Update៖ ករណីឆេះរោងចក្រក្នុងតំបន់សេដ្ឋកិច្ចពិសេសកំបូល បណ្តាលមកពីផ្ទុះជញ្ជីងថ្លឹងលាយទឹកថ្នាំ​ និងមានមនុស្ស៤នាក់រងរបួស

នៅព្រឹកថ្ងៃទី២៨ ខែមេសា ឆ្នាំ២០២៥ វេលាម៉ោង៧និង៥០នាទី មានករណីឆេះរោងចក្រផលិតប្លាស្ទិក យីហោ «តៃខា» នៅក្នុងតំបន់សេដ្ឋកិច្ចពិសេសកំបូល ភូមិស្រែក្នុង សង្កាត់កន្ទោក ខណ្ឌកំបូល បានខូចខាតសម្ភារៈ និងវត្ថុធាតុដើមមួយចំនួនដែលបណ្តាលមកពីផ្ទុះជញ្ជីងថ្លឹងលាយទឹកថ្នាំ​សម្រាប់ជ្រលក់ផលិតផល។

បើតាមសេចក្តីរាយការណ៍បឋមបានឱ្យដឹងថា រោងចក្រខាងលើនេះ មានស្លាកយីហោ ផលិតប្លាស្ទិក តែពិនិត្យខាងក្នុងឃើញមានផលិតសម្ភារៈកីឡា ខោអាវ ស្បែកជើង មានទំហំ៤០ម៉ែត្រ គុណ ៦០ម៉ែត្រ ខូចខាតឆេះបន្ទប់លាយថ្នាំសម្រាប់បាញ់ផលិតផលសម្ភារ:អស់ចំនួន០៤បន្ទប់។

សូមបញ្ជាក់ថា ក្នុងហេតុការណ៍នេះបណ្តាលឱ្យកម្មករ-កម្មការិនីចំនួន៤នាក់រងរបួស​ (ប្រុស១នាក់​ និងស្រី៣នាក់) ក្នុងនោះ​ ២នាក់រងរបួសធ្ងន់បញ្ជូនទៅមន្ទីរពេទ្យព្រះកុសមៈ​ (ស្រីទាំង២) និង២នាក់កំពុងសម្រាកព្យាបាលនៅមន្ទីរពេទ្យសុខាកំបូល​(ឯកជន)។

គិតត្រឹមម៉ោង​ ៨និង៤០នាទីព្រឹក​ រថយន្តពន្លត់អគ្គិភ័យសរុបចំនួន​ ១៤គ្រឿង​ កំពុងបាញ់ពន្លត់​ និងស្ថានភាពអគ្គិភ័យក៏អាចគ្រប់គ្រងបានទាំងស្រុងផងដែរ៕

អត្ថបទ៖ សំណាង