ព័ត៌មានជាតិ

អ្នកនាំពាក្យប៉ូលិសថា មិនទាន់ទទួលបានព័ត៌មានផ្លូវការ ពីករណីសាច់ញាតិរបស់យុវជនថៃ វ៉ាន់ ឆាឡឺម មកកាន់កម្ពុជានោះទេ

បានផុស

៥ years មុន

នៅ

ថ្ងៃសុក្រ ៦ វិច្ឆិកា ២០២០

ដោយ

អ្នកនាំពាក្យអគ្គស្នងការដ្ឋាននគរបាលជាតិ លោកឧត្តមសេនីយ៍ឯក ឆាយ គឹមខឿន បានថ្លែងប្រាប់កម្ពុជាថ្មី នៅរសៀលថ្ងៃទី០៦ ខែវិច្ឆិកានេះថា លោកមិនទាន់ទទួលបានព័ត៌មានផ្លូវការ អំពីដំណើរមកកម្ពុជារបស់សាច់ញាតិ យុវជនថៃ លោក វ៉ាន់ឆាឡឺម សាតស័ក្តិសិទ្ធិ (Wanchalerm Satsaksit) នោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកឧត្តមសេនីយ៍ឯក ឆាយ គឹមខឿន បញ្ជាក់យ៉ាងនេះថា “ខ្ញុំឮតែព័ត៌មានគេសួរបែបនេះដែរ តែខ្ញុំមិនទាន់ទទួលបានព័ត៌មានផ្លូវការណាមួយនោះទេ តែការមកនោះ គឺដើម្បីបង្ហាញភស្តុតាងតុលាការ តែសម្រាប់ខាងខ្ញុំ មិនទាន់ទទួលព័ត៌មានច្បាស់ការណ៍ ឬជាឯកសារអ្វីថាគាត់មកច្បាស់លាស់នោះទេ”។

ការលើកឡើងរបស់អ្នកនាំពាក្យអគ្គស្នងការនគរបាលជាតិ លោកឧត្តមសេនីយ៍ឯក ឆាយ គឹមខឿន បានធ្វើឡើងបន្ទាប់ពីមានព័ត៌មានថា បងស្រីបង្កើតរបស់លោក វ៉ាន់ឆាឡឺម គឺលោកស្រី ស៊ីថាណាន សាតស័ក្តិសិទ្ធិ (Sitanan Satsaksit) និងមេធាវីជនជាតិថៃចំនួន៣នាក់ នឹងធ្វើដំណើរមកកម្ពុជា ដើម្បីត្រៀមខ្លួនក្នុងការចូលឆ្លើយបំភ្លឺនៅតុលាការកម្ពុជា នាថ្ងៃទី១០ ខែធ្នូខាងមុខ ទាក់ទងទៅនឹងសំណុំរឿងបាត់ខ្លួនយុវជន Wanchalerm Satsaksit ។

សូមបញ្ជាក់ថា លោក វ៉ាន់ឆាឡឺម សាតស័ក្តិសិទ្ធិ (Wanchalerm Satsaksit) ជាយុវជនថៃ មានអាយុ៣៧ឆ្នាំ ត្រូវបានគេអះអាងថា បានភៀសខ្លួនមកកម្ពុជា នៅក្រោយរដ្ឋប្រហារយោធាមួយនៅក្នុងប្រទេសថៃ កាលពីឆ្នាំ២០១៤ ប៉ុន្តែក្រោយមកត្រូវបានគេអះអាងថា បានបាត់ខ្លួនដោយមិនដឹងពីមូលហេតុ។

កន្លងមក ដោយសាតតែការបាត់ខ្លួននេះ នៅក្នុងប្រទេសថៃ មានការតវ៉ាមួយ នៅខាងក្រៅស្ថានទូតកម្ពុជា ក្នុងទីក្រុងបាងកក ជំរុញឲ្យរដ្ឋាភិបាលកម្ពុជា និងថៃធ្វើការស៊ើបអង្កេតលើករណីនេះ៕
ដោយ ៖ កោះកែវ

Related Topics: