ចំនួនអ្នកស្លាប់នៅហ្គាហ្សាកើនលើស ៦ ម៉ឺននាក់ ចំពេលមានវិបត្តិអត់ឃ្លាននិងកង្វះជំនួយ

យោងតាមការចេញផ្សាយរបស់ទីភ្នាក់ងារព័ត៌មាន​AP នៅថ្ងៃទី៣០ខែកក្កដា ប្រជាជនប៉ាឡេស្ទីនជាង ៦ ម៉ឺននាក់បានស្លាប់ចាប់តាំងពីសង្គ្រាមអ៊ីស្រាអែល-ហាម៉ាសបានចាប់ផ្តើមនៅថ្ងៃទី ៧ ខែតុលាឆ្នាំ ២០២៣ ខណៈនៅពេលនេះហ្គាហ្សាកំពុងមានវិបត្តិអត់ឃ្លានបន្ថែមទៀត។

បើយោងតាមក្រសួងសុខាភិបាលរបស់ហ្គាហ្សាមានអ្នករងរបួសចំនួន ១៤៥,៨៧០ នាក់ ក្នុងនោះស្ត្រី និងកុមារមានជិតពាក់កណ្តាល។ នាពេលថ្មីៗនេះ ការវាយប្រហារតាមអាកាសរបស់អ៊ីស្រាអែល និងការបាញ់ប្រហារនៅក្បែរក្បួនរថយន្តផ្តល់ជំនួយបានសម្លាប់មនុស្សរាប់សិបនាក់ ដោយជនរងគ្រោះជាច្រើននាក់កំពុងស្វែងរកអាហារ ឬទីជម្រក។

ភ្នាក់ងារមនុស្សធម៌ព្រមានថា តំបន់ហ្គាហ្សា ស្ថិតនៅលើគែមនៃគ្រោះទុរ្ភិក្ស។ អង្គការសុខភាពពិភពលោកបានរាយការណ៍ពីការស្លាប់ទាក់ទងនឹងកង្វះអាហារូបត្ថម្ភជាង ៦០ នាក់ក្នុងខែនេះ រួមទាំងកុមារជាច្រើនផងដែរ។ ការ​ផ្តល់​ជំនួយ​នៅ​តែ​មិន​ស៊ីសង្វាក់​គ្នា​ដោយសារ​ការ​រឹតត្បិត​របស់​អ៊ីស្រាអែល អំពើ​ហិង្សា និង​ការ​លួច​ប្លន់។ ។

លើសពីនេះកញ្ចប់ជំនួយដែលទម្លាក់តាមអាកាសនាពេលថ្មីៗនេះ តែងតែទម្លាក់នៅតំបន់គ្រោះថ្នាក់ ដោយបង្ខំឱ្យជនជាតិប៉ាឡេស្ទីនហែលទឹក ឬប្រណាំងប្រជែងដើម្បីទទួលបាន។ ទោះបីជាមានការកើនឡើងសម្ពាធពីអន្តរជាតិក៏ដោយ ការចរចាបទឈប់បាញ់នៅតែជាប់គាំង ហើយភាពអត់ឃ្លាន និងអំពើហិង្សានៅតែបន្តកើនឡើងឥតឈប់៕

អត្ថបទ៖ ប៊ុន សុភាព