ព័ត៌មានជាតិ
រយៈពេលជាង ១៣ ឆ្នាំ ផ្សារមូលបត្រកម្ពុជា កៀរគរថវិកាបានជិត ៥០០ លានដុល្លារ
លោក ហុង សុខហួរ អគ្គនាយកនៃផ្សារមូលបត្រកម្ពុជា (CSX ) បានមានប្រសាសន៍ថា រយៈពេលជាង ១៣ ឆ្នាំ នៃការបើកដំណើរការផ្សារហ៊ុននៅក្នុងប្រទេសកម្ពុជា ផ្សារមូលបត្របានចូលរួមកៀរគរថវិកាបានប្រមាណជិត ៥០០ លានដុល្លារអាមេរិក។
ក្នុងបទសម្ភាសសេដ្ឋកិច្ចជាមួយ «កម្ពុជាថ្មី» លោក ហុង សុខហួរ បានលើកឡើងថា រយៈពេលជាង ១៣ឆ្នាំហើយ ចាប់តាំងពីទីផ្សារហ៊ុនបើកដំណើរការនៅក្នុងប្រទេសកម្ពុជា បច្ចុប្បន្នទីផ្សារមូលបត្រកម្ពុជា មានក្រុមហ៊ុនដែលចុះបញ្ជីជាភាគហ៊ុនជាមួយមានចំនួន ១១ ក្រុមហ៊ុន ដោយក្នុងនោះក្រៅពីភាគហ៊ុន ក៏នៅមានផលិតផលផ្សេងទៀតគឺមានសញ្ញាប័ណ្ណចំនួន ១៤ បន្ថែម សរុបក្រុមហ៊ុនទាំងអស់មានចំនួន ២៥។ ក្រុមហ៊ុនទាំង ២៥ នេះ បានកៀរគរទុនជូនដល់រាជរដ្ឋាភិបាលកម្ពុជា បានប្រមាណជិត ៥០០លានដុល្លារ។
លោកបានសង្កត់ធ្ងន់ថា ទឹកប្រាក់ជិត ៥០០លានដុល្លារ ដែលផ្សារមូលបត្រកៀរគរបាននេះ ប្រសិនបើគិតជាស្តង់ដារសម្រាប់ផ្សារហ៊ុនជាអន្តរជាតិ គឺជាចំនួនមួយដែលតិចតួចបំផុត ព្រោះនៅក្នុងកម្រិតផ្សារហ៊ុនទឹកប្រាក់ដែរកៀរគរក្នុងមួយឆ្នាំៗគួរស្ថិតនៅក្នុងកម្រិតរាប់ពាន់លាន។ ប៉ុន្តែសម្រាប់នៅកម្ពុជារយៈពេល ១២-១៣ ឆ្នាំ អាចកៀរគរបានគិតជាទឹកប្រាក់ប្រមាណជិត ៥០០លាន នេះ ជាទឹកប្រាក់មួយដែលធំសមល្មមដែរ មានន័យថា ចំនួនទឹកប្រាក់ជិត ៥០០លានដុល្លារនេះ លោកជឿជាក់ថាប្រាកដជាបានចូលរួមនៅក្នុងសេដ្ឋកិច្ចការអភិវឌ្ឍន៍ប្រទេសជាតិនៅក្នុងកម្រិតណាមួយ បើទោះបីជាមិនបានទាំងស្រុងក៏ដោយ។
ពាក់ព័ន្ធទីផ្សារនៅកម្ពុជានេះដែរ លោក ហុង សុខហួរ បានបន្តថា ចំនួននៃការចូលរួមបើកគណនេយ្យជួយដូរក៏ឃើញមានការកើនឡើងជាលំដាប់ផងដែរ ដែលគិតមកដល់ពេលបច្ចុប្បន្នមានប្រមាណជាង ៦ ម៉ឺនគណនេយ្យ។
បើទោះបីជាផ្សារមូលបត្រ បើកដំណើរការនៅកម្ពុជារយៈពេលជាង ១៣ឆ្នាំមកហើយក្តី លោក ហុង សុខហួរ បានបន្ថែមថា ប្រជាពលរដ្ឋកម្ពុជាមួយចំនួនគឺនៅតែពុំទាន់បានស្គាល់អំពីផ្សារមូលបត្រកម្ពុជាបានពិតប្រាកដនៅឡើយទេ សូម្បីតែមកដល់ពេលបច្ចុប្បន្នក៏នៅតែមានប្រជាពលរដ្ឋ នៅតែមានការយល់ច្រឡំលើផ្សារមូលបត្រកម្ពុជានេះដូចគ្នាដែរ។
លោក បានពន្យល់ថា ផ្សារហ៊ុន គឺជាការមកទិញភាគហ៊ុនរបស់ក្រុមហ៊ុនមួយ មិនមែនជាការមកលេងហាងឆេងនោះទេ ប៉ុន្តែជាការទិញភាគហ៊ុនដើម្បីក្លាយទៅជាម្ចាស់អាជីវកម្មមួយ ហើយអាចក្លាយទៅជាម្ចាស់អាជីវកម្មតូច ឬធំ គឺស្ថិតនៅត្រង់ថាយើងបានទិញភាគហ៊ុនពីក្រុមហ៊ុនណាមួយនោះចំនួនប៉ុន្មានភាគរយនោះទេ។ ក្នុងនោះអ្នកចូលមកទិញភាគហ៊ុនអាចមានគោលដៅច្រើន ដោយពួកគេអាចទិញភាគហ៊ុនមកដើម្បីលក់ប្រចាំថ្ងៃ និងមួយចំនួនទៀតទិញ លក់ឆ្លងថ្ងៃប្រចាំសប្ដាហ៍ ដែលទិញមកក្នុងគោលដៅលក់ទៅវិញដើម្បីទទួលបានផលចំណេញជាងមុន គេហៅថា Trader ។
«ដោយឡែកសម្រាប់អ្នកដែលទិញហើយលក់វិញនៅក្នុងថ្ងៃដដែល ហៅថា Day Trader ហើយចំពោះអ្នកដែលទិញនៅថ្ងៃនេះ លក់នៅថ្ងៃនេះ ឬលក់នៅថ្ងៃស្អែក ឬនៅសប្ដាហ៍ក្រោយ គឺហៅថា Swing Trader ប៉ុន្តែសម្រាប់អ្នកទិញក្នុងគោលដៅថានឹងអាចបានចំណូលមកជាប្រាក់ភាគលាបប្រចាំត្រីមាន ឬប្រចាំឆមាស ជាដើមនោះ គេហៅថាជា Long term investor ដែលនេះសុទ្ធសឹងតែជាគោលដៅ និងយុទ្ធសាស្ត្រខុសៗគ្នា»។ លោក ហុង សុខហួរ បន្ថែមបែបនេះ។
ទន្ទឹមនេះ កន្លងមកលោកក៏សង្កេតឃើញម្ចាស់ហ៊ុនធំៗមួយចំនួននៅកម្ពុជាមានការចាប់អារម្មណ៍លើទីផ្សារហ៊ុននៅកម្ពុជា ដោយនេះជាមោទនភាពមួយដែលប្រជាពលរដ្ឋនៅកម្ពុជាចាប់ផ្តើមឃើញ និងស្គាល់អំពីតម្លៃរបស់ភាគហ៊ុន ស្គាល់អំពីសក្ដានុពលនៃការប្រើប្រាស់ភាគហ៊ុនដើម្បីទទួលបានប្រាក់ចំណេញ៕
ដោយ៖ ឌិន ថារី
-
ព័ត៌មានអន្ដរជាតិ១២ ម៉ោង agoអស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ
-
សេដ្ឋកិច្ច២ ថ្ងៃ agoធនាគារ ARDB ចាក់បញ្ចូលទុនលើស្វាយចន្ទី និងដំឡូងមី
-
ព័ត៌មានជាតិ១ សប្តាហ៍ agoរដ្ឋបាលខណ្ឌកំបូល សហការជាមួយក្រុមហ៊ុនមីនេបៀ ប្រើប្រាស់កម្លាំងជាង ៨០០នាក់ សម្អាតអនាម័យនៅតាមដងផ្លូវ
-
កីឡា៣ ថ្ងៃ agoមូលហេតុកីឡាករអាមេរិ Penrose ធ្វើមិនបានល្អជាមួយក្រុមស្នងការខេត្តស្វាយរៀង
-
ព័ត៌មានអន្ដរជាតិ៦ ថ្ងៃ agoអ៊ីរ៉ង់ បើកច្រកចូលរូងភ្នំ ផ្ទុកមីស៊ីលសម្ងាត់របស់ខ្លួនឡើងវិញ ទោះរងការវាយប្រហារយ៉ាងដំណំ
-
ព័ត៌មានអន្ដរជាតិ១ សប្តាហ៍ agoរដ្ឋមន្ត្រីការពារជាតិជប៉ុន បដិសេធការចោទប្រកាន់របស់ចិន អំពីការវិលទៅរកយោធានិយម
-
សេដ្ឋកិច្ច៥ ថ្ងៃ agoតម្លៃប្រេងលក់រាយធ្លាក់ចុះក្រោម ៥០០០ រៀល មួយលីត្រ
-
សេចក្ដីជូនដំណឹង២ ថ្ងៃ agoក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា