EU គ្រោងបញ្ជូនមន្រ្តីត្រួតពិនិត្យ​ថ្នាំគីមីលើ​កសិផល​ទៅវៀតណាម ​

សហភាពអឺរ៉ុប (EU) បានប្រកាសផែនការបញ្ជូនគណៈប្រតិភូអធិការកិច្ចទៅកាន់ប្រទេសវៀតណាមនៅពាក់កណ្តាលខែមិថុនា ដើម្បីវាយតម្លៃវិធានការត្រួតពិនិត្យថ្នាំសម្លាប់សត្វល្អិត​តាមតំបន់ដាំដុះរបស់ប្រទេសនេះ លើ​​កសិផលនាំចេញទៅប្លុក​សំខាន់ៗ រួមមាន ទុរេន ផ្លែស្រកានាគ និងម្ទេស។ នេះបើតាមការចុះផ្សាយរបស់កាសែត Viet Nam News។

យោងតាមនាយកដ្ឋានផលិតកម្ម និងការពាររុក្ខជាតិ ក្រោមក្រសួងកសិកម្ម និងបរិស្ថានវៀតណាម ការត្រួតពិនិត្យនឹងធ្វើឡើងនៅទូទាំងតំបន់មួយចំនួន រួមមានខេត្ត Tiền Giang ខេត្ត Long An ខេត្ត Bình Thuận និងទីក្រុង​ហូជីមិញជាដើម​។

ក្នុងអំឡុងពេលបេសកកម្មរយៈពេល ១០ ថ្ងៃ អ្នកជំនាញសហភាពអឺរ៉ុប​រំពឹងថានឹងទៅ​តំបន់​ដាំដុះដំណាំ​​ រោងចក្រកែច្នៃ និងកន្លែងវេចខ្ចប់ ដើម្បីវាយតម្លៃដោយផ្ទាល់នូវការអនុលោមតាមបទប្បញ្ញត្តិសុវត្ថិភាពចំណីអាហាររបស់អឺរ៉ុប។ ​ក្រៅពីនោះ គណៈប្រតិភូ EU នឹង​ជួប​ជាមួយ​ក្រុមហ៊ុន​ត្រួតពិនិត្យ​គុណភាព​ក្នុង​ស្រុក​មួយ​ចំនួន។

នាយកដ្ឋានបានស្នើដល់គ្រឹះស្ថានទាំងអស់ដែលពាក់ព័ន្ធក្នុងការត្រួតពិនិត្យ រៀបចំឯកសារពេញលេញស្តីពីការអនុលោមតាមសុវត្ថិភាពចំណីអាហារ ដំណើរការផលិត និងប្រព័ន្ធតាមដាន។ របាយការណ៍សង្ខេបស្តីពីស្ថានភាពផលិតកម្មក៏ត្រូវបានទាមទារផងដែរ ដើម្បីជួយសម្រួលដល់ការវាយតម្លៃរបស់ក្រុម EU។

យោងតាមក្រសួងកសិកម្ម និងបរិស្ថានវៀតណាម អត្រាត្រួតពិនិត្យបច្ចុប្បន្នសម្រាប់ផលិតផលកសិកម្មវៀតណាមដែលចូលសហភាពអឺរ៉ុបនៅតែមានកម្រិតខ្ពស់។ ​

គួរគូសបញ្ជាក់ថា កន្លងមក ទំនិញកសិកម្មវៀតណាមនាំចេញទៅសហភាពអឺរ៉ុប រងនឹងការចម្រូង​ចម្រាស់​មួយចំនួន ជាពិសេសទាក់ទងនឹងការប្រើប្រាស់​ថ្នាំសម្លាប់សត្វល្អិត​សម្រាប់ការដាំដុះជាដើម៕