ស្រុកកោះអណ្ដែត បំពាក់កាមេរ៉ាសុវត្ថិភាពលើផ្លូវលេខ​១២៩ E ដើម្បីពង្រឹងសន្តិសុខ និងកាត់បន្ថយបទល្មើស

រដ្ឋបាលស្រុកកោះអណ្ដែត កំពុងរៀបចំគម្រោងបំពាក់កាមេរ៉ាសុវត្ថិភាពសាកល្បងចំនួន ២គ្រឿង នៅតាមបណ្ដោយផ្លូវលេខ១២៩អឺ (129E) ក្នុងភូមិសាស្ត្រស្រុកកោះអណ្ដែត ដើម្បីរួមចំណែកពង្រឹងសន្តិសុខ សណ្តាប់ធ្នាប់សាធារណៈ និងបង្កើនភាពកក់ក្តៅជូនប្រជាពលរដ្ឋ។

ជាក់ស្តែង​ល្ងាចថ្ងៃទី១០ ខែមិថុនា ឆ្នាំ២០២៦ លោក ភួន ឈីម អភិបាលស្រុកកោះអណ្ដែត រួមជាមួយសហការី និងមន្ត្រីជំនាញពាក់ព័ន្ធ បានអញ្ជើញចុះពិនិត្យទីតាំងតាមដងផ្លូវសាធារណៈ ដើម្បីសិក្សា និងកំណត់ទីតាំងសមស្របសម្រាប់ការដំឡើងកាមេរ៉ាសុវត្ថិភាពឱ្យមានប្រសិទ្ធភាពខ្ពស់។

លោក ភួន ឈីម បានបញ្ជាក់ថា ការបំពាក់កាមេរ៉ាសុវត្ថិភាពនេះ គឺជាផ្នែកមួយនៃការអនុវត្តគោលនយោបាយ «ភូមិ-ឃុំមានសុវត្ថិភាព» ដែលមានគោលបំណងជួយដល់កងកម្លាំងមានសមត្ថកិច្ចក្នុងការតាមដាន និងគ្រប់គ្រងស្ថានការណ៍សន្តិសុខនៅតាមមូលដ្ឋាន ព្រមទាំងបង្ការ និងទប់ស្កាត់បទល្មើសផ្សេងៗ ដូចជា ករណីក្មេងទំនើង បទល្មើសគ្រឿងញៀន ការលួច ឆក់ និងប្លន់ជាដើម។

លោកអភិបាលស្រុកកោះអណ្ដែតបានបន្ថែមថា កាមេរ៉ាសុវត្ថិភាពក៏នឹងជួយសម្រួលដល់ការត្រួតពិនិត្យស្ថានភាពចរាចរណ៍ ការធ្វើដំណើររបស់ប្រជាពលរដ្ឋ និងរួមចំណែកកាត់បន្ថយគ្រោះថ្នាក់ចរាចរណ៍នៅលើដងផ្លូវផងដែរ។

ក្នុងឱកាសនោះ លោកបានណែនាំដល់ក្រុមការងារបច្ចេកទេសឱ្យយកចិត្តទុកដាក់លើការជ្រើសរើសទីតាំង និងមុំបំពាក់កាមេរ៉ាឱ្យមានលក្ខណៈយុទ្ធសាស្ត្រ អាចផ្តិតយករូបភាពបានទូលំទូលាយ និងច្បាស់លាស់ទាំងពេលថ្ងៃ និងពេលយប់ ដើម្បីធានាថាប្រព័ន្ធកាមេរ៉ាសុវត្ថិភាពអាចបម្រើការងារសន្តិសុខ និងការពារសុវត្ថិភាពប្រជាពលរដ្ឋបានយ៉ាងមានប្រសិទ្ធភាព៕

​អត្ថបទ៖ វីរៈ