ព្រឹត្តិការណ៌តាំងពិព័រណ៌យក្ស Thaifex Anuga Asia ត្រៀមពង្រីកវិសាលភាពឱ្យកាន់តែ ធំជាងមុន ល្អជាងមុន ខ្លាំងជាងមុន នៅឆ្នាំ ២០២៦

កម្មវិធីតាំងពិព័រណ៌ចំនីអាហារនិងភេសជ្ជៈធំជាងគេ និងឈានមុខគេបង្អស់ក្នុងតំបន់អាស៊ី ប្រជុំដោយការតាំងបង្ហាញម្ហូបអាហារមកពីជុំវិញពិភពលោក នឹងកាន់តែធំសម្បើមជាងមុន អស្ចារ្យជាងមុនទៅទៀត។ នេះបើតាមប្រសាសន៍របស់លោកស្រី Wendy Lim អ្នកគ្រប់គ្រងទូទៅ ពិព័រណ៍បច្ចេកវិទ្យាអាហារ និងអាហារ ក្នុងបទសម្ភាសពិសេសជាមួយក្រុមសារព័ត៌មានអន្តរជាតិ។

ជាក់ស្តែងក្នុងឆ្នាំ ២០២៥ នេះ ព្រឹត្តិការណ៍តាំងពិព័រណ៌ Thaifex Anuga Asia ទទួលបានការចាប់អារម្មណ៍យ៉ាងខ្លាំងពីសំណាក់ ពាណិជ្ជករ អ្នកវិនិយោគ ម្ចាស់អាជីវកម្ម និងសហគ្រិនថ្មីៗ រួមទាំងសាធារណជនទូទាំងពិភពលោក។ ការគាំទ្រដ៏សន្ធឹកសន្ធាប់នេះ បានសបញ្ជាក់ឱ្យឃើញពីប្រជាប្រិយភាព និងចំណេះដឹងថ្មីៗពីវិស័យម្ហូបអាហារនិងភេសជ្ជៈ ក្នុងកម្មវិធី Thaifex Anuga Asia តាមរយៈវត្តមានស្តង់តាំងពិព័រណ៌ និងក្រុមហ៊ុនចូលរួមតាំងពិព័រណ៌ជាង ៣២០០​ មកពី ៥៧ប្រទេស ឯណោះ។

ក្នុងចំនោមនោះ ៦០% គឺជាសមាជិកថ្មីដែលចូលរួមកម្មវិធីតាំងពិព័រណ៌នេះជាលើកដំបូង ពោលគឺ ១០ប្រទេស ដូចជា អូប៉េគីស្ថាន ណូវ៉េហ្សេឡង់ ស្លូវ៉េនី និងអាហ្វ្រិក ជាដើម។ ឆ្នាំនេះគឺជា ឆ្នាំទី ២១ហើយ ដែល Thaifex Anuga Asia បានប្រារព្ធឡើង ទោះបីជាក្នុងកាលៈទេសៈកូវីដ ១៩ ផ្ទុះ ក៏កម្មវិធីនៅតែបន្តឈរយ៉ាងរឹងមាំប្រារព្ធឡើង ក្នុងគោលបំណងលើកស្ទួយវិស័យម្ហូបអាហារនិងភេសជ្ជៈទៅកាន់ពិភពលោក។ កត្តានេះក៏រួមចំណែកដល់ភាពល្បីល្បាញរបស់ Thaifex Anuga Asia ផងដែរ ព្រោះថាព្រឹត្តិការណ៍មួយនេះប្រារព្ធឡើងជារៀងរាល់ឆ្នាំ មិនរាថយ ទោះបីពិភពលោកជួបឧបសគ្គបែបណាក៏ដោយ។

លោកស្រី Wendy Lim អ្នកគ្រប់គ្រងទូទៅ ពិព័រណ៍បច្ចេកវិទ្យាអាហារ និងអាហារ បានបញ្ជាក់ប្រាប់អ្នកសារព័ត៌មានថា « នៅក្នុងឆ្នាំ ២០២៦ Thaifex Anuga Asia នឹងធំជាងមុន ល្អប្រសើរជាងមុន ខ្លាំងជាងមុន ព្រោះថា សាលទាំង ១២ នឹងត្រូវដាក់ឱ្យប្រើប្រាស់ឱ្យអស់តែម្តង។ កម្មវិធីឆ្នាំ ២០២៥ សាលលេខ ៤ មិនត្រូវបានដាក់ឱ្យប្រើប្រាស់ទេ ដូច្នេះហើយឆ្នាំក្រោយបើបន្ថែមសាលលេខ ៤ទៀត យើងនឹងអាចមានផ្ទៃដីសរុបបន្ថែម ១០០០០ ម៉ែត្រការ៉េទៀត។ លើសពីនេះ ដើម្បីបង្កើនសក្តានុពល និងងាយស្រួលសម្រាប់អ្នកចូលរួម ពហុកីឡដ្ឋាន Impact សន្យាជាមួយក្រុមការងាររៀបចំកម្មវិធីថា នឹងសាងសង់ស្ពានភ្ជាប់ពីសាលមួយទៅសាលមួយតែម្តង។ »

ជាក់ស្តែង កម្មវិធី Thaifex Anuga Asia មិនមែនផ្តោតតែនៅលើប្រទេស ឬផលិតផលដែលមានការគាំទ្រច្រើនស្រាប់នោះឡើយ ទោះក្នុងពេលអនាគតកម្មវិធីតាំងពិព័រណ៌នេះល្បីល្បាញយ៉ាងណា ក៏មិនភ្លេចជាមួយក្រុមហ៊ុន Start-up ឬក្រុមហ៊ុនតូចធំដែលចូលរួមតាំងបង្ហាញលើកទី ១ដែរ។ បន្ថែមពីនេះ Thaifex ពិតជាឱ្យតម្លៃទៅលើផលិតផលចំណីអាហារណាដែលផ្តោតលើការជួយសុខភាព និងអាហារមានការច្នៃប្រឌិតថ្មីតម្រូវតាមនិន្នាការពិភពលោកបច្ចុប្បន្នថែមទៀតផង។ ក្រុមការងារនឹងជម្រុញផលិតផលម្ហូបអាហារនិងភេសជ្ជៈទាំងអស់នោះ ឱ្យមានការទទួលស្គាល់ពីអ្នកចូលរួមកម្មវិធីតាមដែលអាចធ្វើទៅបាន។

លោកស្រី Lynn How នាយកគម្រោង បានមានប្រសាសន៍ថា « សម្រាប់អ្នកចូលរួមដាក់តាំងបង្ហាញលើកទី ១ កុំមានការព្រួយបារម្ភឱ្យសោះ ទោះបីជាចូលរួមលើកដំបូងក្តី ផលិតផលឬក្រុមហ៊ុនអ្នកមិនត្រូវបានទុកចោលទេ ព្រោះអ្នករៀបចំកម្មវិធីនឹងប្រឹងជំរុញផលិតផលរបស់អ្នកឱ្យបានទៅដល់ពាណិជ្ជករ ឬសាធារណជនបានស្គាល់។ អ្វីដែលសំខាន់ ម្ចាស់អាជីវកម្មនិងម៉ាក ត្រូវប្រាកដក្នុងចិត្តថា តើអ្នកចង់លក់អ្វីទៅកាន់អ្នកទិញ? ផលិតផលមានគុណភាពបែបណា? ដូច្នេះក្រុមការងារផ្តល់ការគាំទ្រនិងជួយយ៉ាងពេញទំហឹង រុញច្រានម៉ាកផលិតផលរបស់អ្នកទៅដល់គោលដៅអ្នកទិញពិតប្រាកដ។ កុំបារម្ភ និងគិតច្រើនពីទំហំស្តង់ធំប៉ុណ្ណា ជុំវិញស្តង់អ្នក មានទំហំធំប៉ុណ្ណា អ្វីដែលសំខាន់គឺទៅលើភាពច្នៃប្រឌិតផលិតផល។ »

រាល់បណ្តារក្រុមហ៊ុន ឬម្ចាស់អាជីវកម្ម ដែលចង់ដាក់តាំងបង្ហាញផលិតផល ឬណែនាំទៅកាន់ពិភពលោកពីសក្តានុពលក្រុមហ៊ុនរបស់អ្នក សូមកុំរំលង កម្មវិធីតាំងពិព័រណ៌អាហារនិងភេសជ្ជៈ Thaifex Anuga Asia ដែលប្រារព្ធឡើងជារៀងរាល់ឆ្នាំ នៅរាជធានីបាងកក ប្រទេសថៃ។ ឆ្នាំក្រោយ Thaifex Anuga Asia នឹងពង្រីកវិសាលភាពឱ្យធំជាងមុនតាមរយៈពាក្យស្លោក « Bigger Better Bolder! »