ព័ត៌មានអន្ដរជាតិ

ក្រុមហ៊ុនវៀតណាមនឹងចុះ MoU ទិញកសិផលអាមេរិក ២ ប៊ីលានដុល្លារ

បានផុស

១ year មុន

នៅ

ថ្ងៃអង្គារ ៣ មិថុនា ២០២៥

ដោយ

ក្រសួងកសិកម្មវៀតណាម បានឱ្យដឹងនៅថ្ងៃអង្គារនេះថា ក្រុមហ៊ុនវៀតណាមនឹងចុះហត្ថលេខាលើអនុស្សរណៈនៃការយោគយល់ (MoU) ជាមួយដៃគូសហរដ្ឋអាមេរិក ដើម្បីទិញកសិផលអាមេរិកដែលមានតម្លៃ ២ ប៊ីលានដុល្លារ ដែលផ្នែកមួយនៃកិច្ចខិតខំប្រឹងប្រែងចរចាពន្ធជាមួយរដ្ឋបាលប្រធានាធិបតី ដូណាល់ ត្រាំ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាផ្នែកមួយនៃ MoU ចុងក្រោយ ក្រសួងកសិកម្មបាននិយាយថា កិច្ចព្រមព្រៀងថ្មីចំនួន ៣ បានចុះហត្ថលេខារួចរាល់ហើយ ក្នុងអំឡុងពេលដំណើរទស្សនកិច្ចទៅកាន់សហរដ្ឋអាមេរិករបស់គណៈប្រតិភូក្រុមហ៊ុនវៀតណាមចំនួន ៥០ ដឹកនាំដោយរដ្ឋមន្ត្រីក្រសួងកសិកម្មលោក Do Duc Duy។ កិច្ចព្រមព្រៀងនោះ រួមមាន MoU ចំនួន ៥ ដើម្បីទិញផលិតផលកសិកម្មតម្លៃ ៨០០ លានដុល្លារ ពីរដ្ឋ ឡូវ៉ា របស់អាមេរិក ក្នុងរយៈពេល ៣ ឆ្នាំ។

ក្រសួងបន្ថែមថា MoU សម្រាប់រដ្ឋ របស់រដ្ឋ ឡូវ៉ា ពាក់ព័ន្ធនឹងការទិញពោត ស្រូវសាលី គ្រាប់ធញ្ញជាតិស្ងួត និងគ្រាប់សណ្តែក។

គួរគូសបញ្ជាក់ថា វៀតណាមរងពន្ធបដិការ ៤៦ ភាគរយ ពីសហរដ្ឋអាមេរិក ហើយប្រឈមនឹងហានិភ័យនឹងការចូលជាធរមាននៅដើមខែកក្កដា ប្រសិនបើការចរចាមិនបានផល។ ការណ៍នេះ អាចគំរាមកំហែងដល់កំណើនសេដ្ឋកិច្ចដែលពឹងផ្អែកលើការនាំចេញរបស់វៀតណាម ដែលមានអតិរេកពាណិជ្ជកម្ម ១២៣,៥ ប៊ីលានដុល្លារ ជាមួយសហរដ្ឋអាមេរិក កាលពីឆ្នាំមុន។

ដើម្បីជាការចរចាពន្ធ នាពេលកន្លងមក វៀតណាមបានស្នើបង្កើនការនាំចូលទំនិញពីសហរដ្ឋអាមេរិក រួមទាំងការទិញទំនិញកសិកម្ម ឧស្ម័នធម្មជាតិពង្រាវ និងយន្តហោះប៊ូអ៊ីងអាមេរិក ជាដើម រួមជាមួយសំណើផ្សេងៗទៀត។

កាលពីឆ្នាំមុន ទីភ្នាក់ងារសារព័ត៌មានវៀតណាមបានរាយការណ៍ថា វៀតណាមកាលពីឆ្នាំមុនបាននាំចូលកសិផលអាមេរិកក្នុងតម្លៃ ៣,៤ ប៊ីលានដុល្លារ ខណៈនាំចេញផលិតផលកសិកម្មទៅវិញ ចំនួន ១៣,៦៨ ប៊ីលានដុល្លារ៕