសជំនាញសិក្សា ក៏ដូចជាវិថីការងារដែលត្រឹមត្រូវ។

គួរបញ្ជាក់ផងដែរថា កម្មវិធី Spring Career Village លើកទី១ បានទទួលការគាំទ្រយ៉ាងពេញទំហឹង ពីសំណាក់សិស្សនិស្សិតរបស់យើង បណ្តាក្រុមហ៊ុនដែលចូលរួមពិព័រណ៍ និងសាធារណជនជាច្រើនទៀត ដែលជាកត្តាជំរុញឱ្យក្រុមការងារនៃមជ្ឈមណ្ឌលអប់រំស្រ្ពីង រៀបចំកម្មវិធីពិព័រណ៍លើកទី២ នេះឡើង៕