ព័ត៌មានអន្ដរជាតិ

អតីតមេក្រុមអាវក្រហម ប្រកាសធ្វើបាតុកម្មប្រឆាំងលោកស្រី ផែថងថាន នៅចុងខែនេះ

បានផុស

៣ នាទីutes មុន

នៅ

ថ្ងៃសុក្រ ២០ មិថុនា ២០២៥

ដោយ

អតីតមេដឹកនាំក្រុមអាវក្រហមថៃ Jatuporn Prompan បានប្រកាសពីការធ្វើបាតុកម្មធំមួយនៅថ្ងៃទី២៨ខែមិថុនាខាងមុខនេះ ដើម្បីប្រឆាំងទៅនឹងភាពកម្សោយរបស់រដ្ឋាភិបាល ផែថងថាន ស៊ីណាវ៉ាត្រ ក្រោយការបែកធ្លាយសំឡេងសន្ទនារវាងលោកស្រីនិងសម្តេចតេជោ ហ៊ុន សែន ប្រធានព្រឹទ្ធសភាកម្ពុជា។

អតីតមេដឹកនាំក្រុមអាវក្រហមថៃ Jatuporn Prompan (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Jatuporn បានបញ្ជាក់ពីរឿងនេះក្នុងសន្និសីទសារព័ត៌មានមួយនៅសណ្ឋាគារ Rattanakosin នាព្រឹកថ្ងៃសុក្រទី២០ខែមិថុនាឆ្នាំ២០២៥ ក្នុងគោលបំណងដាក់សម្ពាធឲ្យលោកស្រី ផែថងថាន ចុះចេញពីតំណែង។

សម្រាប់បាតុកម្មនេះ បើយោងតាមលោក Jatuporn, គឺនឹងធ្វើឡើងនៅវិមានជ័យជម្នះ ក្នុងខ័ណ្ឌ Ratchathewi រាជធានីបាងកក ចាប់ពីម៉ោង៤រសៀល ដល់ម៉ោង៩យប់ ដើម្បីបង្ហាញអំណាចរបស់ប្រជាជនថៃ ក្នុងការការពារអធិបតេយ្យភាពរបស់ប្រទេសខ្លួន។

រឿងនេះកើតឡើងបន្ទាប់ពី គណបក្សសំខាន់ធំ២ រួមមាន «ថៃរួបរួមជាតិ» និង «ប្រជាធិបតេយ្យ» ដែលមានអាសនៈសភាសរុប ៦១កៅអី ក្នុងរដ្ឋាភិបាលចម្រុះដឹកនាំដោយគណបក្សភឿថៃបច្ចុប្បន្ន បានប្រជុំបន្ទាន់ក្នុងគណបក្សរបស់ពួកគេរៀងៗខ្លួន ដោយបង្ហាញជំហរមិនគាំទ្រលើនាយករដ្ឋមន្ត្រី ផែថងថាន ឲ្យបន្តដំណែងទៀតនោះទេ។

ដោយឡែក លោក Paradorn Prissananantakul អនុប្រធានទី២រដ្ឋសភាថៃ មកពីគណបក្ស Bhumjaithai ក៏ប្រកាសលាលែងពីតំណែងដែរកាលពីព្រឹកថ្ងៃព្រហស្បតិ៍ ពោលគឺប៉ុន្មានម៉ោងប៉ុណ្ណោះបន្ទាប់ពីគណបក្សរបស់លោកបានប្រកាសដកខ្លួនចេញពីក្រុមចម្រុះដឹកនាំដោយគណបក្សភឿថៃ។

សូមជម្រាបថា លោកស្រី ផែថងថាន ស៊ីណាវ៉ាត្រ ដែលគេធ្លាប់ចាត់ទុកថាជាតារារះក្នុងនយោបាយថៃឥឡូវកំពុងរងសម្ពាធ ខណៈប្រជាប្រិយភាពរបស់លោកស្រីក៏ធ្លាក់ចុះ ហើយគណបក្សនយោបាយមួយចំនួននៅក្នុងសម្ព័ន្ធរបស់លោកស្រីកំពុងចាកចេញ ដែលធ្វើឲ្យរដ្ឋាភិបាលរបស់លោកស្រីចុះខ្សោយ។

សូមជម្រាប លោកស្រី ផែថងថាន បានចូលកាន់តំណែងក្នុងឆ្នាំ ២០២៤ ដោយមានការគាំទ្រពីសាធារណៈជនខ្លាំង ព្រោះតែការជំរុញកំណើនសេដ្ឋកិច្ចយ៉ាងដិតដល់ ដូចជាគម្រោង Digital Wallet ដល់អ្នកមានចំណូលទាបជាដើម៕

អត្ថបទ៖ សុខ សុវណ្ណ

ចុចអាន៖ គណបក្សក្នុងរដ្ឋាភិបាលចម្រុះថៃ ទាមទារការកំណែទម្រង់ ខណៈរដ្ឋាភិបាលជួបវិបត្តិ