Update៖ ករណីអគ្គិភ័យឆេះនៅខេត្តព្រះសីហនុ​ខូចខាតផ្ទះមួយខ្នង និងប្រាក់សរុប៨ពាន់ដុល្លាររួមទាំងសម្ភារៈមួយចំនួន

ករណីអគ្គិភ័យដែលឆាបឆេះផ្ទះប្រជាពលរដ្ឋលក់ដូរនៅភូមិត្រពាំងគា ឃុំជើងគោ ស្រុកព្រៃនប់ ខេត្តព្រះសីហនុ បណ្ដាលឲ្យខូចខាតផ្ទះមួយខ្នងទាំងស្រុង និងប្រាក់សរុប៨ពាន់ដូល្លារ រួមទាំងសម្ភារៈមួយចំនួន និងរបួសមនុស្សម្នាក់។ តាមរបាយការណ៍របស់សមត្ថកិច្ច ករណីនេះកើតឡើងដោយសារឆ្លងចរន្ដអគ្គិសនីក្បែរកន្លែងចាក់សាំង។

យោងតាមរបាយការណ៍ ករណីនេះបានឆេះផ្ទះលក់គ្រឿងកំប៉ុង និងប្រេងសាំង ស្ថិតនៅចំណុច ភូមិត្រពាំងគា ឃុំជើងគោ ស្រុកព្រៃនប់ ខេត្តព្រះសីហនុ នាវេលាម៉ោង៨និង៣០នាទី ព្រឹកថ្ងៃទី១២ ខែកុម្ភៈ ឆ្នាំ២០២៥។ ផ្ទះដែលត្រូវអគ្គិភ័យឆាបឆេះមានទំហំ ១៣ម៉ែត្រ គុណ ៣២ម៉ែត្រ ធ្វើអំពីថ្ម ប្រកស័ង្កសី ជារបស់ឈ្មោះ យាន ហ៊ួរ អាយុ៤២ឆ្នាំ មុខរបរលក់ដូរ (ប្ដី រងរបួសស្រាល) និងឈ្មោះ លាន ធូ អាយុ៤២ឆ្នាំ មុខរបរលក់ដូរ (ប្រពន្ធ) ស្នាក់នៅកន្លែងកើតហេតុ។

ក្នុងករណីអគ្គិភ័យនេះ បណ្ដាលឲ្យឆេះខូចខាតបាត់បង់ប្រាក់រៀលចំនួន ២០.០០០.០០០រៀល (ម្ភៃលានរៀល) ប្រាក់ដុល្លារចំនួន ៣០០០ដុល្លា(បីពាន់ដុល្លារ) និងសម្ភារៈមួយចំនួនទៀត។ តាមរបាយការណ៍ ក្នុងរង្វង់ប្រតិបត្តិការ កម្លាំងជំនាញបានប្រើប្រាស់រថយន្តពន្លត់អគ្គិភ័យចំនួន ៣គ្រឿង ប្រើប្រាស់ទឹកសរុបអស់ចំនួន១០ឡាន៕