ចក្រភព​អង់គ្លេស បារាំង និង​ ២៣​ ប្រទេសទៀត​ទាមទារ​ឱ្យ​បញ្ចប់​សង្គ្រាម​នៅហ្គាហ្សា​ជា​បន្ទាន់

នៅក្នុងសេចក្តីថ្លែងការណ៍រួមដ៏មានឥទ្ធិពលមួយ ប្រទេសចំនួន ២៥ រួមទាំងចក្រភពអង់គ្លេស បារាំង អូស្ត្រាលី កាណាដា ជប៉ុន និងសហភាពអឺរ៉ុប បានទាមទារឲ្យមានបទឈប់បាញ់ជាបន្ទាន់នៅតំបន់ហ្គាហ្សា ដោយព្រមានថាការឈឺចាប់របស់ជនស៊ីវិល​កាន់តែ​ធ្ងន់ធ្ងរ​ជាង​ពេលណាៗ​ទាំងអស់។ នេះបើយោងតាមការចេញផ្សាយរបស់សារព័ត៌មាន​Al Jazeera នៅថ្ងៃទី២២ខែកក្កដា។

ប្រទេសទាំង២៥បានថ្កោលទោសការរឹតត្បិតជំនួយមនុស្សធម៌របស់អ៊ីស្រាអែល និងការសម្លាប់ជនស៊ីវិលដែលកំពុងស្វែងរកអាហារ និងទឹក ដោយថាកម្មវិធីជំនួយរបស់រដ្ឋាភិបាលអ៊ីស្រាអែលមានគ្រោះថ្នាក់ និងមិនអាចទទួលយកបាន។

សេចក្តីថ្លែងការណ៍នេះធ្វើឡើងបន្ទាប់ពីសង្រ្គាមជាង ២១ ខែ ដែលបានបំផ្លិចបំផ្លាញប្រជាជននៅហ្គាហ្សាជាងពីរលាននាក់។ ចាប់តាំងពីចុងខែឧសភាមក មនុស្សយ៉ាងហោចណាស់ ៨៧៥ នាក់បានស្លាប់ ក្នុងពេលកំពុងព្យាយាមស្វែងរកជំនួយ។ បណ្តាប្រទេសនានាបានអំពាវនាវឱ្យមានការដោះលែងចំណាប់ខ្មាំង ការទទួលបានជំនួយទៅកាន់តំបន់ហ្គាហ្សាដោយគ្មានការពន្យាពេល និងកិច្ចពិភាក្សាដ៏មានប្រសិទ្ធភាពដើម្បីនាំមកនូវសន្តិភាពយូរអង្វែង។

រដ្ឋមន្ត្រីការបរទេសអង់គ្លេសលោក David Lammy បានសង្កត់ធ្ងន់ថា «មិនមានដំណោះស្រាយយោធាទេ» ដោយជំរុញឱ្យមានបទឈប់បាញ់បន្ទាប់ជាចុងក្រោយ។

សូមបញ្ជាក់ថាសង្គ្រាម​នេះបាន​ចាប់​ផ្តើម​បន្ទាប់​ពី​ការ​វាយ​ប្រហារ​របស់​ក្រុម​ហាម៉ាស់​លើ​អ៊ីស្រាអែល​ក្នុង​ខែ​តុលា ឆ្នាំ​២០២៣ ដែល​បាន​សម្លាប់​មនុស្ស​ចំនួន ១១២៩​នាក់។ ចាប់តាំងពីពេលនោះមក ប្រជាជនប៉ាឡេស្ទីនជាង ៥៩,០០០នាក់ ដែលភាគច្រើនជាស្ត្រី និងកុមារត្រូវបានសម្លាប់ នេះបើយោងតាមក្រសួងសុខាភិបាលរបស់ហ្គាហ្សា៕

អត្ថបទ៖ ប៊ុន សុភាព