ព័ត៌មានអន្ដរជាតិ

គណបក្សក្នុងរដ្ឋាភិបាលចម្រុះថៃ ទាមទារការកំណែទម្រង់ ខណៈរដ្ឋាភិបាលជួបវិបត្តិ

បានផុស

៤១ វិនាទី មុន

នៅ

ថ្ងៃសុក្រ ២០ មិថុនា ២០២៥

ដោយ

គណបក្សប្រជាធិបតេយ្យ (Democrat Party) នៅក្នុងរដ្ឋាភិបាលចម្រុះថៃបច្ចុប្បន្ន បានចេញសេចក្តីថ្លែងការណ៍មួយនៅព្រឹកថ្ងៃសុក្រនេះ ដោយបញ្ជាក់ជំហររបស់ខ្លួនចង់នៅក្នុងរដ្ឋាភិបាលចម្រុះបន្តទៅទៀត ក៏ប៉ុន្តែ គណបក្សនេះ បានទាមទារឲ្យមានការកែទម្រង់មួយចំនួនជាពិសេសគឺទំនាក់ទំនងជាមួយកម្ពុជា។

លោក Chalermchai Sri-on ប្រធានគណបក្សប្រជាធិបតេយ្យ។ Khaosod

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គណបក្សប្រជាធិបតេយ្យ ដែលជាគណបក្សធំទី៣ក្នុងរដ្ឋាភិបាលចម្រុះ ដឹកនាំដោយគណបក្សភឿថៃ របស់លោកស្រី ផែថងថាន ស៊ីណាវ៉ាត្រ បានជួបប្រជុំគណៈកម្មាធិការប្រតិបត្តិរបស់គណបក្ស នៅល្ងាចថ្ងៃទី១៩ មិថុនា បន្ទាប់ពីវិបត្តិនយោបាយថៃបានផ្ទុះឡើង ហើយ គណបក្ស Bhumjaithai របស់លោក Anutin Charnirakul បានប្រកាសដកខ្លួនចេញពីរដ្ឋាភិបាលចម្រុះមួយថ្ងៃមុន។

នៅក្នុងសេចក្តីថ្លែងការណ៍របស់ខ្លួន គណបក្សប្រជាធិបតេយ្យ បានលើកឡើងថា ខ្លួននៅតែបន្តនៅក្នុងរដ្ឋាភិបាលចម្រុះ ប៉ុន្តែអំពាវនាឲ្យរដ្ឋាភិបាលត្រួតពិនិត្យតួនាទី និងគោលជំហរ របស់ខ្លួនឲ្យម៉ត់ចត់ លើបញ្ហាទំនាក់ទំនងជាមួយកម្ពុជា។ គណបក្សនេះក៏ជំរុញឲ្យរដ្ឋាភិបាលធ្វើការបង្ហាញដើម្បីស្តារទំនុកចិត្តសាធារណៈឡើងវិញ។

គណបក្សប្រជាធិបតេយ្យថៃ បង្ហាញការប្តេជ្ញាចិត្តចំពោះរដ្ឋាភិបាលប្រជាធិបតេយ្យ ដែលមានព្រះមហាក្សត្រជាប្រមុខរដ្ឋ នៅក្នុងប្រព័ន្ធសភា។ គណបក្សនេះ មិនគាំទ្រចំពោះការផ្លាស់ប្តូរនយោបាយក្រៅពីការគ្រប់គ្រង់តាមបែបប្រជាធិបតេយ្យ និងអំណាចរដ្ឋធម្មនុញ្ញឡើយ។

បន្ទាប់ពីការប្រកាសដកខ្លួនពីរដ្ឋាភិបាលចម្រុះរបស់គណបក្ស Bhumjaithai របស់លោក Anutin Charnirakul ដែលកាន់តួនាទីជាឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ រដ្ឋាភិបាលភិបាលរបស់លោកស្រី ផែថងថា ស៊ីណាវ៉ាត្រ បានប្រឈមនឹងវិបត្តិ ដោយសារតែរដ្ឋមន្ត្រីរហូតដល់៨រូបចេញពីគណបក្ស Bhumjaithai បានប្រកាសលាលែងពីតួនាទី។

ការរុះរើគណៈរដ្ឋមន្ត្រីដែលគណបក្សភឿថៃគ្រោងធ្វើឡើងនៅពេលខាងមុខនេះ អាចប្រឈមចេញមិនរួចដោយសារតែសំឡេងសមាជិកសភារបស់សមាជិកក្នុងរដ្ឋាភិបាលចម្រុះកាន់តែតិច មិនអាចមានការបោះឆ្នោតគាំទ្រគ្រប់គ្រាន់តាមច្បាប់កំណត់៕

រ៉ាន់ រើយ