ព្រះអង្គម្ចាស់អារ៉ាប៊ីសាអូឌីត ដែលសន្លប់២០ឆ្នាំ ពេលនេះ សោយទិវង្គតហើយ

ព្រះអង្គម្ចាស់អារ៉ាប៊ីសាអូឌីត Al Waleed bin Khaled bin Talal Al Saud ដែលគេហៅថា « The Sleeping Prince» បានសោយទិវង្គតហើយ កាលពីថ្ងៃសៅរ៍ទី១៩ខែកក្កដាឆ្នាំ២០២៥ ក្រោយសន្លប់អស់រយៈពេល២០ឆ្នាំ។ នេះបើតាមការចុះផ្សាយរបស់សារព័ត៌មាន Gulf News។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ព្រះអង្គបានធ្លាក់ក្នុងសភាពសន្លប់តាំងពីឆ្នាំ២០០៥មក នៅពេលទ្រង់មានព្រះជន្ម១៥វស្សា បន្ទាប់ពីជួបឧប្បត្តិហេតុគ្រោះថ្នាក់ចរាចរណ៍ដ៏ធ្ងន់ធ្ងរមួយនៅទីក្រុងឡុងដ៍ ចក្រភពអង់គ្លេស អំឡុងពេលទ្រង់កំពុងសិក្សានៅសាលាយោធា។ ឧប្បត្តិហេតុនោះ បណ្តាលឲ្យព្រះអង្គរងរបួសខួរក្បាលធ្ងន់ធ្ងរ និងហូរលោហិតក្នុងព្រះកាយ។

នៅឆ្នាំ២០១៩ មានរបាយការណ៍ថា ព្រះអង្គម្ចាស់បង្ហាញសញ្ញានៃចលនាតិចតួច ដូចជាកម្រើកម្រាមដៃ ឬងាកព្រះកេស ធ្វើឲ្យសាធារណជនភ្ញាក់ផ្អើលនិងផ្តល់ក្តីសង្ឃឹមដល់សែរាជវង្ស។ ទោះយ៉ាងណា ព្រះអង្គមិនភ្ញាក់ព្រះកាយឡើយ។

អស់រយៈពេលជិតពីរទសវត្សរ៍ ព្រះបិតាទ្រង់គឺព្រះអង្គម្ចាស់ Khaled bin Talal មិនព្រមដកឧបករណ៍ទ្រទ្រង់ជីវិតចេញពីព្រះអង្គម្ចាស់ Al Waleed ឡើយ ដោយថា ព្រះរាជបុត្រអាចនឹងដឹងព្រះកាយវិញ។ ព្រះអង្គម្ចាស់ Khaled តែងតែចែករំលែករូបភាពនិងវីដេអូនៅលើបណ្តាញសង្គម អំពីព្រះរាជបុត្រ ធ្វើឲ្យគេអាណិតអាសូរនិងបង្ហាញក្តីសង្ឃឹមយ៉ាងមុតមាំជាមួយទ្រង់។

រឿងរ៉ាវរបស់ព្រះអង្គម្ចាស់ Al Waleed បានក្លាយជានិមិត្តរូបនៃក្តីសង្ឃឹម ជំនឿ និងសេចក្តីស្រឡាញ់ដ៏ជ្រាលជ្រៅរបស់បិតាចំពោះបុត្រា ទាក់ទាញចំណាប់អារម្មណ៍មនុស្សរាប់លាននាក់នៅទូទាំងពិភពលោក។

សូមជម្រាបថា​ ព្រះរាជ​ពិធីបុណ្យសពគឺឡើងនៅថ្ងៃអាទិត្យទី២០ខែកក្កដាឆ្នាំ២០២៥ នៅវិហារ Imam Turki bin Abdullah Mosque ក្នុងទីក្រុងរីយ៉ាដ នៃប្រទេសអារ៉ាប៊ីសាអូឌីត៕

អត្ថបទ៖ សុខ សុវណ្ណ

ចុចអាន៖ អ្នក​ធម្មយាត្រា​ជាង១លាន​នាក់ សម្រុក​ទៅ​ទីក្រុង Mecca ទោះ​រលក​កម្ដៅ​លើស​ពី​៤០​អង្សា